話咁快行山季節已過，一到夏天，就係水上活動既季節啦!
需知道船P唔係個個去到，好似我咁無錢無fd無六舊腹肌既，真係算吧啦六師弟
但唔緊要~ 由上年開始大熱既獨木舟相信今年都會有一定市場~
未玩過、心思思想試、但又有d驚? 唔緊要!~ 我都係過來人~
凡事都有第一次，如果想玩獨木舟又唔知點入手好，就睇下呢篇「西貢獨木舟初心者路線」文章幫唔幫唔到妳~
=====================================
開始之前，請大家Follow我Instagram啦~ Thank you!
=====================================
文章概要:
事前裝備
一人艇 vs 二人艇，點揀好?
預約獨木舟
前往交通
海中小石灘+羊洲
白沙洲
大鏟洲堤圍
回程
注意事項
1. 事前裝備
好多人會忽略左呢部份，其實玩獨木舟都幾多出發前的野要預備~
- 學識游水! —- 廢話!但都認真講句，唔係話要你游到方力申咁，但最低限度跌落水唔會驚先，起碼都要識蛙兩下踩兩腳水，同伴中一定要有人熟水性，唔係既話去返斧山道嬉水池plz
- 防曬 —- 一定要捺! 就算陰天個海都好曬ga!
- 帽+長衫+長褲+太陽眼鏡 —- 怕即刻變黑亦得的女士必備，有運動防哂手袖當然更好 ;水上運動用長褲亦遠比想中重要，以為短褲就得既朋友必定變黑白火腿，想平的迪卡X都係百零蚊=LV既幾百份之一，係7 d，不過呢樣野一年用得幾次但又必需，求其d無所謂啦~ 當然如果似我男人老狗無所謂又唔怕曬傷ge，著條游水短褲都ok ge~
- 水上運動鞋 —- 由於上岸後可能會有走上亂石地甚至輕度攀爬，非常唔建議著拖鞋。我自己有對深坑紋Cross，或者去旺角運動鋪買對水上運動用鞋，都係2百幾蚊唔肉赤啦
- 防水袋 —- 起碼要帶一個袋上艇for裝水、食物同電話。我知大家可能唔介意個袋濕到扭得出水，但相信會介意反艇個袋沉左落水，搵個會浮水既大防水袋一炮過入哂去啦~
- 水! 好多水! —- 唔使抬支5L既，但起碼每人500ml up啦
- 食物 —- 唔好只係囉包萬寶路plz，消耗體力ga，要當去行山一樣，當然妳要帶個炭爐去BBQ都唔係唔得ge
- 毛巾+替換衣物 —- 唔使諗~ 一定會底褲都濕埋的~ 唔想滴住水返屋企就囉定衫換啦~
- 防滑手套 —- 呢個optional啦，我自己都無戴，但如果有好似會划得順d~
至於更衣室、locker、沖涼設備等多數租艇地點都會有~ 不用擔心~
2. 一人艇 vs 二人艇，點揀好?
至於揀一人一隻艇定二人艇，我個人覺得在於對自己or同伴的信心
一人艇 :
優點 : 速度較快，重點係只需自己顧自己，唔使理旁人易控制好多~
缺點 : 不熟水性的朋友可能會驚，一條友一葉孤舟於海上飄下飄下其實幾恐怖
二人艇 :
優點 : 二人坐落–>艇身較重身–>穩d，易於照顧初心者、力弱或不熟水性人士
缺點 : 要二人同步其實都幾難，更可況世上豬隊友多的是
更重要係二人艇划船時，後座果支船槳其實好易打中前座個頭!
