上回講左成千字飲飲食食，係時候講下地拉那Tirana呢個地方既風情啦～
由Shkodra出發，坐上巴士，唔使兩個鐘就會到達
注意架車有冷氣等於無冷氣，陽光透玻璃直曬落嚟，我差d變成世界首塊於旅遊巴焗熟既咸魚乾
而落車地點又係無車站無水牌的，而且離中心地段都有維園到鵝頸橋既距離，仲要35，36度下背包找hostel，的確有點吃力
不過總叫搵到呢間Trip’N’Hostel，唔算極乾淨，但總算五臟具全，睡房有冷氣同獨立簾，好好ga啦!
(就係呢度落車)
(呢架車又係焗死人…….)
(Hostel附近街道及市場)
話哂都係首都，Tirana相對比Shkodra，不論治安，生活質素及整潔程度等都好得多
市中心最搶眼的絕對係國家歷史博物館的超大型壁畫!
有一點點軍國或共產味道，但卻強烈宣示出此地強悍的民風，起碼話比人知“我地唔係好蝦”的!
對於一個國家首都來說，的確係一個明確展現個人風格的上佳地標!
攪到我都想入去望下裡面有d乜!
第一日，太晏去到已close ; 第二日，星期一休館
=_=…………….
難得我想扮下知識份子!!!!!比我入去啦!!!!!!!!唔好呀!!!!!!!!
（博物館斜對面矗立著的國家劇院，但果兩日無乜mood睇劇）
（國家劇院旁的大橢圓形不能進入草地廣場Sheshi Skenderbej）
Sheshi Skenderbej旁的Et`hem Bey Mosque，應該係我遊歷歐洲以來見過最古老、最純正的清真寺
超!講到好威咁，其實莫講話伊斯蘭國家，我連尖沙咀座清真寺都未入過去呀!
或者再具體d講，我對回教既認識只限於ALevel中史讀既宗教史同九龍城清真牛肉餅!
抱住增廣見聞的心態，應該去觀摩下ge~
入屋先除鞋，只見整間寺廟內部都起左一個膝蓋高度的平台，上鋪以紅藍白花紋地氈，一位位教徒就這樣舒適地或躺或坐，在念經，在修行
而我，只有盤膝靜靜的坐在一旁，感受一下宗教的莊嚴
此時一位貌似揸fit人的伯父走到我身邊，以超級流利的阿爾巴尼亞語向我掃射一輪，我除左掹大個口得個窿外都唔知做到d乜!
正當我以為佢想踢我走時，在旁一位阿裔青年即刻英文翻譯，原來佢係歡迎我入嚟，叫我隨便參觀，仲話我隨意任影相都得!
下!？咁著數？？又唔似有陰謀wor!
阿伯仲好熱情咁帶我入禮拜堂參觀!真係一洗我對阿爾巴尼亞人及回教徒的印象!
亦都因為咁，我第一次有機會靜靜坐一旁參加回教的宗教儀式
我份人本身雖只信訓覺，但亦覺此地是莊嚴而神聖的，無形中亦添上一份敬意。
但後來有個男人可能不知我已獲批准，略為粗暴咁趕我走
無所謂啦，已經係難得經驗啦～
以博物館為中心向南移動到Rinia Park，左近有不少歷史建築、中央公園及酒吧街
下晝熱辣辣無咩人，但夜晚此區域可是熱鬧非常～
(Rinia Park)
（另一出名的金字塔Enver Hoxha Pyramid，嚟到以為係廢棄商場，原來係非常有歷史意義的地方……）
再往南直行約廿分鐘會到達市內最大公園Parku I Madh(Grand Park)及唔sure係湖定水庫的Liqeni Artificial Tiranes
對我嚟講此處反而仲吸引，風景不錯之餘，更完全係本地人消閒休憩場所，feeling生活文化既最佳場所～
feel到d乜？當地人真係好鐘意食燒粟米咁撓!幾步路就一檔～
不過小弟麻麻地粟一燒，更加麻麻地粟米，所以，無食～～～～
想睇風景既，仲可以去東面的Dajti Ekspres坐纜車上山俯瞰整個地拉耶市
不過並唔係咁易去，首先要坐我唔記得幾多號number既巴士到終站，再沿分叉路左邊行廿分鐘爛地斜路先到cable car
而且講真，上面都真係無乜特別野睇，只係有堆馬，有間餐廳，同有一大群蚊
古語云「高處不勝寒」，下句就係「呢度好鬼熱」
Anyway啦，如果時間有多，或對登高望遠極有興趣，呢度都係可以一戰的。
Tirana市內觀光我見到既就係咁多～其他夜景等雜項就post相算la~
應該就仲有好多野既，但我份人太懶，日日係35度以上陽光煎足咁強粒鐘，已經無乜精力再發掘，如果有網友知道既還望告知ar thx~
阿爾巴尼亞之行接近尾聲，但離開前，仲要去多一個城市1st~
下回再講!
(Orthodox Autocephalous Church of Albania)
(夜景都唔太差wor~)
====================================
補完此Blog上未成文的相片和無聊閒事:
My Facebook Page : www.facebook.com/Garcia.in.Germany ，多多支持呀!~