打工換宿一向都係全世界背包客常見既賺錢or慳錢大法
之不過我地多數聽到既都係出現於台灣、澳洲等地，歐洲真係少見d，至少人稱”Hostel之鬼”既我住左大半年過50間青年旅舍都無乜幾可見到
同埋總覺得呢種模式唔太岩我，工作及居所都係同一地方好有壓迫感!好怕休息時唔係休息，隨時剪緊指甲都比老細捉去洗廁所! 不過…………世事既野妳估唔到ge~
事源於2013年11月，係到歐洲後既第3個月，係柏林人又老錢又無，搵唔到朋友搵唔到工作搵唔到住宿，唯有長book左柏林既East Seven Hostel作臨時蝸居、做個除左身之外乜都失哂既多失青年啦!
古人閒居無事翻書度日，吾則反轉個廚房嚟過日晨
乜野Ruby xxxxday式燒排骨、蘋果薯仔沙律、人臉腸蛋麵，已經比班只識水煮意粉加pat醬既鬼仔們勁歧視
更何況我過份到用hostel個焗爐燒叉燒自製思鄉叉蛋飯!
班staffs已經見怪不怪 : 「呢個香港死靚仔又cosplay味吉陽一啦!」
有一日身痕，仔細d望下房門口果張貼左好耐又一直無為意既雞腸紙仔
「Supper Club……….咩嚟ga…….?」
根據我有限度既雞腸理解能力，應該係只要煮一餐飯比一村人食就有一晚free bed
問一問門口既長毛rock友staff，佢話確有其事!我只需要煮，其他既廚具、宣傳等佢地會攪掂哂~
反正我呢個時候都無野做，食十幾人份量試過，煮十幾人份量真係無乜幾可!
仲要係外國!仲要有個咁大既廚房同大餐廳size既廚具!
機會難逢呀!一於做一晚Master Chef la~
(呢張無咩意思，純粹覺得season4既Jessie好靚內外兼備post下je~) 佢地問我想幾時同煮d乜?
Wa妳估話嚟就嚟咩!都要諗下煮乜ga!
不過呢個先係最難既部份………….
首先要簡單易煮，如果唔係我整個東坡肉出嚟，先烚後煎再蒸返356個鐘，下年都未食得!
其次要平!雖然話錢係人地出，但我就唔信我買二三百隻吉品鮑返嚟佢會比錢啦!
另外要迎合鬼佬口味，總不能煮堆牛雜出嚟呱，佢地睬你都傻啦，最後咪真係我一人食廿人份量!
而我都想試下將德國菜融入港式或中國式煮法—–如果做得到既話~
左思右想之下，決定一試以自己既方式嚟煮柏林名菜—–咖哩香腸Currywurst!
一般既Currywurst係將煎/燒好既香腸上，淋上一大堆自家製既蕃茄醬，再灑上咖哩粉
味道是非常不錯的~而且只售約1.3至2.2歐元，係肚餓時填肚首選~
之不過對亞洲人來說咖哩味未免太淡……..其實可以話得一兩間名店先食得出….
所以我決定以咖哩炒洋蔥來加強香味、咖哩味及辣道，蕃茄醬則加入啤酒及蘋果加強甜度
而且是一層咖哩一層蕃茄不會混合淆煮，能夠食出每個味道的層次
蕃茄酸甜、咖哩香辣、煎腸鹹鮮，各種味道在口中各自為政，卻又混然為一，配以經烘焗外脆內軟既麵包，實在太完美啦!!!!
神仙都企唔穩呀!!!
(係咪個樣都無得輸先~感謝老友C小姐仗義做白老鼠試菜~)
好啦睇左我咁多扮哂華麗咖哩食桌同薛家燕式既食評，係咪覺得我掂硬呢~
「Sorry呀我地呢度好多vegetarian，你最好都係煮素食啦!」
@_@………………………………………… 你唔早講……….定好哂野同你傾時先講呢d………….
再睇真d…..原來一早寫左，係自己對英文選擇性失明睇唔到……..史刁拔……
作為一個食肉獸，平時都係擅長肉類料理居多，而家要煮十幾人既鬼佬素食????????
鬼佬素食大家第一時間會諗起咩? 無錯，就係一大堆草加一小堆醋啦!
喂但咁唔叫煮呀下話!~
終於，我幾經辛苦，攪盡腦汁，終於諗到一樣又易煮又易接受大家又鍾意既素食啦!!!!!!!!!!!!!!!
各位觀眾!!!!!!!!!———————–公仔麵麵麵麵麵麵麵麵麵麵麵~~~~~~~~~~~~~~~
講笑je~~~~我都唔想以後香港人比呢間hostel blacklist ga~~~
其實最後我決定以港式羅宋什菜湯及忌廉蘑菇意粉應戰~
最大原因就係超級簡單~
羅宋什菜湯只要將d薯仔、蕃茄、青椒、紅椒、黃椒、椰菜、洋蔥、薑、紅蘿蔔切切切切切，用茄膏爆香再加水一鑊熟，攪掂~
忌廉蘑菇意粉就又係將d洋蔥蘑菇切切切切切，用牛油爆香，加水加忌廉加芝士一鑊熟，淋上意粉，攪掂~
聽落係咪好簡單呢~但實行起來一d都唔易!!!!!!
只係將上面堆蔬菜又洗又切已經攪左我粒幾鐘!我呢世人都未試過切堆蘑菇山出嚟!
雖然對於一般廚房大佬真係濕濕碎，但小弟教書揸筆寫字ga ja，比下面d業餘啦!
