之前旅行朋友聚會，互相問候緊大家下個Trip去邊 —
我:「下星期去首爾滑雪呀~」
Fd:「正呀~ 我都去滑雪呀~」
「邊度呀~」
「奧地利~」
輸哂呀!!!!!!!!!!!!!!!
又咁講，少假期既香港人要滑雪係無乜選擇ga啦，一係日本一係韓國，廣州應該算係止痕，無溫泉就浸浴缸啦果d
咁韓國滑雪都唔差~ 今次我去既洪川大明Vivaldi Park滑雪場既感覺都唔錯，至少對我呢個弱雞BB班既滑雪新手嚟講幾滿意~
就介紹下啦~
========================
請大家Follow我Instagram啦~
=====================================
文章概要 :
首爾近郊滑雪場介紹
報名方法
交通
入場
物品租借流程
係時候sir落去了
肚餓了!
收皮走人
1. 首爾近郊滑雪場介紹
根據係google search到既大量Bloggers所講，首爾周邊大約有12-3個滑雪場，由乜都有family ok場，以至高手到高手高手高高手的泰山十八盤都有
我呢方面經驗唔豐富唔100%肯定啦，但所謂「周邊」係一個好廣泛既定義，原來單程3-4個鐘頭車都係周邊，怪不得小明行路上廣州無難度啦
而一般遊客最常去，和交通最方便的滑雪場，主要是「伊利希安江村滑雪場」和「洪川大明維瓦爾第度假村」
伊利希安江村滑雪場
洪川大明維瓦爾第度假村
「伊利希安江村滑雪場」(Elysian Gangchon) (엘리시안 강촌 스키장)
根據韓國觀光公社所講佢係「唯一搭乘京春線地鐵或ITX-青春列車就可輕鬆抵達的滑雪渡假村」，即係最岩唔跟團唔渣車既朋友~
前往方法係由首爾龍山站出發，乘坐個名好7點講得出口既「ITX-青春列車」約1小時8分鐘到達春川市的「南春川站」，再轉鐵路回頭至到「白楊裡站」(Baegyangni)落車，轉乘每 20 分鐘一班的免費接駁車就得
真心唔難，不過我無去到~
原本做哂功課想去但行程臨時有變嗎~ 無辦法啦~
另外Elysian Gangchon位於著名的南怡島和江村自行車鐵道兩者中間位，每個地方的距離亦只約20分鐘的士，鍾意chur行程既朋友絕對可以一次過玩哂3個地方
龍山站
伊利希安江村滑雪場
(由南春川站向東出發，一條直路就係江村自行車鐵道 –> Elysian Gangchon –> 南怡島)
而我今次去既滑雪場係「洪川大明維瓦爾第度假村」(Vivaldi Park Ski World) (비발디파크 스키장)
由明洞出發車程大約只需1小時40分鐘，可以話係最近首爾市中心既滑雪場
5點滑完返到首爾岩岩好食飯，perfect池~
另外佢旁邊有一個叫「冰雪王國Snowyland」既冰上遊戲公園，專for唔識滑雪既小朋友感受玩雪既樂趣
雖然實際操作好大機會係阿媽帶個仔去「冰雪王國」嘻嘻哈哈，而阿爸就係Ski World滑雪????女嘻嘻哈哈，但此地仍然係一家大細感受韓國冬日既上佳之選~
2. 報名方法
由於Vivaldi Park滑雪場太hit，各大旅遊產品網站都有佢既各種套票
而我計過度過，最終都係揀Klook
同上次租車講既一樣，Klook book票快手簡單又清楚，有咩唔明既有CS專人回答，煩少好多野!
而且我幾鍾意佢個介紹非常詳細清晰~
將果d ABC Plan用圖表闡述得好仔細，好容易我就搵到最適合自己需要既組合
而我出發前收到msg話單板課程不成團，問我要退款定轉去ski course，呢方面我覺得都幾ok的~
3. 來回交通
Klook個plan有得揀早d 7點出發，即係晨光第一線6點就要起身，但大把人甘之如貽早到早享受，真係返工又唔見你咁早起身ok…..
10年前我可能都會咁玩，而家唔得了，訓多一個鐘係一個鐘，8點出發果班車=7點起身已經好想死……
與Klook合作果間旅行社既shuttle bus於弘大和明洞都有上客站
弘大會再早半個鐘出發，明洞既上車地點「新世界」其實已經算係會賢站，由明洞站行過去都要近10分鐘，一d都唔近……
去到會見有好多紅色旅遊巴，向枱面工作人員報到後佢會比個防水袋仔妳，裡面既文件會詳細有哂今次滑雪次行既所有資料~
真係唔sure既可以問工作人員，例如我一上車就訓覺miss哂所有講解 (!?) ，香港人可愛小妹妹導遊竟然唔怕煩同我講多次~ 而且服務態度非常好!
