9個男人係台北，唔玩女人唔睇風景，除左食之外仲有咩好做??
原本想去郊外玩弓箭war game，但8月中攝氏36度緊，真係一出門口就「不如返酒店訓覺啦」
點知無意中比我搵到台灣流行玩室內鐳射war game，有冷氣唔使熱，仲唔怕痛，比人射到Mark哥咁都無問題!
(Sorry呢個係許文強)
呢間名為「六度空間」的室內鐳射對戰射擊會館，位於台北中山路二段，門口係同網吧一d分別都無，入到去都係相差無幾，之不過無電腦+無up味霉味，地方算係火猛乾淨~
(官網圖片)
玩呢個鐳射war game係要先網上預約的~
星期六日一定多人好易full，平日下晝就無乜問題，我都係朝早10點幾book下晝4點玩~
至於人數，我check返官網，現時個plan已經同我玩時略有不同，大約就係6人成行，但就算一支公都可以join埋其他人(如有)一齊玩
而我地到達時，係休息區見到有兩大group共約50人玩得興高采烈，我地起初同一家5口坐埋一齊，但後來唔知咩事佢地走左，於是就我地9條友霸哂lai玩~
Um，一定唔係我地太惡太嘈嚇走人，一定唔係………………….
Anyway，成個場大約可分為對戰區和休息區
對戰區約籃球場大小，建成迷宮狀，以燈光及音效營造未來感
休息區以廂座分成6 group，車輪式一組入去一組出lai，而職員似乎係因應人數來決定group與group對戰，定係group自行撕殺
(官網圖片)
每種遊戲開戰前職員都會詳情解說今次點玩，當然都一早會教定你點用支槍啦
而我班fd即時不約而同一齊問既係:「可唔可以射自己友先?~」
諗既第一樣野就點背叛………成班都係李光洙………………….咁當然我都有份問啦~
職員:「哈哈不能的，只會被敵人射中背心才死亡，10秒後復活………ar長按不能連射的，速射的話可以手指不停晃動………」
「啊! 我地明白呀!」
說罷9條友一齊伸出右手食中二指撩下撩下撩下，職員呆一呆，接著10個男人一齊發出會心微笑………………
廢話少講~開波啦~
我地基本裝備係激光槍同背心一件，只要背心兩肩and背脊發光範圍發出震動和變成紅色就代表中彈死亡，但講真震得非常唔明顯，好多時都要望下自己先知「ee我中招咩?」
而支鎗前端有紅外線協助瞄準，無限子彈，但死亡時係不能開鎗的
咩話? 支鎗點解無真激光射出? 妳睇得Star War太多了…….
但都因為無限子彈+中招無任何感覺，所以根本無人care死左幾多次幾時死同點死!
個個羅文上身在那激光中穿梭，心裡面只係諗住「對冧佢!!!!!」總之個個都係死侍無限再生………..
玩咩遊戲似乎係主持人話事，唔一定同網上寫既相同，我地玩左4種 : 有基地守護戰、炸彈戰、吸血鬼對抗同埋唔記得係乜
我比教鐘意玩炸彈同吸血鬼~
前者係電腦random選出3人為炸彈魔，10秒內射中人就可過個炸彈比對方，被炸死10次就真正死亡退場 ;
後者為生存戰，人類射中吸血鬼可停止其活動10秒，被咬超過10次則會變成吸血鬼，限時完結後仲有人類就人類嬴，我地最後玩到8隻鬼圍一個人，人類差30秒就贏，超刺激!
(官網圖片)
玩就真係非常好玩，又刺激又無危險性~但有樣野都係要注意，就係自己既體力!
個game始終帶有強烈既追逐成份，係咁短跑衝刺閃避同做劇烈運動無分別!
我地雖係多數都有運動開，但每次完結都係爆哂汗喘哂氣出lai，十足返返學生時代小息玩捉!!
9個3字頭男人互射左兩個鐘，happy hour每人都係400台幣=$100，抵到爛啦! 香港百幾蚊20分鐘ar!
如果一班fd去到台灣，強烈推薦呢~
(最尾會計分邊個最準~另外影相都係免費的~)
==========================
《六度空間-Lazertreks》
Address : 台北市中山區中山北路2段185號B1
==========================
p.s. 我寫完之後發現好似幫人賣緊廣告咁…….如果台灣既負責人見到，歡迎比返廣告費我ga!!~~
====================================
IG果邊間中會有d和Blog及fb page不一樣的相片和story，大家有興趣既去follow下支持下啦~
==============================
- 相關篇章 :
《【台灣雜記1】台中嘉賓平價鐵板燒，6餸$100飽到嘔》
《【台灣雜記2】一次台北拾屍的經驗》
《【台灣雜記3】在那激光war game中穿梭》
================================
我既Youtube Channel正式開通啦!!!!
快d Click入 「鋒加西亞 / 旅人瘋語」Subscribe 睇片再禁個like啦!~
岩岩開始，完全未有人睇呀~
=================================
- Email : funggarcia@gmail.com
文章同時刊於以下平台，請各位多多支持呀!!!!!!!!!!!!!