漢拿山登山係我今次濟州島之旅既重點行程!
自疫情前富士山攻頂後，一直都對外國行山念念不忘~
今次重回旅遊Blogger既「正職」(返工呢d副業嚟供我去旅行ga je)，就以佢嚟打響頭炮啦!
廢話少講，正式入題啦~
=======================================
請大家Follow我Instagram啦~
=====================================
文章概要 :
漢拿山簡介
路線介紹
所需物資
御里牧路線起點
囉命天梯
高原步道
威勢岳避難所
風景超靚的靈室登山路線?
落山，再落山?
１. 漢拿山簡介
漢拿山，原名「漢拏山」，但唔知點解幾乎所有中文blogger都以漢拿山稱呼佢，咁我跟大隊啦～
漢拏山是聳立於濟州島中央的睡火山，與金剛山、智異山並稱為韓國的三神山，同時是南韓最高山峰。雖是最高，但只有1950m，比起日本富士山五合目起步點更矮
不過都因為咁，可以唔使擔心高原反應，亦唔會行太耐需要山上過夜，當係香港行山就ok了~
維基資料 ： https://zh.wikipedia.org/zh-tw/%E6%BC%A2%E6%8B%8F%E5%B1%B1
+++++++++++++++++++++++++
相關文章 :
【韓國雜記系列】https://travelblog-fung-garcia.com/category/asia-2/korea/
【富士山攻頂】《【帶著爸爸行富士山】 – 系列》
+++++++++++++++++++++++++
2. 路線介紹
漢拿山的登山路線現在有4條，分別為 :
- 城板岳探訪路
- 觀音寺探訪路
- 御里牧探訪路
- 靈室探訪路
當中只頭兩條，即「城板岳」和「觀音寺」路線可以到達1950m的山頂，欣賞火山口湖「白鹿潭」
另外兩條，即「御里牧」和「靈室」路線最高只能到達1700m的「威勢岳避難所」
漢拿山登山路線
所以想登山，第一件事要諗既就係「攻唔攻頂」!
「你都傻既阿鋒~ 行得山點會唔攻頂ar?」
無錯我都係咁諗，亦有自信與體力可完成，但係你既同行伙伴係咪真係得先?
攻頂路線中以「城板岳」較易，普遍都話初心者都攪得掂，但來回近20公里，快極都要8小時才能完成
中段更有check point到達時間限制，12-1300前未到達「杜鵑花田避難所」的人會被踢返落山 (因應月份調整)
如果大家平時只係行開Landmark Time Square既可以返屋企先啦
漢拿山登山路線時間
至於剩下既「御里牧」和「靈室」路線雖然攻唔到頂，但普遍被認為係「易行+靚景的優質健行路線」
即係香港阿伯晨運行維園，濟州阿伯晨運就行漢拿山~
咁我又講得太hea ge~ 聽聞時節岩的話，沿路紅葉滿山，百花盛放，咁似乎都值得一遊呀!
於是我選擇，由「御里牧」上山，至最高點「威勢岳避難所」後沿「靈室」路線落山，全長6.8km + 5.8km = 12.6km，約5-6小時完成
呢條係最多韓國人行，最common的路線，亦有部份朋友會選擇逆行
小弟實測後，覺得兩條路線既難度真係差不多，只係「御里牧」上樓梯時樹蔭較多較涼爽，但「靈室」落山後仲要行多一大段路，各有利弊 所以，大家自己決定啦~
御里牧路線圖
3. 所需物資
漢拿山雖然最高都只得1950m，但點都高過鳳凰山ga! 你試下短袖衫上鳳凰山頂變唔變雪條~
所以風褸係必須的，其他禦寒衣物就自己決定啦~
另外落山段梯級極多，最好有返支行山杖傍一傍
其他防曬、太陽眼鏡、行山鞋等基本功啦~
最最重要都係「御里牧」及「靈室」路線均完全沒有補給!!!!
即係話要帶備足夠6小時以上行程的水和食物! 以防萬一朱古力同鹽糖最好都帶少少
而最amazing都係見勁多韓國人帶埋熱水上山沖杯麵……..
佢地對公仔麵既執念竟強烈如斯……….孭咁大個暖壺上嚟唔重ga咩………..
