文章概要:
出發前的時間預算
開始登山啦!
七合目至八合目
八合目至八合五勺
惡劣山中小屋- 御來光館
1. 出發前的時間預算
開始前講多少少時間管理先~
「吉田線」由五合目至八合五勺的「御來光館」平均上山時間約6小時左右
以夏季天黑時間約19:00計算，即係中午13:00前點都要由五合目出發，計埋休息和行得慢，最好建議11點半左右就應該起行，早到小屋早休息永遠有著數~
再推返前個時間計算，當日既行程應該係咁 :
08:00 河口湖住宿起床
08:45 check out，自行乘車到河口湖駅
09:30 乘河口湖巴士往富士山五合目
10:30 到達五合目，食d野影下相買金剛杖
11:30 前出發
17:30至18:30 到達小屋，食完飯21:00前休息
01:30 起床，02:00前出發 (御來光館計，往下d的小屋請早返半至1小時)
04:00 到達十合目，搵位睇日出
以上係理想既狀態，我上山前都係on schedule，上山後就……..睇大家修為啦………
總之，21/7/2019，日本早上11:25分，我地3父子與姨丈一行4人，上線啦 上山啦!!!!!!!!!
(往五合目的巴士，好乜多人，仲有好多好嘈既某個國家既細路……..)
(五合目既風景其實都唔錯，唔行山都應該上嚟睇下~)
(出發前仲係醒目樣~)
2. 開始登山啦!
開始前，出多次呢張相先~
行富士山，由上山至下山返落嚟約需要24小時，中途會係一早預約好的山中小屋住一晚，book既網址在這裡，或者睇返我上一篇文章《【帶著爸爸行富士山1】路線、小屋及裝備選擇心得》~
行吉田線的第一日，會由富士山五合目出發，一直上到吉田線最高的山中小屋，位於八合五勺的「御來光館」，全程約5-6小時
開始簡單講上山既經過啦~
五合目開始係非常簡單既遠足山路，到六合目比完1000yen登山應援費後就開始Z形之字上山了
略有碎石但路面情況不錯，慢慢行大約個零鐘就會去到七合目，係呢處開始有小屋買野補給、去200yen洗手間及幫金剛杖打個嘜~
到呢度為止都係輕輕鬆鬆鄧梓峰，仲不時有講有笑，應該話係仲笑得出ge……………..
出發啦!!
初段平路零難度~
(見到收你1000yen登山費個位就係六合目了~)
(開始上七合目了~)
(七合目第一間山中小屋「七合目トモエ館」，上一篇文都見過了~)
(搵烙印戰士打個mark大約係200-500yen，有時一間屋會打幾個印的，按自己喜好啦~)
3. 七合目至八合目
七合目開始有d亂石梯极，少部份要手腳並用，但仍未算困難
相比起Z碎石路，呢一段可以話有趣得多了~ 起碼真係似行山!
而且七合目已經係2700m於浮雲之上，在雲外看也是新生趣~
4. 八合目至八合五勺
儘管「吉田線」五合目至八合目的路並不算太難行，但所需時間其實頗長
之字斜路無錯係比上樓梯輕鬆，但變相上升速度極慢，步行距離亦變長了幾倍，無形中仲花多左時間同體力 兼且2700m以上
空氣漸薄，我同阿哥兩個30幾歲都頂得住，但近70既阿爸及同行已過65既姨丈已有疲態
行下抖下，終於我地約下晝4點半先到達3020m的八合目「太子館」，當時阿爸已經攰到唔太出到聲了
行多廿分鐘到蓬萊館，見到開始有人宣佈「今日收皮」入館休息，但我地仲有漫漫長路……當然啦佢地今晚上山時要還的~
之不過兩位老人家都已經無乜力了，水同備用麵包已耗盡
鬼咩…… 已經5個幾鐘不停上斜，原本計劃呢個時間已快到御來光館，點知只係到八合目初段…….
唔理!
「蓬萊館」有杯麵!!!!!! 正呀!!!!!!!!!!
(後面個台灣女生聞到我地3個杯麵後，二話不說—買麵~)
食完感覺full power又繼續上了~
Hey都上到八合目了，八合五勺還會遠嗎?~
少年你太天真了
八合目3020m，八合五勺3450m，但係呢個高度仍然係無限之字形地獄……….
等於由中環街市行上Soho係囉命，但你寧願一條直線爆上去快手攪掂，定係來回10次威靈頓街擺花街咁Z形上去?