雖然唔知佢叫咩名，但容許我係呢度表揚下佢啦~
4. 入場+物品租借流程
落車後導遊會先簡單講解回程集合地點，指埋冰雪王國點行，之後就帶我地到外國人專用counter辦理換入場券的手續
需時都係5分鐘左右，唔耐~
韓國人買飛counter
原價都唔係特別平，計埋車費真係同報tour差不多
參加滑雪課程既朋友會落去ski school囉滑雪用品，我呢d自由自在既單客就食自己去囉滑雪用具啦~
有別於山形藏王的用品小店一炮過比哂d野妳慢慢攪，Vivaldi呢度用具分為兩部份，呢兩部份都可以係Klook度揀租定唔租的~
首先要攪掂雪褸雪褲、手套和護目鏡~
D職員一睇就知你咩body會比件岩size你ga la，入去fitting room換好衫就得~
不過d衫全部都係黑同灰好鬼悶，我係藏王果件紫黃色醒目好多!
唔係靚唔靚既問題，係萬一有咩意外搵唔搵到你既問題ar!
拍完條滑雪片，個個都同樣顏色碌緊落嚟，我自己都搵唔到自己係邊呀!
今次既滑雪look~ 無特色到我覺得自己係三國無雙d嘍囉
(係日本藏王既滑雪look，板同衫都型10倍law plz)
手套可以揀咩色，因為係送左比你的~
應該話唔係送，係妳比果舊錢包埋!
咁岩我之前對雪地手套防水功能死左又買唔到新，今次fit哂~
至於護目鏡都係職員求其比，最緊要check check會唔會花得太緊要，我就係無為意，隔離美女個鏡花到撞完車一樣
另外佢地都有for眼鏡人士專用鏡，唔使擔心~
平，無牌子，但暖到出汗!
攪掂好上述野就可以去另一邊店，囉頭盔、鞋and 雪板了~
強烈建議大家囉定條頭巾去，果d頭盔一定萬年無洗超勁污槽!
怕凍既用自己既冷帽都得，但滑起上嚟好Q熱因住呀!
鞋就最好比自己原本size大一個碼，仲一定要著扭掣式果種鞋勒到實先得
唔好以為係廢話，因為個職員夠膽死比對古老縛鞋帶式既for我隔離美女，我直情覺得條友係黑心玩野
因為美女問佢時話縛帶係呢個size最後一對，而我囉出去換時就有返扭掣式
可能係我多心啦，韓國一定無歧視女性，韓國世界第一
件衫手袖位呢個裝pass既袋，我目測都係男性衫先有，女既全部都無
Locker都係呢個範圍，1000圜=$6一個細既，大既2000圜，開左就囉唔返，所以記得囉定少量現金and credit card係身呢!
注意係要用兩個500圜coins，有找換機的不用擔心~
找換機
5. 係時候sir落去了
好似我呢類唔熟手既初哥，咁攪一攪埋裝備都要成粒鐘先可以開波~
好啦~ 係時候sir落去了~
Vivaldi設有9條滑雪道，初級中級各兩條，高級3條，好高手1條
無人教過無學過滑雪既我，係藏王玩snowboard雖然已成功唔跌，但隔左差不多一年無玩，為免變雪球都係去最右邊的最初心者滑雪道好d~
呢條係最初心者既滑雪道，同旁邊一比就知有幾唔同~
放心啦我無變雪球~ 因為個場都無咩雪……..
痴線ga 1月尾既韓國竟然乜雪都無，係連我前幾日去到近北韓既郊區都無….. 雪呀我要雪呀!
滑雪場個邊都係勉強有d人造既頂住，薄薄地一層啦，雪質同藏王既輕柔鬆軟差天共地
所以塊地特別硬，我跌底都一定係因為地硬!!!!
不過都係第一滑je，之後除左比個韓仔從後攔截囉黃牌，以及避開不動如山影相既泰仔外，我都無跌過了~
(就咁睇都覺個雪質十足雪櫃)
玩到差不多好似可以挑戰下自己了~ 轉場!!!
第二初級場係人流最多的，充滿著我呢種半桶水又以為好醒既識少少扮代表~
呢d咁危險易瓜既高危運動，無返咁上下唔會話自己夠勁去中級場ga~
第二初級場真係高好多大好多! 滑起嚟爽好多! 靚女又多好多!
起碼都要到呢個位先真正享受到滑雪既樂趣~
雖然我到最尾都仍然係慢慢落葉式飄落去，速度又慢，但已經可以順利話停就停話去就去~
其實都算係必要技能，因為呢邊真係多人到嘔，係貢多拉上真係見唔少人乾炒牛河咁炒埋一碟，成個雪板頭盔離身飛出去既都有……
當然啦如果要向更高處既中級滑雪場進發，睇嚟要練好我既前列腺先得了……
(講滑雪真係唔可以唔講前列腺)
6. 肚餓了!