萬一唔小心扑濕左你女朋友個頭，一係就佢暈低，一係就佢打到你暈低，最終都係跌落海
兩種艇價錢其實差不太遠，玩邊隻就自己決定啦~
3. 預約獨木舟
不少網站都有獨木舟預約， 例如H字頭同K字頭，唔係廣告，所以唔開名啦~
而有d地方就只有walk-in，例如大尾篤，去到自己再搵都得~
另外網上曾經流傳三門仔都有得玩獨木舟，小弟親身試伏，唔好話獨木舟，木筏都無隻呀 三門仔，都係行山好d 
https://travelblog-fung-garcia.com/taipo-sam-mun-tsai/ (又係時候回帶小弟其中一篇最高點擊率既文章了~~)
4. 前往交通
前言終於講完，係時候入正題了~
今次的獨木舟路線是「西貢羊洲+白沙洲」，普遍被認為是最簡單的入門路線
一來風景唔錯~
二來西貢海比較平靜浪唔大
三來可上岸地點之間的距離不遠，體力唔夠都易d有得抖
至於入西貢交通，於屯馬線烏溪沙站坐99呢d基本功講左幾廿次啦~
於木綿山站落車，走回頭向迴旋處方向落隧道就見到我今次book果間獨木舟店了 (下圖星位果度)
如覺得屯馬總站太遠，由彩虹or鑽石山入都唔係唔得
只係一來果段公路車程遠d又易d塞車， 二來去到西貢市中心仲要再行多10幾廿分鐘入去有d煩
三來我住沙田梗係烏溪沙入啦!
係有偏見ga啦~
去到獨木舟店~ 比錢、換衫、鎖locker、揀救生衣，攪掂就可以落沙下灣揀艇出發~
沙灘職員一般都會問你有無玩過，亦會講解一般常用技巧 2分鐘都唔使講完~ 真係超級簡單!
如果無信心ge，唔好怕羞，用下美男計問多兩句學多兩野，無死ge~
(有呢個泰國佬咁堅都幾好~)
5. 海中小石灘+羊洲
係寫到千五字既呢個時候，我終於出海了~
第一目的地唔係羊洲，比自己習慣下，划出去羊洲方向，肉眼所見最近既海中小石灘先啦~
=
小石灘幾乎係泳灘防鯊網咁近，但登陸後卻發現感覺非常良好!~
話哂海中心竟然有個唔夠300尺既小沙石島wor~
加d幻想，完全係劣化版鹿兒島秘景百合之濱啦!
扮型是必須的~
鹿兒島百合之濱 – 夢想中的地方之一
影夠相就向羊洲出發啦~
划過去初心者大約要20分鐘以上，一路上望下雀望下鶴都幾寫意~
不過羊洲實際上只係一個普通乜都無既島，又無wilson又無美人，沙灘仲要唔係好靚，水又唔係好清，你見我連相都無影就知咩事啦~
當check point休息下到此一遊就好了~
後方是羊洲
6. 白沙洲
離開果條羊洲，出發前往今次旅程的主要目的地白沙洲啦!
我想講去白沙洲先係對新手的真正挑戰!
一來路程較長，二來路上有不少來回西貢的遊艇、舢舨、大飛、水上電單車等等等等
大浪翻艇事小，比隻船撞到事大! 一
隻遊艇等於成棟樓wor，hi花左人地棟樓你點陪比人?
所以靠近主要航道時都要停一停，諗一諗，安全至上最要緊!
係海上撐艇仔都要等過馬路，死未!
OLYMPUS DIGITAL CAMERA
雖然大浪難撐，但慢慢撐，總會有一日去到ge~
到啦! Wa d水好清好靚呀!!!!!
十足去左外國海灘一樣呀~
咁清澈乾淨的海灘，係香港真係用獨木舟撐到海中心先會見到~
係白沙洲上仲可以遠望八仙嶺~
有哂前景後景風景咁靚，當然係打卡一流地點啦~
就算電話收到收唔到，大熱天時浸係水度，望住個靚景坐下hea下比蚊咬下(?)，寫意到不得了~
八仙嶺呀~
而白沙洲同橋咀島、欣澳鶴咀島一樣係連島沙洲，不同的是連島的沙灘部份非常廣闊，以我當時潮退計算分分鐘有30-40米闊，跳campfire都得
由於左右兩邊都係沙灘，唔少朋友就直接左邊上岸拉隻艇去右邊落水繼續前進，同玩MarioKart摌過隔離賽道一樣，慳水慳力慳時間
但點解我覺得拉隻艇過對面仲辛苦ge………
7. 大鏟洲堤圍
白沙洲旁邊有一小島名大鏟洲，由白沙洲看過去其外表與海岸和剛剛睇既無咩分別，多數人都會miss左佢直接衝上鹽田仔或向下落橋咀島
唔好咁快住!