4. 御里牧路線起點
講左咁耐，正式開始啦~
當日為左趕09:10果班車，朝早7點=香港6點鐘就要起身仲早過返工，食埋個早餐(行山前一定要!) 再係7-11買定要糧草就起行了
要去御里牧路線起點，最方便係於濟州島巴士總站坐240巴士，約50至1.5小時一班車好很疏，約40分鐘後便可到達「御里牧入口Eorimok」
落車後斜路上山，唔使驚行錯路，係要行成廿分鐘行到懷疑人生先到個入口ga
去到主入口記得去左洗手間先，之後全程要唔該借借ga
呢條路上
(上山前記得去個洗手間先，沿路都無toilet ga)
5. 囉命天梯
韓國時間10:25，正式上山啦~
路程一開始會係一段平緩小路，有小橋無流水比你影相~
差d以為行緊地門水塘咁輕鬆~
你就想啦!
過左小橋立即係一條長長既樓梯石級，一啖砂糖一啖shit，岩岩既輕鬆係要還ga，上啦!
當我以為啖砂糖嚟緊時……行呀行……上呀上……. 喂點解d石級上極都未完ge????
無錯! 御里牧路線既開段就係一條長1.9公里，一路直上的囉命石級天梯!
就算你幾fit都好，行粒幾鐘樓梯都好難唔氣喘如牛掛……..
沿途見每個登山者都係行到喪屍咁樣，不停詛咒邊條粉腸唔起架「車立」係度!
唯一好彩既係全程大樹好遮陰，行起來清爽涼快，陽光穿過葉林令景色倍添優美~
不過你見過喪屍會睇風景咩?
6. 高原步道
行左粒幾鐘樓梯，突然前方一片開揚，兩旁大樹消失，轉為一片金黃色芒草田~
wooooooo到啦!!!!!
痴線到乜鬼仲有排呀，不過行完最地獄果段又真ge~
來到此「鳥接岳」後，往後的山路幾乎再無一級樓梯，全是平緩的上斜岩石路，或修葺整齊木棧道
大家可以放鬆心情，慢慢散步享受下高原美景~
「萬歲小山」觀景台，此處係御里牧路線最佳俯瞰濟州島全景既地方~
如果唔怕凍既話可以係度留耐d影下相休息下~
但我覺得好x凍呀，影完快x d走呀!
離開觀景台後一直都是木棧道，慢慢行影下相，心情幾乎已經由行山變成郊遊，因為條路真係好好行!
不過天空會突然由藍天白雲變成漫天烏雲，誇張到係set機 3秒自拍 —- 禁掣係晴、出嚟變黑，變化速度之快應該只有女朋友塊面先比得上
3秒前~
3秒後~
7. 威勢岳避難所
話就話純暗斜易行，不過路程其實都頗長下，再加上影相擺pose太多
終於係韓國時間13:31，我成功到達御里牧路線的終點，海拔1700m高的「威勢岳避難所」了!
可惜既係此時濃霧已縈繞四周，矇查查乜風景都睇唔到!
更可惜既係咁岩呢度做緊工程，嘈過星期六朝早樓上裝修，實在大煞風景!
無辦法啦，求其搵個位坐低食午餐啦~
點解天寒地凍我要買個凍冰冰既飯卷嚟食呢………
d阿朱媽個杯麵出緊煙好似好好味咁ar……..
威勢岳唯一影相位，應該算係有舊石寫住韓文又有個1700m~
一般我地都當係呢條路既山頂位ga啦，影張相先走啦~
御里牧最高點唯一影相位~
8. 風景超靚的靈室路線?
係時候落山啦~
離開威勢岳避難所一共有3條路，御里牧即係你上嚟果條，石碑右方直行、看台座位後係靈室，另外仲有條前往「南璧分歧點」的路係封左的
大部份Blogger都話靈室落山的風景靚到絕，好呀睇過~
現實既靈室路線……..
wa係wor~~~~~ 真係好靚wor~~~~
大霧到唔好話風景呀，連三上悠亞係你面前都見佢唔到呀!
山上天氣變幻莫測乃老生常談，但都唔好誇張到咁呀，我想睇風景呀!!!!
(網上圖片，靈室路線幾鬼靚~)
(好似會睇到呢個風景wor~~~~)
於是在重霧深鎖之下，只能專注於眼前既落山梯級，一步一步慢慢落
唔係講笑，真係大霧到幾乎睇唔到路，要靠左右的黃色油漆記號先認到
唔知係落得慢定對腳太攰，我有種感覺好似靈室路線d樓梯多d咁，落極都唔完……
最後用左近兩小時，於韓國時間15:57正式離開靈室路線，完成啦!!!!!
靈室路線終點
9. 落山，再落山?
但完成，就唔代表完結
靈室路線最有名的除左風景靚外，就係落山後仲要行多45分鐘再落山先有巴士站呀!!!!!
大佬呀唔好咁痴線啦，唔係行唔到，而係度氣洩左呀
你試下同跑渣馬d人講「wa跑完哂好叻呀! 不過我地無巴士，你自己行返屋企啦~」睇下比唔比人劈!
