但我覺得租車可以話係自駕遊裡最簡單既部份，一大堆前期預備工夫先煩死人!
所以今次就整左個出發前準備清單，將所有我認為必須要出發前攪掂哂先既事和物資show哂出嚟，仲寫左少少呢次和家人成功第一次自駕遊既少少心聲tim~
阿蘇火山草千里之濱，成個旅程最鍾意呢張相~
========================
請大家Follow我Instagram啦~
=====================================
文章概要 :
-
出發前準備事項
-
出發前需購買的物品
-
高速公路中途站
-
第一次自駕心得
-
注意事項
1. 出發前準備事項
你估book完車就攪掂咩~ 自駕前大把事前預備工夫呀!
A. 練車!
首先如果你同我一樣個車牌扔左係雪櫃冰封多年既，唔該立即同我去補返357個鐘!!!!!
Carousell有唔少補鐘師傅，我搵果個後生仔有heart細心足鐘教得好收得平~
我個牌雪左8年，補左8個鐘，去到日本竟然無撞死人就知佢堅啦~
唔特別賣廣告了，有需要就PM我啦~
當然啦，有邊個死士朋友肯借架車你練都得ge~
呢d唔怕愛車變廢鐵既人絕對係真朋友，要好好珍惜呀!
有需要可以DM我，我個師傅真心幾好~
B. Save目的地
資料搜集時，不論係餐廳定景點，只要係將會去既地點都用「儲存」功能save哂係google map，我自己會加簡單幾句注釋tim
呢個係方便你用手機做GPS時可以快速訂立路線~ 當set車內內置GPS時，可以快手搵到地點的電話作輸入~
而且可以的話，我會建議搵埋目標地點附近有咩停車場，同一地點停車場收費可以完全唔同的，當然啦平既好易full~
3.39係指Tabelog既分數~ (但呢間最終無機會食到)
(可以係google地圖地點的圖片功能睇到唔同停車場既價格)
(可以係google地圖地點的圖片功能睇到唔同停車場既價格)
(呢個停車場同上面果個只係1分鐘步行距離，但價錢差左3倍)
C. SD卡 + USB燒定歌
你唔會知車內音響有咩device揀，最好SD卡and USB各一萬無一失。
聽歌係for你渣車時焚機唔好訓著，揀歌除左全部要係自己最愛外，最好要幾Rock有幾Rock!
我唔會理阿媽鍾意聽帝女花ga，總之我半隻碟都係聖飢魔II同Sex Machineguns! 全部都係我最鍾意既名曲!
「唔係wor我最鍾意聽慈航大悲咒wor!」
你渣渣下訓著左既就唔荒唔悲啦……
日本Band壇公認永遠最強既Heavy metal組合!
換member密過換女既日本00年代Punk Rock代表，歌詞與MV真係熱血得嚟大爆笑!
https://youtu.be/lRV2aoQ–94?si=UTyvAIox9NNKRMRV
https://www.youtube.com/watch?v=JmzVfDZofHU
(以防大家唔知道聖飢魔同Sex Machineguns係咩嚟，放埋佢地兩隊band其中一個最出名既MV出嚟先~)
(識唱既就一齊唱啦~)
D. 國際牌
而家運輸署終於有網上申請唔使去長沙灣排隊，易攪好多! https://www.gov.hk/tc/residents/transport/drivinglicense/osintldrivingpermit.htm
E. 上youtube睇交通規則
著名Youtube Channel Minato TV講得幾清楚詳細，睇哂佢果3-4條片應該都差不多。
https://www.youtube.com/watch?v=6tri73YVOMg
2. 出發前需購買的物品
A. 保險
登記渣車果個要買最高規格既保險，仲要睇清楚自駕範圍內的保障範圍。
另外去到店舖租車時會問妳買邊種保險，唔好理，一定一定要買最勁最貴，有埋「NOC」果隻!
Touchwood有咩事架車就算炒到變型金剛咁都唔使賠~
反光果面唔使睇，認住右邊有寫住EOC support就得啦~
B. 點火器叉電
你部電話全程做著mon做GPS一定heavy duty，有呢個車內叉電器絕對非常有用!