只要兜去大鏟洲後方，立即會發現一個香港現已所剩無幾的圓形堤圍!
喂朋友，好似有d熟口面wor!
無錯!
佢同小弟上年介紹過後變得好hit ge曝罟灣堤圍 (搶credit~)係同一樣野嚟ga!
大鏟洲堤圍
+++++++++++++++++++++++
延伸閱讀 :
《【香港郊遊12】上窰郊遊徑+曝罟灣堤圍︱超強打卡+輕鬆行山首選》
https://travelblog-fung-garcia.com/sheung-yiu-country-trail/
+++++++++++++++++++++++
想睇堤圍的起源和歷史大家可以自己google下~ (講真我google唔到，一打「堤圍」就係我自己既文章……)
呢個大鏟洲堤圍比起曝罟灣果個更加細、更加殘破，更因而某d缺口太大而無可能完整行一圈
不過，咁亦代表——-妳隻獨木舟可以直接划入堤圍~ 成件事立即好玩左!
隻艇直接衝左入去ar~
小弟我就選擇坐係堤圍上食下野抖一抖啦~
身處呢個幾乎只有獨木舟先來到隱藏秘景，眼望前方橋咀島靚view，就算只有蝦條與薑啤都正到wawa聲啦~
由於實在太正，我忘形到無為意潮漲，隻獨木舟差d浮起漂走左……….
8. 回程
如上文所述可以由大鏟洲堤圍向左前往鹽田仔，又或向右前往橋咀島(未陸沉的話)，島上仲有洗手間tim!
不過要注意體力，要到橋咀沙灘大約=由羊洲過來，鹽田仔更加係加多一倍剛剛的距離!
記得妳係要划返同樣的距離返沙下灣還艇ga!
老手既當然無問題，我見班鬼仔快到好似比鱷魚追咁十幾分鐘過到去鹽田仔tim!
但記得考慮埋你既同伴，如果好新手天氣又非常熱，其實可以係呢度回程了~
中間係羊洲或任何無名小島抖一抖，悉隨尊便啦~
從大鏟洲堤圍遠望橋咀島
最後我呢個西貢輕鬆兜一轉的獨木舟旅程玩左大約4-5小時，連影相+hea~
體力係仲有的，亦的確可以再划遠d，但以第一次玩嚟講已覺非常滿足非常好玩!
而呢條路線亦真係非常適合第一次接觸呢項運動的初心者~
嚟緊睇下有無機會再玩其他唔同路線啦~ 最後亦係例牌的———-
9. 注意事項
- 記得記得帶走垃圾! 特別係白沙洲與大鏟洲，咁靚既地方唔好破壞佢plz
- 強烈建議出發前食定暈浪丸去定洗手間
- 除了注意自身安全，仲要注意埋旁人玩成點! 小弟就係比其他艇撞襯扭到條頸，兩日後郁唔到，請左三星期病假+一個月物理治療……….
當然天有不測之風雲，如果落雨雷暴或唔想落水又想搵野玩，去Agoda搵返間酒店staycation都係一個好主意wor!
Agoda.com 一直帶給顧客快速、簡便的線上訂房體驗，除了提供廣泛且多樣的住宿與房型選擇，Agoda.com 的每一份住宿評鑑都是由顧客於結束旅程後遞交，百分之百真實可靠。
想快手搵間靚房，不妨用呢條link ar~
======================================= ====================================
請大家Follow我Instagram啦~
=====================================
我既Youtube Channel已經開通啦!!!!
