前言
本篇開始之前想講下——
原本我係行完富士山後因為太深感受，於是想寫幾隻字抒發下，點知一寫就寫左成6千幾字……….
我自己都睇到嘔啦何況大家?
所以就將佢斬開3舊，當做一個小短篇，希望大家易睇d開心d啦~
=====================================
唔知邊個偉人曾經講過 —-
「富士山難度唔高，只要做足準備，普通正常人都可以登頂!」
阿爸作為行過不少5-6000千米高山既行山老手，當然唔會覺得呢個3776米既日本no.1係咩一回事啦，聽到朋友講話正，就興致勃勃話要搵機會上一上去!
(後來某日發現一本廿年前的旅遊書富士山行山果頁摺左角，原來阿爸想去好耐…… updated at 2021)
大佬呀佢就嚟70古來稀啦，仲要身體有事食藥中，唔通仲放佢一個通山跑咩??
加上我地比上面果句「普通正常人都可以登頂啦~」引誘，於是家中年紀最細但又最虧既我，仲有識日文但已變胖既前運動員阿哥就頂硬上一齊同行了
講真呀我係擔心我地自己多過老豆，不過自從長大成人後都無再3仔爺行山了，上富士山又係老父既心願，就當做係一個美好既回憶啦~
文章概要:
登山路線選擇
揀山上小屋住宿
登山裝備
我呢個blog經常都係比我自己自high ga la~
如果夾硬要講關係既話，就係我行完之後發現——-
富士山根本唔係大家口中咁易行!!!!! 如果抱住玩樂心態輕鬆行的話我可以絕對斷言你會死得好慘!
所以儘管坊間已有很多很多富士山登頂攻略 / 注意事項等等等等，我仍然想係呢度用我第一身既主觀感受寫幾隻字，希望會幫到想登山既朋友啦!
p.s.此文是寫比像我一樣最多間中爬下大浪西灣、龍蝦灣家樂徑既新手，如是行山老手可以skip，因為大量野都係娘親是女人來的~
================================
1. 登山路線選擇
第一次行富士山幾乎每個人都一定走「吉田線」
主要因素唔止係易行，最主要係沿路有大量補給點及救護站，可以話係最安全既路線 ;
缺點係步行距離長及人太多，夜晚要排隊上山，近山頂的山上小屋亦會係4-5月開放booking時被高速搶購一空。
「須走線」起點海拔會較低
到本八合目「上江戶屋」時更會同「吉田線」會合，即係第朝都係要排隊攻頂。
所以除非妳想係起步段睇下樹海森林風景，否則都無咩人會揀呢條路嚟行。
落山行呢條路反而多d，因為可以玩「大砂走」，垂直落山快好多! (但傳聞話好傷膝)
(須走線與吉田線會合位)
「御殿場線」係步行距離最長的一段，亦無救護站，所以係最少人選擇既路線。
亦因為人少，如果係行山老手唔想比人煩比人嘈的話可以揀呢條，同時落山都有大砂走~
「富士宮線」從靜岡富士宮市起點到山頂的距離最近，係初心者既次選
但上下山都係同一條路有d悶，仲要閃避下山人群，要注意~ 
其實仲有條路叫「富士山3776線」，意思就係由海拔零米開波…….
新手既唔好搵條命嚟玩啦……..
而我今次係行吉田線的，所以以下內容亦以此為主，至於路線的真實情況，下兩篇會講到的……
2. 揀山上小屋住宿
由於官方以及所有行山高手都極不建議「彈丸登山」，即係一日來回爆上爆落，所以在富士山book小屋上住一晚為必然之事
不過d小屋應該點揀呢? 首先睇左呢幅網上圖片先~
八合目以下既小屋真係諗都唔使諗!
雖然話富士山被謝靈運分為一至十合目共10份 (what!?)，但每一份唔係均等的!
由吉田五合目行到七合目大約只要2-3小時，但七合目至八合目卻需約兩小時，八合目至八合五勺更最快都要一個半鐘!
假如住七合目的山中小屋，會距離山頂仲有差不多5-6小時路程，仲未計休息時間wor!
日出大約係早上4點半，即係約晚上10點幾就要於零度氣溫以下起身出發行多成公里上山?
咪玩啦! 但就算係剛到八合目的「太子館」、「蓬萊館」亦距離山頂非常遠!
(七合目第一間山中小屋「七合目トモエ館」，當時我只係行左兩三個鐘ja)
(八合目第一間山中小屋「太子館」)
因為多數小屋距離山頂都好遠，所以好多人會選擇係體力充沛既第一日爆到盡上到最高
That’s why「吉田線」最高既「御來光館」會係開始預約當日比人谷爆左個網上booking system，even連電話都打唔通!
概念是正確的~
不過有個問題大家要注意，位於八合五勺的「御來光館」其實係非常非常高的!
距離山頂十合目慢行都只需兩小時ja wor!
所以如果一日直爆上去，有好大機會你未到御來光館就已經見到另一個世界既御來光!
我爸爸就係因為到達小屋前體力不支幾乎跌左落山! 嚇到我同阿哥魂飛魄散!