我friend話100yen店有得賣，但我去果間Daiso得下圖呢個500yen ge……
算啦佢的確叉得好快ge
C. 車內手機夾
一般日本租車都唔會比埋你，可以係100yen店買，但由於一落機已經要囉車，我建議都係去深水埗幾廿蚊買返個好d。
我果個係夾冷氣風口葉的，個人覺得好過吸盤式好多~
車用手機夾，深水埗特賣場買ge~
D. ETC card預約
ETC卡即係入高速公路易通行，有佢出入高速公路就唔使停車比散紙~
不過唔使停車既意思係要於閘口行時速20km比佢感應到先開閘放人，變左我要衝線既話救妳唔到呀!
ETC card必需事先向租車公司預約(租ETC 卡要比錢的)，如果經Klook的話可以拜託CS幫忙的好方便~
E. 初心者P牌
如果係老司機就唔使P牌ge (老司機好似唔係咁意思wor!?)，但各位雪藏牌與假日車神都係貼返個比較好~
100yen店有得買，租車公司都有機會免費借比你~
再唔放心ge，聽Youtuber講貼埋老人駕駛牌，包保無人夠膽接近你!
我仲見過有車貼寫住「外國人駕駛中」都係正~
攪笑既係車尾箱門既金屬無磁力，P牌要貼旁邊
F. 盒裝紙巾
呢個又唔係必須ge，但有一盒係度的確方便好多，特別係我呢d嚴重鼻敏感人，渣緊車流鼻水點算!
又唔一定要香港買過去，日本7-11都係100yen一盒je~
3. 高速公路中途站
當我google set行程時，白痴既我仲諗 ——
「wa由福岡駕車去由布院差不多成兩粒鐘，高度集中精神坐兩粒鐘咪會生痔瘡law!」
再問fd同資料搜集下，先知道日本既道路配套非常完善，高速公路大約平均每20km就有一個小型休息站，60km一個大型休息站(道之驛)~
大既道之驛會有餐廳有廁所有本地土產，十足小型超市，d食物味道仲唔太差tim!
往由布院途中的大型道之驛
由於近《進擊的巨人》作者諫山創的故鄉日田市，所以勁多相關產品~
呢個洗頭水既marketing真係一流~
味噌吉列雞胸飯+蛋，好味!
就算係山路，都有不少停泊區比你鬆一鬆抖抖氣~
特別既係呢d驛站多數座落既地點風景都勁靚~ 由布岳果個觀台我甚至正到我覺得係必到景點!
但個站有無洗手間比你放低多餘水份就睇運氣了~
由布岳觀景台 – 狹霧台
由布岳觀景台 – 狹霧台
阿蘇火山附近的道之驛，風景一絕但無洗手間
阿蘇火山附近的道之驛，風景一絕但無洗手間
阿蘇市內的道之驛
阿蘇火山草千里之浜，呢個其實似觀景台多d~
然而要預先plan定停邊個道之驛就有d難度了
因為除非你好熟條路，又或該道之驛非常大好易搵到 (e.g. 黑川溫泉前瀨之本高原的「瀬の本レストハウス」)，否則google map並不會顯示你行車路線上全部中途休息站
而且手機app版google map仲衰多兩錢重，根本就沒有搜尋休息站的功能，你無理由係冷氣葉夾部laptop係度ga?
(福岡至由布院google只顯示到2個唔多有關既休息站，但我實測後沿途超級多~)
瀨之本高原，九州橫斷巴士必定停泊的休息站，有間溫泉酒店見到其他Blogger去過超靚~
不過唔使驚~
私家車內置的本地GPS，會係行車時非常清楚咁show哂嚟緊會有幾多個休息站，你仲有幾多km會到，該休息站有無洗手間食肆加油站紅燈區等等~
你就可以因應當時既需要嚟選擇了~
係highway時手機做緊GPS影唔到相呀~ 得呢張~
4. 我的第一次自駕心得
不能不承認，當決定今次Family Trip係自駕遊時，我同阿哥真係驚到腳震ga!
因為渣車，就代表父母條命係我地手上
我地兩兄弟都係大雪藏牌，就算出發前各自補左8個鐘，再係香港租左兩日車嚟練習，但以我唔記得放hand break就扭呔比油既高超技術，你話無壓力就假ge!
(兩兄弟一上車就研究左架車15分鐘—— 喂個Hand break係邊呀~XD)
不過就好似日本熱血漫畫話齋，一個人做唔到既事就兩個人啦
阿哥手車比我好，而我就導航指示較好，兩人盡量互相補位，高速公路有中途站就休息，渣到覺得有少少攰就換人
總之老虎蟹都渣慢d，遲到好過無到，人無事先做到世界冠軍ga嗎! 後面車龍紅隧出到公主道咁長都成盤係血當佢無事~
日本司機有禮得多，佢覺得你太慢既會過右則車道過係頭ga la~ 點都好過我係九龍城慢少少都比人呠到拆天~
再加上我父母非常醒目唔會係後面意見多多，種種因素累積起來，令到我今次既第一次自駕遊非常順利，開心又滿足咁完成~
(我手機長期做GPS，到還車前先有得幫阿哥影張渣車相~)
但都唔係無蝦碌野ga!