加上一邊煮一邊出問題————
「個湯太濃材料太多」——煮到一半等材料軟左再加水la
「忌廉汁多手落太多鹽呀!」——加多d水law
「但忌廉汁水一樣唔夠杰呀!仲可以加d咩白色既汁ar??」——我有!出去買多d忌廉同芝士先!唉唔加得雞湯個味總係差d…………
而當日係冬季柏林的第一場雨雪，一抽二抽咁行來行去真係唔係好受…..
終於，由下晝2點開始攪到夜晚7點，共5個鐘頭，我個仔終於出世啦!!!!!!!
見大廳上已坐滿不少住客，而且遠比我想像中多好多!都係見到poster想嚟食霸王餐…..呀唔係係免費餐……呀都唔係係支持我既人先岩!
根據外國慣例，大廚係要同大家講兩句speech介紹下今晚有乜食ge
同大家介紹…………………………. 講咩好ar????「My name is Garcia, I go to school by bus????」 好就呢兩句啦!
其實我教書週會及婚宴做MC時閒閒地都一百幾廿人面前講野啦，但要一個英文ALevel囉U既人當眾同廿幾三十個外國人用英文「演說」都咪話唔驚!
但嚟左幾個月，而家都算流利ge~Grammar就算吧啦~
介紹完主菜Vegetable soup and Cream Mushroom spaghetti後，一輪禮貌性的掌聲，大家就魚貫而入囉餐啦
而作為大廚既我，呢個時候反而避開人群，睇住人地食我煮既野好怪ga ma!萬一難食既話一碟碟意粉兜口兜面車埋嚟點算…….
於是我開左支啤酒，一個人坐到花園中，靜靜地望住月光裡微亮的黑夜，看著雲層的變化……..
今日好似德國西北部打颶風wor….….算la….終於可以休息下了…………
半個小時後，大家食到7788，走入去大廳問問大家意見~個個都舉起大拇指一致讚好!!!
明知唔會有人會話「呢d真係人類既食物?」但得到讚賞，自己煮既野有人鍾意一定是開心的!
呢種獲得人認同既滿足感，真係無與倫比的~幾辛苦都值得!
就這樣，與一眾食客把酒言歡，談談笑笑，又一個於德國歡樂的夜晚~
(呢個髮型真係7到無朋友，真係要多謝果個德國髮型師……..) 
Supper Club完結後，我拿過兩隻小碗
湯一勺、麵一箸 ; 喝一口，嚼一啖
微微一笑，味道真的不錯吧
故事就係咁多啦~呢個煮飯經驗令我賺得一晚既免費住宿~
其實有無都係其次，重點係過程好玩ar ma~~
Wei不過…………呢個好似唔算真係真正既打工換宿wor……人地日日做到隻積咁但你做一日ja wor…..最多咪小學生作文「我的一次下廚經驗」!
Hey~~咁偷金庫同偷棵菜都係偷野呀~~
你想知真正既打工換宿經驗? 大學時有個師妹做過呢樣野，可以幫你問下ga~~~~
喂唔好扔野住啦!!!!!!!
===========================================
寫呢篇回帶既主要原因，係有網友叫我不如寫返多少少關於德國工作既野
其實工作事之前係第廿五、三十三、 五十九 同 七十四 章都有講過下ga la，只不過佢咁講一講，又諗起的確呢件樂事我好似無乜detail地講過
下篇都未必會返去遊記住，因為仲想寫多一篇無聊野先
另外，最近因為有事發生心情嚴重不佳，無辦法以沉重心情寫輕鬆野，所以才會隔咁耐都唔出文，在此謹向咁多位網友、特別係追開我文章既讀者致歉!
呢排都持續三失，應該多d時間寫野ga la~~~ 所以都請大家繼續支持呀!!!
My Facebook Page : www.facebook.com/Garcia.in.Germany
=======================================
請大家Follow我Instagram啦~
[instagram-feed feed=1]
=====================================
我既Youtube Channel已經開通啦!!!!
快d Click入 「鋒加西亞 / 旅人瘋語」Subscribe 睇片再比個Like禁個鐘仔啦!~
鋒加西亞/旅人瘋語 Youtube Channel
主要影片 ：
- 【泰國】【芭堤雅】誤入邪骨!? 芭堤雅色情行業真相!
- 【歐洲】人有三急在歐洲怎辦? 卑鄙無恥! 歐洲免費廁所全攻略
- 【希臘遊記】絕美海濱! 雨傘雕塑! 寫意的希臘「塞薩洛尼基」一日漫遊!
- 【希臘】型爆海盜船酒吧扮魔盜王！超值60蚊一杯包遊船河！？
白濱系列 :
- 【和歌山】【白浜】白浜七大溫泉評價! 熱到烚腸仔? hea到似街市? 浸哪個好一一盡錄!
- 【和歌山】【白浜】超高性價比溫泉酒店介紹!(上集) 最平最型，兩層複式+望海露天風呂，竟然港幣千零蚊!?
- 【白浜】【和歌山】超高性價比溫泉酒店介紹!(下集) 「白浜館」好味到難以置信的一泊二食︱房內優雅露天溫泉+市中心對正沙灘，勁抵住!
旅行故事系列 :
- 【台北】誤闖台灣三溫暖，內裡竟然係……嚇死人咩！
- 【格魯吉亞】最慘的4小時! 格魯吉亞地獄小巴之旅!
- 【波蘭】在納粹集中營，我竟聽到了……一世難忘的恐怖回憶!
- 【台灣】我在台北拾屍的經驗︱美女強吻? 艷福無邊? 浪漫奇遇? (新片呀!!!!!!!!!)
================================
Email : funggarcia@gmail.com
www.facebook.com/Garcia.in.Germany
文章同時刊於以下平台，請各位多多支持呀!!!!!!!!!!!!!