今次自駕遊，其實我係計好哂九州最紅葉盛放的時間先嚟的
點知黑仔如我，遇上今年全球天氣亂哂大龍，九州既紅葉比原先預定既早開左一兩星期
早開就早收，機票就一早買好，變成我到步果日大部份紅葉名所皮已收，幸好兩大名勝仍有水尾~仲有d野睇
所以第一站，我地去到日本人票選九州no.1既紅葉名所 —– 秋月城跡!
超鍾意呢張，原來真係值得為呢個景山長水遠嚟!
========================
請大家Follow我Instagram啦~
[instagram-feed feed=1]
=====================================
文章概要:
秋月城跡交通
秋月城跡停車位置
秋月城跡參道
秋月城跡紅葉見頃
垂裕神社
1. 秋月城跡交通
如果要數九州紅葉名所，秋月城跡一定榜上有名，仲要係頭幾位~
但由於個地點都幾僻遠，我做功課前都研究左陣，發現google上唔少評論都話「無咩野睇」「就係幾棵咁唔係好靚」「好伏既景點」等……一度令我想放棄呢個景點
但當我搵到日本本地既紅葉專頁，發現係日本人投票中秋月城跡係大票數高據第一位!
仲好死唔死，得佢一個場所仲係「見頃」狀態 (即係最紅卜卜既時候)
咁即係整定我要去左先啦!
渣車一個鐘je! 照殺!!!!!
日本全國紅葉狀態網頁 : https://koyo.walkerplus.com/list/ar1000/
如果無渣車就大檸樂了!
根據Yahoo.jp既路線指南，由福岡博多出發，需要坐JR去到一個叫「基山」(即係斷背山?)既地方，轉鐵道至「甘木」駅後再行1.5小時上山~ 全程共需3小時~
睇紅葉順便練埋腳力，聽到都覺得wonderful~
又或者要有坐好Q遠兼好Q貴的士的心理準備啦…….
2. 秋月城跡停車位置
根據小弟做過既功課顯示，係紅葉高峰期，秋月城跡既車位係難搵過星期六尖沙咀ge
加上臨尾上山路太窄，再再加上我呢類假日的路上炸彈，塞到郁唔到一d都唔奇!
所以我一早好醒咁mark左個遠少少的爛地停車場~ 行幾步路好過塞半粒鐘呀~
點知泊好哂，行到上去參道先發現根本無咩人無咩車……
連官方official停車場都勁吉…… 勸大家真係兜多個圈有著數
好彩兩老唔介意，仲話條路幾舒服幾好行~
3. 秋月城下町
由秋月街道轉入秋月城下町的「杉之馬場通道」，算啦無人會理呢個名ga~
總之道兩旁種滿樹木，就咁睇都feel到春天櫻花開時一定好靚!
但而家光禿禿就真係乜都feel唔到
越向前行d葉就越靚，乜果幾步路會唔同左海拔咩?
如果肚餓，道上都有d小食店同農品生果小店~
不過應該唔會有香港人肚餓時係街邊買個橙食掛?
我買返酒店今晚宵夜飯後果ga ja~
田樂燒呢種食物香港好少見，係豆腐or蒟蒻扔pat味噌上去，唔算特別啦~
想食正餐，城下町都有一兩間蕎麥麵店
其中一間「黑布茶屋」有個香港女人做店員，佢非常helpful但都非常多野講
食品質素就正正常常唔難食啦
間店個feel就Ok ge~
食完都無咩印象~
店內隻黑柴就幾得意~
4. 秋月城跡 紅葉見頃
行到參道盡處，終於見到秋月城跡啦!!!!
Wa門口棵紅葉好紅下wor!!!!~~~
方力申話齋「d 奶假ga!~」，張相d色都係假ga
由於前幾日陽光太猛，就算係「見頃」狀態d紅葉都被曬到半枯變成暗紅色，只能說我部Sony手機既補色太利害了~
不過又咁，夠自然光既紅葉又真係好feel ge~ 算係咁啦~ 收貨呀~
又要馬兒好，又要馬兒不吃草，旅行時影紅葉要遇上陽光燦爛但佢地又未曬瓜既日子，唔係咁易ga葉師傅!
父母表示收貨~ 影出嚟靚~味精可接受~
所有人都圍住呢棵影~
呢張係阿哥既華為手機，個飽和度重手到呢…..
進入秋月城著名的「黑門」，此處紅葉更見落寞
但從城內回頭細望，其疏落中略帶古樸詩意，那紅彤樹影下的古城門，宛如潑墨山水中跳出來
只係呢個風景已不枉我渣成個鐘車來呢~
超鍾意呢張，原來真係值得為呢個景山長水遠嚟!
