你估我唔到!克羅地亞都未玩完，我就突然東行離開地中海，直衝到巴爾幹半島中部，開始波斯尼亞的探險之旅啦!
全名“波斯尼亞及黑塞哥維亞”（Bosnia and Herzegovina），其國土基本上係接收哂前南斯拉夫既領地，以內陸山區為主
呢d地方真係………唔係新聞話佢打緊仗都未聽過呀…..
當然而家已經無事啦，唔係我點會去ge～唉講開，都係因為打仗我先去唔到烏克蘭g ma……..
有好多烏克蘭美女等緊我去拯救ga…….
都係講返波斯尼亞啦～
資料搜集過後，決定以公認Bosnia最靚既城市Mostar(莫斯塔克)為我首站～
由Split出發，巴士車程約2-3小時，車費約港幣$100鬆d，途中要過關check passport，不過會有海關上做的，唔使落車
而進入波斯尼亞後，明顯整個環境氣氛都不同，克羅地亞是地中海既熱鬧風情，波斯尼亞則是高山高山同高山
車程沿途所見，都是一大片深綠群山，河水亦作翠玉色
更重點既係，一落車就熱到黐肺!山區盤地無風呀!!!!!!
（中央巴士站，會有好多hostel人兜客，要小心受騙）
於熱情民宿式既hostel settle down後，急不及待就要衝出去睇下呢個國家係點樣啦!!!!
儘管知道係貧窮國家，但都估唔到一個重點旅遊城市會殘破至此———-
漫步於一條女人街咁上下、小市集式彎曲街道的市中心，越發感受到此處與同為前南斯拉夫共和國的克羅地亞，以及斯洛文尼亞風格上的不同
克記係地中海似意大利，斯生係歐洲風，波仔則洋溢住回教式阿拉伯氣氛!
市內不難找到清真寺或其特別建築，為城市添上一份神秘，一份莊嚴
而內街地面鋪滿一舊舊磚頭咁大既滑石，靚係靚，但我著住波鞋行都覺幾“un”腳，著拖鞋更係會跣，如果踩單車既話，羅友唔開鮮花盛放先奇!
（主要大街都無乜人……..唔通因為太熱？…）
沿著大街前行，好容易就會嚟到Mostar既地標—–白色拱橋Old Bridge啦!
Old Bridge高約5層樓，橫跨內雷特瓦河Neretva，是Mostar古時兩邊山城的唯一連接
打仗時曾經被嚴重炸毀，至近年先徹底修復，當然係follow返原貌去做啦～
橋頭博物館有詳細資料video講述此事，有興趣可以買定爆谷慢慢睇～
至於我睇左十幾分鐘，就覺得外面條橋既靚view吸引我多d啦～
此時吹來陣陣涼風，波斯尼亞藍黃色的國旗在起舞飛揚，老實講，真心覺得有d型
但我唔似某個在大陸搵食的藝人咁「看到國旗升起時，我哭了!（國語plz）」，所以都係舉起相機係咁shoot算啦～
（橋下之景）
（橋遠之景，真係幾正!）
（望返舊城，又係唔錯～）
講真呀，橋就真係見得多，外觀上Old Bridge都唔係特別壯觀宏大或華麗觸目，但總覺得有種與別一同的吸引力，係真係幾靚下!
配埋清澈冷涼既河水，令人不自覺會安坐這裡細細玩味
於是，我有起碼一個鐘時間咩都無做，就咁坐係橋下，腳浸河水食住雪糕睇人釣魚～寫意哉!
穿過市中心，來到Park Zrinjevac!
此公園無乜特別，但作為中國人，特別係香港人你一定要到!
因為呢個彭福公園裡面，放左全世界最有名既中國人的銅像!
佢在生時傲視天下，受萬人景仰，係地球上最鍾意曱甴既人，亦係人類有史以來唯一一個公開話自己有三隻腳而唔比人話咸濕ge男人!
無錯!!!!!!佢就係————北斗拳四郎!!!!!!!!!阿打打打打打打打打打打打打打打打打打～～～～～
得啦個gag爛左啦～
其實真係唔明，點解小龍哥既銅像會出現係呢個偏遠國家既小城市，仲要身處於一個比當地居民休憩既社區公園內？？你話佢整個batman像我都無咁詫異呀!
唔通呢度同唐山大兄有d咩關係？
真係想問下沈旭暉教授李小龍與波斯尼亞的國際關係……..
（影相時有幾個大學生話幫我揸機叫我合影，但如果扮住影既一定柒不可耐，婉拒了～）
唔好睇呢度upupdumdum，但夜晚既Mostar反而更加有活力，何況又世界杯緊呢～一掃白日炎熱既悶氣!
何況Old Bridge既night view都唔錯呀～
其他城市既窿窿罉罉我唔詳細講啦～
最後一如以往既餐廳同Hostel推介～
位於橋由東往西走左邊行多兩步既Hindin Han，可嘗波斯尼亞傳統菜式～
但我望住個menu見都係肉啦肉啦同肉啦，所以就要左個乜都有既拼盤
咁就大鑊啦………比左座山我!牛扒肉卷香腸牛仔肝，點食得哂呀!？
我加埋啤酒同酸忌廉，埋單只係$110港幣，個拼盤$75!？ 而味道又真係唔錯wor!
於是第二日encore，啤酒+作為starter既奄列，埋單唔使$50!
奄列以蘑菇及風乾火腿做basic，蛋又香又滑又大份（但多油），係於外國食過最好食既炒蛋!（英國果d唔該死開!）
（ 窿窿）
（ 罉罉）
（鍾意食蛋既我，到而家仲回味緊!）
Hostel Majdas有d難搵，不過距離火車站真係好近
由3位不同年紀的女士主持，整潔不特止，仲有窩心既welcome food drink及breakfast，以及家一樣既感覺
嚟Mostar既十級推介～
Mostar係一個超級細既城市，但因為勁靚既山城加有河流貫穿的關係，令佢搖身一變成為勁吸引既觀光小鎮!
基本上嚟個One Day trip都夠玩哂～之不過我又stay左係度兩日
第二日我做左d乜？
haha………精彩law～～～～下回繼續!
========================================
補完此Blog上未成文的相片和無聊閒事:
My Facebook Page : www.facebook.com/Garcia.in.Germany ，多多支持呀!~
(就嚟到900人啦!Yeah!!XD)
=====================================
請大家有興趣既去follow下我IG啦~
================================
我既Youtube Channel正式開通啦!!!!
新影片已upload，快d Click入 「鋒加西亞 / 旅人瘋語」Subscribe 睇片再禁個like啦!~
=================================
- Email : funggarcia@gmail.com
- www.facebook.com/Garcia.in.Germany
文章同時刊於以下平台，請各位多多支持呀!!!!!!!!!!!!!