銀山溫泉近幾年非常熱鬧，自從比人話係現實版千與千尋後，幾乎成為遊客遊日本東北的必到地點~
咁我當然唔執輸啦~ 事實上此溫泉街靚就真係靚，卻存在不少未被提及的注意事項~而IG上問我「值唔值得去呀?」「係咪真係咁靚呀?」既朋友亦非常多!
所以今次呢篇就嚟詳細介紹下，呢個千尋同塔矢亮浪漫談心既地方有咩特別~
========================
請大家Follow我Instagram啦~
=====================================
文章概要:
1. 銀山溫泉交通
最多網友問我既係「係仙台定山形出發好d?」
的確，仙台係東北既入口兼大城市，由東京新幹線上去只需1.5小時非常方便
但係睇返地圖，銀山溫泉係位於山形再東北方，而只係仙台打橫片過山形都要1個鐘，仲要再轉JR去大石田駅，再要match到shuttle bus! 好遠好煩好花時間ga!!
所以除非大家係早睡早起身體好既類型，否則我建議大家都係前一晚係山形過夜，第日訓晏少少先他他條條出發~
至於由山形出發既路線，一般係山形駅坐JR北上「大石田駅」再轉shuttle bus約20分鐘可到
不過同上回由仙台去狐狸村一樣，去大石田駅的JR並唔密，而且唔係每一班列車都寫包單match到shuttle bus，出發前最好留意清楚
至於shuttle bus時間可以留意銀山溫泉巴士時刻表 : http://www.hanagasa-bus-taisei.co.jp/base.html
一般見人多都會開多幾班車，而且架架車都一定迫到返工時間的港島線先肯開，所以都唔使太擔心上唔到車呢個問題
但都建議一落JR就行快兩步啦，大石田落得車既，9成9都係去銀山溫泉ga la
2.日間的銀山溫泉街
到站後沿斜路行幾分鐘，就會正式到達銀山溫泉~
睇相都見到銀山溫泉街其實非常細，只係一條河仔兩岸各有一排建築物，由頭到尾快行約10分鐘攪掂，分分鐘尖東都大過佢
不過街道洋溢著復古典雅氣氛，真係好難唔影多幾張~
可惜既係我原本預期此東北山區既小村會似合掌村咁積滿厚雪，點知卻係開始溶雪，氣氛立即弱左
基本上以上既相已經係成個銀山溫泉既主要面貌，如果無咩事既我走先啦~
………………………………………………………
……………………………………..
…………………..
唔會咁快走啦!!!! 銀山溫泉最靚應該係入夜點燈! 而家2點幾ja!!!!
既然銀山溫泉只係一條咁細咁細既溫泉街，於是如何Kill Time就成為一大學問了
咁Kill Time就不外乎食and玩，講左食先~
3.食肆@銀山溫泉
大部份溫泉酒店的食堂只供住客或預約客，所以銀山溫泉對外開放的正式餐廳只有3間 :
我最終食左「伊豆之華」的甜品，等位約1小時。可以的話最好坐二樓窗邊，風景一流~
其招牌甜品「蕎麥黑糖軟雪榚」，連唔好甜食既我都覺得正~值得!
小食店方面，我強烈推薦豆腐鋪!
滑過靚湯既湯豆腐和卜卜脆既脆皮炸豆腐，豆味超濃!
天寒地凍，食住浸住足湯，絕對係人生一大樂事!(但小心唔好整污糟d水)
另外都有兩至三間小賣店有溫泉饅頭、肉包、雪榚等等~
價格還好啦，唔算太出血~
4. 玩樂@銀山溫泉
無野玩~ 好x悶~
都未見過溫泉街會無公共浴場浸，定係我太黑仔去到時全部關閉ja??
上文提過既街邊足湯浸住睇風景睇女仔其實好正好好feel~ 但真係太多人啦!
鬼咩個個都係度等天黑係度懶死嗎……..
雖然我都係一份子……….
其實睇地圖街好似可以行去唔知邊度的，不過我去當時斜路上結哂厚冰好危險就無行到了
所以，要kill time，我強烈建議大家囉部PS5過嚟玩Fifa
5.銀山溫泉點燈如童話夢幻
終於Hea到日落西沉，華燈初上，才是銀山溫泉的真正面貌
亮燈後的古老旅館，在雪景與燈火交映下，令人彷如置身日本大正浪漫時代，Yoasobi唱住歌後面標個炭治郎出嚟既感覺~
不枉此行
要數最多人影相既，就係呢座「能登屋」百年老旅館
銀山溫泉比人話係千與千尋取景地既原因亦在於佢~
唔知千尋而家係咪入邊磨刀霍霍向爹娘呢?
為趕上和避免上唔到18:21尾班車，18:00就要離開了
由入夜點燈到而家走人其實1個鐘左右，不過要影既應該都影哂ga la~
反而臨走前於入口橋上影既呢張雪景我超喜歡呢~!
另外溫馨提示shuttle bus好full，尾班車唔止一架車，但排隊等半個鐘以上算正常呢……
超級鍾意呢張~
6.值得住嗎??