難為阿爸暈低後仲講笑「邊個慒佬起間屋係咁高既地方呀~」
(第二朝見到大量人上到嚟御來光館已經得返半條人命)
所以如果係好似我地咁體力不佳，真心建議揀一間矮少少又唔太矮既山中小屋，早d好好休息先再出發!
個人意見嚟講，揀小屋at least係「元祖室」以上，因為就路上所見，9成行山人士行到元祖室時個元神都開始歸祖ga la
最好當然係住「本八合目トモエ館」、「上江戶屋」or「富士山ホテル」
唔好以為呢兩間同御來光館「都係差廿分鐘無咩分別je~」，廿分鐘係指你正常狀態，未計行左一日既疲態同高山反應呢!
當然啦以上呢幾間都係易full booking，如果真係無，有前輩都推薦「白雲莊」的~
(元祖室)
(好大間的富士山ホテル)
(八合目第3間的白雲莊)
++++++++++++++++++++
- 吉田線小屋旅館綜合website，可以係度一次過睇哂邊間屋有位~
http://www.mtfuji.jpn.org/index.htm
++++++++++++++++++++
3.登山裝備
防曬帽及一眾防曬用品好重要好重要好重要!!!!!
我上山下山時都天陰清涼有風好舒服，到行完就發現變左隻燒豬!
而我雙手及後頸只係五合目至七合目先有裸露出嚟……..
就算我阿爸戴左帽，但打緊呢篇文既moment都仲係做緊脫皮爸爸law……
(我塊面上到御來光館已經燶左………….)
衫褲鞋襪唔特別講啦，反正個個唔同，連國產mk女生著one piece + converse都有，我只係奇怪竟然無大媽帶「臉kini」je
我個人就推薦洋蔥式著法~
最基本都要有一件可以頂到零度氣溫既輕薄外套，亦可以就住行起上嚟慶恰恰而自己調節
(人地咁樣著係正路)
(我咁樣著係唔對路~)
行山杖可以用自己的或於五合目買金剛杖~
講真呢枝棍遠比我地想像中好用，唔係純紀念品咁簡單，仲幾鬼結實tim!
注意落山時可用兩支行山杖，對腳力不佳者非常有用!
保暖手套就睇個人啦，如前輩所言勞工手套都得~
萬一好似我地咁開頭覺得唔使卻臨時發現需要，無問題~
可以係山中小屋買到的(我係白雲莊買)，只不過由100yen 3對變成300yen一對g ma……..
(講真勞工手套真係好正，連防寒效果都一流!)
至於個個都話落山必備防沙石入腳既鞋套，我自己就覺得未必需要了
只要條褲夠長cover到鞋筒又有橡筋可cool死就ok，至少我咁做真係一粒石仔都無入侵過~
當然如果閣下係著leg勁就無計啦
至於其他detail d既行山裝備我唔講啦，個人喜好啦，反而最應該帶既係 ———– 錢!!!!!!!
吉田線小屋乜野都買到，只係樣樣都殺到你一頸血!
300yen一隻蕉 —– 抵!
500yen一支水 —– 買!
600yen一個杯麵 —– 食!
要知道係富士山上，大家都係一隻隻待宰的肥羊，仲要被宰得非常開心……
因為上到八合目開始瀕死既你唔會諗到一個「貴」字，只會覺得天寒地凍有個杯麵好幸福……
最後有一樣食物我覺得係必需既 —— 鹽糖!
呢家野我上山前大鄉里聽都未聽過，係久居日本既姨丈行行下突然係百寶袋囉出嚟
開頭仲諗乜料呀咸既糖?我份人仲唔夠咸咩……..
wei原來保礦力味ge??固體既保礦力???
就好似廣告所講呢種鹽糖可以補充身體水份鹽份同電解質，令人回復體力防止中暑
需知道唔係好似銀魂咁度度都有保礦力賣，行到攰整返粒真係覺得醒神唔少，係今次完成行程既一大功臣!
日本各大便利店超市及驚安之殿堂有售~
好啦~ 前言講住咁多，下篇開始正式講下我地既上山經過!
唉……..囉命呢………….
=================================
相關文章 :
帶著爸爸行富士山 :
東京雜記系列:
=======================================
====================================
請大家Follow我Instagram啦~
=====================================
我既Youtube Channel已經開通啦!!!!
快d Click入 「鋒加西亞 / 旅人瘋語」Subscribe 睇片再比個Like禁個鐘仔啦!~
鋒加西亞/旅人瘋語 Youtube Channel
主要影片 ：
白濱系列 :
- 【和歌山】【白浜】白浜七大溫泉評價! 熱到烚腸仔? hea到似街市? 浸哪個好一一盡錄!
- 【和歌山】【白浜】超高性價比溫泉酒店介紹!(上集) 最平最型，兩層複式+望海露天風呂，竟然港幣千零蚊!?
- 【白浜】【和歌山】超高性價比溫泉酒店介紹!(下集) 「白浜館」好味到難以置信的一泊二食︱房內優雅露天溫泉+市中心對正沙灘，勁抵住!
旅行故事系列 :
=================================
Email : funggarcia@gmail.com
文章同時刊於以下平台，請各位多多支持呀!!!!!!!!!!!!!