如同上回所講，係可以call的士，但首先你要註冊到Kakao Taxi，或遇上願意幫你的友善韓國人
我無，仲要去完洗手間望下錶，16:35有巴士，即係我要係30分鐘內衝落山，如果唔係下班車起碼5點半後
咁唔通唔衝咩，碌都要啦……. 運起剩餘既腳力，震住震住用最快速度大步大步行落山…..
於是我人生中第一次咁希望有個盾牌係身，咁我就可以學林克玩踩盾滑行了
無盡斜路
我不知幾想玩踩盾滑行……
一邊落斜一邊諗起Walter Mitty……
最後我落到山腳既時間係16:38，遲左3分鐘，以韓國有早無遲既習慣嚟講，得啦我可以搵地方發呆一個鐘了
行前多兩步——-wei等等先，架車仲係度ge?????
於是谷埋最後僅餘既奶力，老土勵志戲咁一拐一拐全力衝埋佢………..
終於上到車啦!
睇返原來因為等車離開既登山客太多，個個又要搵返個口罩出嚟攪到上車速度極慢先delay
點都好啦，終於真正完成哂今次既漢拿山登山之旅了!
計一計數，純計登山時間，連休息影相等大約用左5.5小時，再計埋前往及離開登山點既路，總共約6.5小時
話長唔長話短唔短，路程唔算辛苦，但行完真係會攰，若好似小弟咁中完招體力真係弱左既更要小心d唔好太輕視
慢慢行，總會行得到的~
至於抵唔抵行，我覺得條路性價比係高ge~
最主要係對體能既需求唔大，但又有靚風景和「行完韓國第一高峰」呢個成就感嗎~
希望有機會再嚟濟州島時，可以真正征服呢座漢拿山啦! (但諗起果19公里就有d想縮……..)
同場加映山後飯 —— 超平超正醬油蟹!!!
「旌善奶奶山薊菜飯정선할매-곤드레밥」，KRW20000~$110一隻又平又好味，個山薊菜飯更係精髓所在!
詳情睇我IG post please~ https://www.instagram.com/p/ClBfYwvvCp8/
漢拿山資料 ：
- 韓國旅遊繁中資料網 : https://big5chinese.visitkorea.or.kr/cht/ATT/3_2_view.jsp?cid=332852
- 漢拿山官方網頁 : http://www.jeju.go.kr/hallasan/index.htm
=======================================
請大家Follow我Instagram啦~
=====================================
我既Youtube Channel已經開通啦!!!!
快d Click入 「鋒加西亞 / 旅人瘋語」Subscribe 睇片再比個Like禁個鐘仔啦!~
鋒加西亞/旅人瘋語 Youtube Channel
主要影片 ：
- 【泰國】【芭堤雅】誤入邪骨!? 芭堤雅色情行業真相!
- 【歐洲】人有三急在歐洲怎辦? 卑鄙無恥! 歐洲免費廁所全攻略
- 【希臘遊記】絕美海濱! 雨傘雕塑! 寫意的希臘「塞薩洛尼基」一日漫遊!
- 【希臘】型爆海盜船酒吧扮魔盜王！超值60蚊一杯包遊船河！？
白濱系列 :
- 【和歌山】【白浜】白浜七大溫泉評價! 熱到烚腸仔? hea到似街市? 浸哪個好一一盡錄!
- 【和歌山】【白浜】超高性價比溫泉酒店介紹!(上集) 最平最型，兩層複式+望海露天風呂，竟然港幣千零蚊!?
- 【白浜】【和歌山】超高性價比溫泉酒店介紹!(下集) 「白浜館」好味到難以置信的一泊二食︱房內優雅露天溫泉+市中心對正沙灘，勁抵住!
旅行故事系列 :
- 【台北】誤闖台灣三溫暖，內裡竟然係……嚇死人咩！
- 【格魯吉亞】最慘的4小時! 格魯吉亞地獄小巴之旅!
- 【波蘭】在納粹集中營，我竟聽到了……一世難忘的恐怖回憶!
- 【台灣】我在台北拾屍的經驗︱美女強吻? 艷福無邊? 浪漫奇遇? (新片呀!!!!!!!!!)
=================================
- 相關篇章 :
富山、石川、琵琶湖 :
和歌山、白浜 ：
東京雜記 ：
日本美食系列 ：
京都紅葉系列 ：
《1 – 京都紅葉隧道此生必去︱貴船神社、琉璃光院︱叡山電車紅葉路線介紹》
================================
Email : funggarcia@gmail.com
www.facebook.com/Garcia.in.Germany
文章同時刊於以下平台，請各位多多支持呀!!!!!!!!!!!!!