銀山溫泉基本上係咁多~ 回答返開波時既問題 :
「究竟銀山溫泉值唔值去呢?」
我既答案係值得一到! 不過無需要住係度!
原因1 : 性價比低!
因為銀山所有大正時代feel既古風溫泉旅館，都係好殘舊! 好x貴! 仲要好Q full!
新酒店又無需要住，舊酒店even裝修完都最多麗豪酒店果d feel
而且一般都要4個月前預約，更不用說冬天會價格大up啦! 咁夏天又無野睇wor!
而有就算比妳book到，銀山溫泉旅館有私人房內風呂的旅館房間更係極極極少+極極極貴，同埋唔好預有咩靚view，性價比極低
原因2 : 夜景完全無野做
而銀山溫泉雖然非常浪漫有feel，但地方真係細得太緊要，一條灣仔站行到會展咁長既山中小溫泉街，周邊又係乜都無，連便利店都無，真係無野玩無野做悶到嘔ga!
係呀無錯! 個夜景真係好靚! 但你全身唔郁眼碌碌望住李嘉欣成晚都悶啦! (um林明禎我唔會悶，白石麻衣我都唔會)
要睇 / 影夜景，6點幾尾班巴士前果1個鐘鐘影乜都夠!
除非你真係好想好想全晚沉浸於此冬日夜景，想到願意花成$3-4000港幣 (per head) 係度乜都唔做齋hea一晚啦
咁都有其他野做ge，情侶的話……
====================
銀山溫泉
- 網頁 : https://www.japan.travel/hk/spot/1798/
- https://www.ginzanonsen.jp/
- 銀山溫泉巴士時刻表 : http://www.hanagasa-bus-taisei.co.jp/base.html
====================
我最後返到山形市既酒店都成9點幾了，多數好既食肆都last order哂，只好亂入呢間「博多長浜麺食堂ちー坊 山形駅前店」
嚟山形食九州豬骨拉麵真係唔知想點……
唔知係咪太餓，竟然意想不到既好味! 黑蒜油咖哩豬骨湯麵中辣，好味到一啖接一啖! 可以推薦!
=====================
《博多長浜麺食堂ちー坊 山形駅前店》
- 地址 : 山形県山形市香澄町1-6-7
- 電話 : 023-674-8244
- 營業時間 : 17:30～翌2:00
- https://tabelog.com/yamagata/A0601/A060101/6009647/
=====================
========================
請大家Follow我Instagram啦~
=====================================
我既Youtube Channel已經開通啦!!!!
快d Click入 「鋒加西亞 / 旅人瘋語」Subscribe 睇片再比個Like禁個鐘仔啦!~
鋒加西亞/旅人瘋語 Youtube Channel
主要影片 ：
- 【泰國】【芭堤雅】誤入邪骨!? 芭堤雅色情行業真相!
- 【歐洲】人有三急在歐洲怎辦? 卑鄙無恥! 歐洲免費廁所全攻略
- 【希臘遊記】絕美海濱! 雨傘雕塑! 寫意的希臘「塞薩洛尼基」一日漫遊!
- 【希臘】型爆海盜船酒吧扮魔盜王！超值60蚊一杯包遊船河！？
白濱系列 :
- 【和歌山】【白浜】白浜七大溫泉評價! 熱到烚腸仔? hea到似街市? 浸哪個好一一盡錄!
- 【和歌山】【白浜】超高性價比溫泉酒店介紹!(上集) 最平最型，兩層複式+望海露天風呂，竟然港幣千零蚊!?
- 【白浜】【和歌山】超高性價比溫泉酒店介紹!(下集) 「白浜館」好味到難以置信的一泊二食︱房內優雅露天溫泉+市中心對正沙灘，勁抵住!
旅行故事系列 :
- 【台北】誤闖台灣三溫暖，內裡竟然係……嚇死人咩！
- 【格魯吉亞】最慘的4小時! 格魯吉亞地獄小巴之旅!
- 【波蘭】在納粹集中營，我竟聽到了……一世難忘的恐怖回憶!
- 【台灣】我在台北拾屍的經驗︱美女強吻? 艷福無邊? 浪漫奇遇? (新片呀!!!!!!!!!)
=================================
相關篇章 :
仙台山形系列 ：
京都紅葉系列 ：
《1 – 京都紅葉隧道此生必去︱貴船神社、琉璃光院︱叡山電車紅葉路線介紹》
富士山登山全記錄：
日本溫泉及溫泉旅館介紹：
日本富山、石川、琵琶湖 :
日本和歌山、白浜 ：
東京、大阪、京都：
韓國濟州島 :
《Day2.1 – 東門市場的遺憾︱豬肉湯麵+海鮮飯卷推薦》
《Day2.2 – 龍頭岩海水汗蒸幕︱最強黑毛豬餐廳「石窟黑豚」》
《Day4.1 – 濟州島 9.81PARK 重力賽車公園》
《Day4.2 – 濟州島 Arte Museum 光影饗宴》
《Day4.3 – 濟州島春日咖啡廳BOMNAL︱涯月咖啡街》
================================
Email : funggarcia@gmail.com
www.facebook.com/Garcia.in.Germany
文章同時刊於以下平台，請各位多多支持呀!!!!!!!!!!!!!