阿哥係九重山區就突然失神打橫衝左去隔離對頭線 ; 而我就泊車時差d隊冧左hostel個招牌 ; 我地又試過係福岡使左入巴士專線，望住GPS卻瘋狂行錯路等等……
不過有時行錯路都會有意想不到既收鑊~ 分分鐘能遇上意料之外既趣事~
九重夢大吊橋
(我明明要去入口，GPS 卻定位左去九重夢大吊橋對面出口既觀景台…… 不過呢個角度都幾好~)
(都唔知miss過幾多次高速公路入口~)
但對我嚟講既最大難題，始終都係日本道路太窄，我架車又太大!
輕輕扭少少都會過左隔離線，特別高速公路時，我超驚比d行緊百二既格蘭彼治從後磨你薑!
所以要長期打醒12分精神，而我做副駕時就要幫忙睇清楚各種路面情況、指示牌、GPS等等，一樣超級focus無得訓!
「200米後轉右~」
「有單車過緊綠燈!」
「太貼我果邊啦!」
「小心甩尾呀!」
可能因為咁壓力大，係車上又要全集中無得休息，加上不停又凍又熱，終於我係玩尾二果日完成哂所有plan好ge既定行程後立即大病一場!
返到香港後再病多一星期，Covid時都無咁辛苦呀!
(今次病應該係我近4年來最甘既一次……)
(尾二果日病到癲左)
同埋渣車有另一樣不方便 ——– 唔可以飲酒呀!!!!!!!!
我就話因為減肥儘量飲少d，但食烤肉要飲烏龍茶真係好sad呀!!!!
所以就算有車但揀住宿時係返市中心都有好處ga，食飯唔使行太遠，停好車今晚唔再渣可以開懷暢飲~
得我一個飲烏龍茶好慘……..
係日本真係唔可以唔食炭火烤肉!
講真呀渣車真係好好玩~
既然係香港無能力亦無需要養車，去外國渣一渣過下癮都開心呀~(當然出發前練多兩野plz)
父母旅程初期都病左訓得唔好，但都因為可以係車度休息唔使舟車勞頓，先可以快速復元
可以話，如果無左呢架車，今次既行程父母根本唔會咁開心咁滿足~
只要兩老開心，真係幾辛苦都無問題~
阿蘇火山下~
糸島夫婦岩~
高千穗峽
阿蘇火山草千里之濱，成個旅程最鍾意呢張相~
阿蘇火山口~
最後係，史無前例咁多又咁長既注意事項~
5. 注意事項
A. Google Map既預計行車時間係比實際需時為短。
我估計係因為佢只係計算地理距離後，按該路段的最高行車時速限制嚟估算，忽略左現實係就算用埋坑渠都唔可能120km入個髮夾彎。
以新手嚟講，將時間加多25%左右應該差不多了。當然仲未計中途休息既時間啦~
我返香港後有人同我講佢plan 1日內由福岡去到天草雲仙再打橫片過高千穗峽……
祝佢好運啦~
(咁plan既話，渣雷神全程Zero領域300 km/h的確係1個鐘多d攪掂ge……)
B. 可以的話一定要有副司機，等渣到攰時可以抖下。
就算係江湖經驗豐富的老司機，都一定要人導航睇路，坐副駕果個唔訓得ga!
渣車果個一定要早訓，有得休息就休息，覺得攰就換人or自隊咖啡。而我多數經過大型中途站都會入去停一停，落車鬆一鬆5分鐘都差好遠ga啦!
由阿蘇回程，近鳥栖的道之驛，距離福岡已less than 40分鐘，但都係抖抖好d~
C. 記得記得日本渣車路口轉右係有對頭車衝過嚟!
一定要停低讓哂先好行!
