上回臨尾話改Plan係咩意思呢？
事源根據計劃，我離開蒙特內哥羅後，就會到位於其南方，巴爾幹半島另一個國家Albania阿爾巴尼亞，並以其首都地拉那Tirana為第一站
但係Kotor時，同房一位來自維德角島的女孩向我介紹阿爾巴尼亞北部有一條隱世的河流路線，風景非常優美!說完就借左本Lonely Planet比我啦~
說來慚愧………….做左backpacker咁耐，真係第一次睇呢本國際頂級既旅遊指南……..
根據指引講，要走呢條路線就要先到北部城市Shkodra
其實書中所述都仲有好多唔清晰及不確定因素，唔理啦!我一聽到“無乜人去過”呢5隻字就會發癲!一切去到當地再算～
不過我本身就只能係阿爾巴尼亞stay 4日，而家個schedule又要大執位啦……
去阿爾巴尼亞無來往其他歐洲國家咁方便，需要去到邊境再轉車，而且每日班次不多，宜預早plan定!
以下呢個蒙特內哥羅既check交通website應該會有d幫助～
www.busterminal.me
而我則要先坐巴士到Ulcinj再轉車，車票又無得預售，如果sold out真頭大la…..
但呢d都擔心唔到太多，去到先算啦，總算好運，成功買飛上車，向第27個國家阿爾巴尼亞Shkodra進發!
個零鐘後終於到達!
但落車之後我完全唔知自己係邊………….原來根本無車站，所有對外巴士只會停係市中心大水池旁，而且無站牌，更不用說地圖吧
唯有臨時請金田一上身，用一早screen cap低既google map推理一番………
原來Hostel只是車頭方向直行5分鐘………..真on居……..
check in，settle down，食埋個lunch，就開始探索下呢個北部最大城市啦～
等等先!又話去搵河流既？？？
原來去到hostel問主人，果條河流正確係個湖叫Komani Lake，要去既一來一回要全日!而家太晏只能聽朝再出發!
即係我要再分多一晚for stay here……….死啦我夠唔夠時間完成我於Albania既旅程ga…….
唉唔理啦!既來之則安之
(個lunch算幾好味，焗芝士薯仔茄子肉碎，但一邊食一面有烏蠅……)
(雖然無冷氣，但把風扇夠勁，頂得住)
Shkodra比我既第一印象———–極熱，極焗，極多塵!
氣候感覺和薩拉熱窩及Podgorica相似，但沒有冷卻城市的河道，亦沒有高樓大廈遮陰，太陽萬里無雲咁直曬落嚟，我懷疑牛扒都煎到well done!
如果話之前Podgorica係殘破，Shkodra比我既感覺則是“不完全開發”!
儘管市中心非常非常細小，尖沙咀會比佢大，但只有最中間的main street及清真寺比較乾淨完整，其他旁邊的小路十室九空，甚至是頹垣敗瓦
這都不緊要，但車輛廢氣及沙塵不時揚起滲於空氣中，以及食飯時無窮盡的蒼蠅，就真係唔好受!
當然仲未計蚊呀老鼠呀曱甴果d啦………
市中心都係咁，其他街道更加係算吧啦六師弟!
得罪講句……….似乎同某d大陸落後的小城市不惶多讓………..
(呢支野1.5L，熱到我隊哂!)
第二印象係————–治安極差!
一落車已經有街邊女人小孩問我囉錢，仲要係唔止一個! 有d會阻我去路，有d更加想掂我背包!
我梗係霸氣地眼神制敵凶走佢啦!
但估唔到中央大街上d本地細路都識呢招!
散散下步會有死靚仔走過嚟，囉起拳頭，作勢想打你、兇你，一秒之後就會行開fuck你
旁邊亦不時有人大叫“hey Japanese!”，“Stupid Asian!”
當然我係唔會糾正佢地ga啦，面對此等挑釁，唯有冷冷一眼，一笑置之，同自己講 :「佢地少見亞洲俊男，好奇je～～～」
第三印象係—————–狂熱份子!
話說係Shkodra既第二晚係世界杯8強，德國贏法國1 : 0
假假地德國都係我半個屋企，贏波，我開心係正常ar~
但點解阿爾巴尼亞人會開心過我ge？？？？
應該唔止係開心，係瘋狂ar! 成街人喪哂!
周街跳舞、狂歡、叫囂都係小兒科啦! 大馬路上，幾廿架車拉哂德國國旗響鞍狂飆頭文字D!!!!
後來更加有人爬燈柱燒砲仗放煙花，仲停哂車封死左主馬路嚟大慶祝!!!咁當然係造成超級大塞車啦!!!
當日克羅地亞同波斯尼亞贏波d本國人都無咁癲呀!!!!!!!
唔通我穿過左隨意門返左德國自己唔知？？？？？？
我問當地人，佢地話一方面有個阿爾巴尼亞足球員去左德國搵食，愛屋及烏 ; 另一方面阿爾巴尼亞人對德國有情意結，特別鐘意
哦～～sor突s呢～
即係等同於姚明一打NBA即刻多人鐘意火箭隊，香港人對英國隊有情意結，曼聯贏波要魚拉突一樣
呀………我寫到呢個moment先諗起………德國贏世界杯果日……Shkodra究竟會唔會似電影皇家特工Kingsman間教堂咁狂亂狀態呢……定呢個城市已經唔存在係地圖上ga la……..
（無睇過就去睇下啦～Colin Firth教堂以一敵百果幕超型!）
Shkodra市內基本上係咁多啦，其實真係無野玩+無野睇，仲有d危險tim
但神奇地，我竟然見到永安旅遊巴!？真心服務你!？
一班香港來的旅客甚至同我嗲左幾句!係咁既地方聽到廣東話真係好開心呀!!!
咁Shkodra值唔值得嚟？
其實旅客來此都係為左去周邊的城外鄉郊，重要景點The Mes Bridge我真係無時間坐車去，評論不能!
至於我來此既目的Komani Lake……………
又寫得太多啦!!!!下回先講!!
========================================
補完此Blog上未成文的相片和無聊閒事:
My Facebook Page : www.facebook.com/Garcia.in.Germany ，多多支持呀!~