阿爸70幾都仲咁調皮
雖然已經唔係全盛期，但其實只要識搵角度，一樣可以影得好靚~
好似有對香港人情侶就醒目啦~ 企正係條路正中間同旁邊最紅果幾棵下半個鐘都唔走~ 大影特影不亦樂乎~
仲好好人肯免費做所有人既模特兒tim~ 入哂鏡ga~
有妳份~
又有妳份~
都仲係有妳份~ 3張分左1個鐘影ga~
為左避人，為有向上行啦~
好彩都仲有靚景嚟消磨memory~
一搵到棵好紅ge兩老就一定要全家影wor~
set左好耐鏡頭既我
5. 垂裕神社
樓梯盡頭是垂裕神社，是供奉當年秋月此地的藩主
神社以全木製成，小而巧，隱於四周巨木之中，陽光穿透密林，閃爍著上數株已全金黃的銀杏，別有一番清幽~
整個秋月城跡其實不大，由「城下町」開始到「黑門」至垂裕神社，由頭行到尾唔影相真係15分鐘攪掂
就算慢慢影埋相，應該最多都係玩到兩個鐘，平日真係無咩需要山長水遠過嚟
但如果係櫻花紅葉季節，我真係強烈建議一定要嚟一次!
我呢堆相係季尾水尾都咁靚，全盛期仲得了ge!?
好今回係咁先~ 下集去另一福岡紅葉名所~
(即係呢….. 我呢篇介紹紅葉既文章係5月出…… 距離下個紅葉季節仲有成半年，邊有人睇……..)
========================
請大家Follow我Instagram啦~
[instagram-feed feed=1]
=====================================
我既Youtube Channel已經開通啦!!!!
快d Click入 「鋒加西亞 / 旅人瘋語」Subscribe 睇片再比個Like禁個鐘仔啦!~
鋒加西亞/旅人瘋語 Youtube Channel
主要影片 ：
- 【泰國】【芭堤雅】誤入邪骨!? 芭堤雅色情行業真相!
- 【歐洲】人有三急在歐洲怎辦? 卑鄙無恥! 歐洲免費廁所全攻略
- 【希臘遊記】絕美海濱! 雨傘雕塑! 寫意的希臘「塞薩洛尼基」一日漫遊!
- 【希臘】型爆海盜船酒吧扮魔盜王！超值60蚊一杯包遊船河！？
白濱系列 :
- 【和歌山】【白浜】白浜七大溫泉評價! 熱到烚腸仔? hea到似街市? 浸哪個好一一盡錄!
- 【和歌山】【白浜】超高性價比溫泉酒店介紹!(上集) 最平最型，兩層複式+望海露天風呂，竟然港幣千零蚊!?
- 【白浜】【和歌山】超高性價比溫泉酒店介紹!(下集) 「白浜館」好味到難以置信的一泊二食︱房內優雅露天溫泉+市中心對正沙灘，勁抵住!
旅行故事系列 :
- 【台北】誤闖台灣三溫暖，內裡竟然係……嚇死人咩！
- 【格魯吉亞】最慘的4小時! 格魯吉亞地獄小巴之旅!
- 【波蘭】在納粹集中營，我竟聽到了……一世難忘的恐怖回憶!
- 【台灣】我在台北拾屍的經驗︱美女強吻? 艷福無邊? 浪漫奇遇?
=================================
相關篇章 :
九州自駕遊系列 ：
《Day0.1 – 日本自駕遊初體驗(上篇)︱初心者租車攻略》
《Day0.2 – 日本自駕遊初體驗(下篇)︱準備清單與第一次自駕心得》
《Day1.2 – 福岡糸島打卡精選︱海邊韆鞦、夏威夷風海灘、夫婦岩鳥居、爆蛋三文治》
仙台山形系列 ：
京都紅葉系列 ：
《1 – 京都紅葉隧道此生必去︱貴船神社、琉璃光院︱叡山電車紅葉路線介紹》
富士山登山全記錄：
日本溫泉及溫泉旅館介紹：
日本富山、石川、琵琶湖 :
日本和歌山、白浜 ：
東京、大阪、京都：
韓國濟州島 :
《Day2.1 – 東門市場的遺憾︱豬肉湯麵+海鮮飯卷推薦》
《Day2.2 – 龍頭岩海水汗蒸幕︱最強黑毛豬餐廳「石窟黑豚」》
《Day4.1 – 濟州島 9.81PARK 重力賽車公園》
《Day4.2 – 濟州島 Arte Museum 光影饗宴》
《Day4.3 – 濟州島春日咖啡廳BOMNAL︱涯月咖啡街》
================================
Email : funggarcia@gmail.com
www.facebook.com/Garcia.in.Germany
文章同時刊於以下平台，請各位多多支持呀!!!!!!!!!!!!!