仲有交通燈綠燈都有行人過班馬線，要讓ga! (詳情大家睇返相關既日本交通規則plz~)
D. 注意日本高速公路的最右方車道係超車道
所以基本上最右線個個都係舒麥加，想安全d慢慢渣就stay係左邊啦
E. Google GPS與車內置本地GPS有時會有矛盾衝突
當兩個GPS話轉左轉右不同時，我多數都係相信本地個GPS，但有時都有伏的。
Google Map既實時路況都幾準確，但有時會叫左你去行唔應該行既小路，例如由布院時我差d成架車跌落橋，於福岡志賀島更係帶左我地渣上行人郊遊徑，窄到差d調唔到頭返落去……
你睇….. 架車仲闊過條路…..
F. 轉錯彎係一定的! 行錯路係必然的!
對GPS果d咩50m後轉左15cm轉彎行無概念係正常ge! 唔緊要，唔使嬲唔使燥，地球圓ga ma，最多兜過大西洋返返嚟ga je~
G. Even同一條街既停車場價格可以好大差別
有時間既可以google map search定，又或睇多一兩個先決定泊邊。
而且要注意該泊位以自己的技術是否泊到，唔得既唔好夾硬嚟。當然啦，如果住宿地點有自家泊車位係最好的~
頭一兩日睇，真係完全唔知咩嚟…….
由布院apartment既私家車位，原來成個Trip既住宿車位相只影左呢度
H. 唔好飲酒! 唔好酒後駕駛!
I. 如果對自己高要求ge，渣車時可以放杯水係度，一滴都唔可以瀉
下篇開始正式九州自駕遊記啦!
今次會係超長篇，唔知會唔會又寫足一年呢……..
要靠一靠大家係IG or 直接DM鞭策下我了!!
========================
請大家Follow我Instagram啦~
=====================================
=====================================
我既Youtube Channel已經開通啦!!!!
快d Click入 「鋒加西亞 / 旅人瘋語」Subscribe 睇片再比個Like禁個鐘仔啦!~
鋒加西亞/旅人瘋語 Youtube Channel
主要影片 ：
- 【泰國】【芭堤雅】誤入邪骨!? 芭堤雅色情行業真相!
- 【歐洲】人有三急在歐洲怎辦? 卑鄙無恥! 歐洲免費廁所全攻略
- 【希臘遊記】絕美海濱! 雨傘雕塑! 寫意的希臘「塞薩洛尼基」一日漫遊!
- 【希臘】型爆海盜船酒吧扮魔盜王！超值60蚊一杯包遊船河！？
白濱系列 :
- 【和歌山】【白浜】白浜七大溫泉評價! 熱到烚腸仔? hea到似街市? 浸哪個好一一盡錄!
- 【和歌山】【白浜】超高性價比溫泉酒店介紹!(上集) 最平最型，兩層複式+望海露天風呂，竟然港幣千零蚊!?
- 【白浜】【和歌山】超高性價比溫泉酒店介紹!(下集) 「白浜館」好味到難以置信的一泊二食︱房內優雅露天溫泉+市中心對正沙灘，勁抵住!
旅行故事系列 :
- 【台北】誤闖台灣三溫暖，內裡竟然係……嚇死人咩！
- 【格魯吉亞】最慘的4小時! 格魯吉亞地獄小巴之旅!
- 【波蘭】在納粹集中營，我竟聽到了……一世難忘的恐怖回憶!
- 【台灣】我在台北拾屍的經驗︱美女強吻? 艷福無邊? 浪漫奇遇? (新片呀!!!!!!!!!)
=================================
相關篇章 :
-
九州自駕遊系列 ：
《Day0.1 – 日本自駕遊初體驗(上篇)︱初心者租車攻略》
-
仙台山形系列 ：
-
京都紅葉系列 ：
《1 – 京都紅葉隧道此生必去︱貴船神社、琉璃光院︱叡山電車紅葉路線介紹》
-
富士山登山全記錄：
-
日本溫泉及溫泉旅館介紹：
-
日本富山、石川、琵琶湖 :
-
日本和歌山、白浜 ：
-
東京、大阪、京都：
-
韓國濟州島 :
《Day2.1 – 東門市場的遺憾︱豬肉湯麵+海鮮飯卷推薦》
《Day2.2 – 龍頭岩海水汗蒸幕︱最強黑毛豬餐廳「石窟黑豚」》
《Day4.1 – 濟州島 9.81PARK 重力賽車公園》
《Day4.2 – 濟州島 Arte Museum 光影饗宴》
《Day4.3 – 濟州島春日咖啡廳BOMNAL︱涯月咖啡街》
================================
-
Email : funggarcia@gmail.com
-
www.facebook.com/Garcia.in.Germany
文章同時刊於以下平台，請各位多多支持呀!!!!!!!!!!!!!