場內有幾間食肆，大部份都係殺人不見血，一個泡菜飯收妳成舊水港紙左右啦
於是好似細個游完水要食麥當勞，Burger King係度成為大多數人既必然選擇!
兩個人要一個餐+一個包索價一舊水港都好似好貴，但放心啦佢有返外國正常size，唔似香港果d馬卡龍包，食得飽ga!
7. 收皮走人
雖然正式5點先收工，但貢多拉4點半已開始停運，計落滑左5-6個鐘都好夠ga la~
同埋除+還裝備都要d時間~
而我到而家都仲記得更衣室內果陣濕汗臭腳味幾恐怖……
不過此為滑雪人生的必經階段，咪睇下邊個對腳臭d law~~
Anyway啦~
換好衫出去上返shuttle bus，就算想臨時由明洞轉去弘大落車都無問題~
安安穩穩，塞完車就返到首爾啦yeah~
滑雪之旅完成!
今日成個行程真係玩得幾開心，最重要係行程交通上無咩野要自己煩~
反正同自己去使費差不多，有時報下呢d tour都幾好呀~
而我好似好牙擦咁講到自己好似好掂，但其實超多野唔掂，係起碼都要滑多十幾次先可以挑戰下中級場，我今次第3次滑雪ja!
而雪季已完，又要等下年了……
好啦最後係例牌既——-
8. 注意事項
- 場內唔比自攜飲食，水當然無問題，囉打啤酒入去打邊爐就唔係幾好啦
- 想連滑幾日既朋友，可以預約周邊既酒店resort，我見好似有地下街有野買有野食的，而雪具可以鎖係場內，唔使擔心每日要擔一次泥
- 滑雪始終都係高危運動，大家真係要量力以為，同買重保險先好玩呀!
- 強烈建議帶多對乾淨襪去，滑完不論係入雪定係腳汗，總之最後都係濕到浸完水一樣的
========================
請大家Follow我Instagram啦~
=====================================
=====================================
我既Youtube Channel已經開通啦!!!!
快d Click入 「鋒加西亞 / 旅人瘋語」Subscribe 睇片再比個Like禁個鐘仔啦!~
鋒加西亞/旅人瘋語 Youtube Channel
主要影片 ：
- 【泰國】【芭堤雅】誤入邪骨!? 芭堤雅色情行業真相!
- 【歐洲】人有三急在歐洲怎辦? 卑鄙無恥! 歐洲免費廁所全攻略
- 【希臘遊記】絕美海濱! 雨傘雕塑! 寫意的希臘「塞薩洛尼基」一日漫遊!
- 【希臘】型爆海盜船酒吧扮魔盜王！超值60蚊一杯包遊船河！？
白濱系列 :
- 【和歌山】【白浜】白浜七大溫泉評價! 熱到烚腸仔? hea到似街市? 浸哪個好一一盡錄!
- 【和歌山】【白浜】超高性價比溫泉酒店介紹!(上集) 最平最型，兩層複式+望海露天風呂，竟然港幣千零蚊!?
- 【白浜】【和歌山】超高性價比溫泉酒店介紹!(下集) 「白浜館」好味到難以置信的一泊二食︱房內優雅露天溫泉+市中心對正沙灘，勁抵住!
旅行故事系列 :
- 【台北】誤闖台灣三溫暖，內裡竟然係……嚇死人咩！
- 【格魯吉亞】最慘的4小時! 格魯吉亞地獄小巴之旅!
- 【波蘭】在納粹集中營，我竟聽到了……一世難忘的恐怖回憶!
- 【台灣】我在台北拾屍的經驗︱美女強吻? 艷福無邊? 浪漫奇遇? (新片呀!!!!!!!!!)
=================================
相關篇章 :
九州自駕遊系列 ：
《Day0.1 – 日本自駕遊初體驗(上篇)︱初心者租車攻略》
《Day0.2 – 日本自駕遊初體驗(下篇)︱準備清單與第一次自駕心得》
仙台山形系列 ：
京都紅葉系列 ：
《1 – 京都紅葉隧道此生必去︱貴船神社、琉璃光院︱叡山電車紅葉路線介紹》
富士山登山全記錄：
日本溫泉及溫泉旅館介紹：
日本富山、石川、琵琶湖 :
日本和歌山、白浜 ：
東京、大阪、京都：
韓國濟州島 :
《Day2.1 – 東門市場的遺憾︱豬肉湯麵+海鮮飯卷推薦》
《Day2.2 – 龍頭岩海水汗蒸幕︱最強黑毛豬餐廳「石窟黑豚」》
《Day4.1 – 濟州島 9.81PARK 重力賽車公園》
《Day4.2 – 濟州島 Arte Museum 光影饗宴》
《Day4.3 – 濟州島春日咖啡廳BOMNAL︱涯月咖啡街》
================================
Email : funggarcia@gmail.com
www.facebook.com/Garcia.in.Germany
文章同時刊於以下平台，請各位多多支持呀!!!!!!!!!!!!!