快d Click入 「鋒加西亞 / 旅人瘋語」Subscribe 睇片再比個Like禁個鐘仔啦!~
鋒加西亞/旅人瘋語 Youtube Channel
主要影片 ：
白濱系列 :
- 【和歌山】【白浜】白浜七大溫泉評價! 熱到烚腸仔? hea到似街市? 浸哪個好一一盡錄!
- 【和歌山】【白浜】超高性價比溫泉酒店介紹!(上集) 最平最型，兩層複式+望海露天風呂，竟然港幣千零蚊!?
- 【白浜】【和歌山】超高性價比溫泉酒店介紹!(下集) 「白浜館」好味到難以置信的一泊二食︱房內優雅露天溫泉+市中心對正沙灘，勁抵住!
旅行故事系列 :
=================================
相關篇章 :
香港郊遊系列
１小時內攪掂 ：
《005 – 沙田行去慈雲山，原來超級簡單》
《006 – 大埔三門仔，零難度的全海景輕遠足》
《009 – 粉嶺鹿頸至谷埔︱夕陽下的隱世蘆葦田》
《011 – 大美督家樂徑︱4大隱世絕美風景》
《013 – 長洲小長城︱驚喜十足的奇岩怪石小徑》
《014 – 紅香爐峰10分鐘極速攻頂︱維港日落全景最佳選擇》
《015 – 西貢泥涌︱大海、夕陽與天空之鏡》
《016 – 長洲行山︱北晀亭輕鬆看長洲全景》
２至３小時行完：
《003 – 香港仔自然教育徑》
《007 – 西貢大灘郊遊徑，長者行山無問題》
《008 – 飛鵝山芒草之行》
《010 – 青衣自然徑︱馬灣海峽+青馬大橋無敵日落美景》
《017 – 深涌大草原︱無障礙郊遊︱輕鬆無壓力散步路線》
《018 – 田下山︱簡易版釣魚翁路線︱意料之外的易行靚景》
行完會攰：
《001 – 夜登鳳凰山︱我得罪了日出之神》
《004 – 赤徑與鹹田灣，宛如沙巴的美麗海灣》
《012 – 上窰郊遊徑+曝罟灣堤圍︱超強打卡+輕鬆行山首選》
《002 – 簡單快速+靚景，龍蝦灣郊遊徑》
發掘香港系列
城市偷閒系：
《1 – 香港Staycation首選，皇家太平洋酒店住後心得》
《2 – 城市步行︱鯉魚門的絕美日落》
《5 – 訊號山花園︱尖沙咀鬧市中的秘密綠洲》
《13 – 銅鑼灣避風塘堤壩︱維港海中心看夕陽︱鬧市的避世角落》
影相打卡系 :
《2.5 – 鯉魚門石礦場︱夕陽下的芒草群》
《3 – 己連拿利︱港島攝影秘景，宛如荒涼未來的異世界》
《6 – 石峽尾公園粉色牆壁︱網紅火熱打卡點實測》
《8 – 歌連臣角炮台打卡位︱網紅不會告訴妳的兩三事》
《10 – 白樓「機場核心計劃展覽中心」︱夏天影相一流地點》
《11 – 孫中山紀念館︱Mirror教主MV拍攝場地，真係值得去打卡?》
《15 – 青衣西草灣︱青馬大橋日落+驚喜蘆葦群》
美食推薦系：
《4 – 香港的希臘小店，味覺的新衝擊》
《7 – 石峽尾一日遊︱美食推薦+文青打卡位懶人包》
《9 – 愛文生大排檔︱性價比超高的街邊豪氣滋味》
《12 – 上環紅葉餐廳︱9 蚊生蠔性價比超高!》
《14 – 銅鑼灣鐵板燒小店︱日本水準的大阪燒》
===============================
Email : funggarcia@gmail.com
文章同時刊於以下平台，請各位多多支持呀!!!!!!!!!!!!!