我地沿路經過一間又一間小屋，身邊同行既人越來越少，疲倦感就越來越強……..
到後來阿爸直情腳步飄浮，一句說話都講唔到，行一個Z就要休息……
儘管明白抗癌藥物對佢身體造成巨大損害，但估唔到一向既行山健將都會變成咁……
最後，由八合目開始我地用左3個小時，晚上7點20分天全黑前，終於到達八合五勺暨吉田線最高的山中小屋「御來光館」!
第一日既上山時間係由11:25 – 19:20，整整8個鐘頭
而且，我地仲未係最後一組到達小屋既人，甚至唔止一個團體上唔到嚟tim……
仲有200m ja!!!!
去到門口，真係岩岩好天黑!
5. 惡劣山中小屋- 御來光館
行山前輩話全日本最差既山中小屋全部係哂富士山，而「御來光館」更加係當中既星中之星!
今日一試，果然名乎其實!
集中營式住宿、狗糧一樣的rubbish food已是意料之中!
但未食完就想收你盒飯 ; 唔出聲就扔塊床舖落阿爸身上 ;
未夠official hour 9點就熄哂所有燈 ; 百幾人廁所得一格放大一格放小 ;
寢具有沙有虱 ; 明明有空位卻夾硬迫你地一張被孖舖 ; 張被係細正方形蓋到膊就蓋唔到腳，仲要員工野野黑你面……
係遠方東洋的富士山上竟有香港澳牛式服務，真係大開眼戒!
不過咁又點呀?
行左一整日後，個個都無力氣嚟同佢地計較啦……只想快d食完野快d訓休息夠一陣攻頂，呢間係最近山頂既小屋所以可以訓晏d…………
一間出名垃圾但預約客仍蜂擁而至，純粹用地理位置取勝而賺到盤滿砵滿既民宿，都真係有d佩服!
Btw如果唔想食佢d狗飯，book住宿時可以選擇素泊，自己再帶麵包等野食上去，又或者店內都有即煮既拉麵和關東煮，800yen一份，味道好過晚餐果舊定食呢
狗飯，無誤!
(一到步又餓又凍，老虎蟹都叫碗麵頂住先啦! )
訓得非常唔舒服兼訓下醒下既情況下，我被屋外不時響起的吸氧氣瓶聲嘈醒
已是凌晨1點半了，御來光館外已坐滿包住保暖錫紙 or 臉如死灰or 兩者兼備既登山客……
Um原來我頭先上到嚟個look係咁既樣ge……
向山下望望，一條發光的貪食蛇劃破完全漆黑的山腰，Z型緩緩向上走，原來山下小屋的人群早已出發向山頂進軍，如果要避開排隊上山的人龍就必須盡快起行
不過回望髮已花白，仍在熟睡既老父，心裡百感交雜
又想佢訓耐d休息多d無咁辛苦，但係富士山頂睇日出正係今次行程既最重要目的，亦係佢心願之一，而家唔叫佢起身就有機會趕唔切……
最後 ——- 都唔知好事定唔好事，澳牛既員工完全不理眾人死活，開燈監粗收被舖………..
終於，凌晨2點15分，我地離開呢間史上最差既山中旅館，向此行既目的地富士山頂進軍了!
=================================
相關文章 :
帶著爸爸行富士山 :
東京雜記系列:
====================================
請大家Follow我Instagram啦~
=====================================
我既Youtube Channel已經開通啦!!!!
快d Click入 「鋒加西亞 / 旅人瘋語」Subscribe 睇片再比個Like禁個鐘仔啦!~
鋒加西亞/旅人瘋語 Youtube Channel
主要影片 ：
白濱系列 :
- 【和歌山】【白浜】白浜七大溫泉評價! 熱到烚腸仔? hea到似街市? 浸哪個好一一盡錄!
- 【和歌山】【白浜】超高性價比溫泉酒店介紹!(上集) 最平最型，兩層複式+望海露天風呂，竟然港幣千零蚊!?
- 【白浜】【和歌山】超高性價比溫泉酒店介紹!(下集) 「白浜館」好味到難以置信的一泊二食︱房內優雅露天溫泉+市中心對正沙灘，勁抵住!
旅行故事系列 :
=================================
Email : funggarcia@gmail.com
文章同時刊於以下平台，請各位多多支持呀!!!!!!!!!!!!!