話去韓國，相信十個男人有9個都叫救命!
一個人去又唔知玩乜on居居 ; 同女朋友去，佢掃街掃衫掃化妝品時，你行其他野又比人鬧，睇其他女又比人鬧，只可以係後面做小桂子抬戰利品，仲要閒閒地一抬就抬10粒鐘起跳，真係去旅行慘過做咕呢……..
以上係我不少男性朋友既血的申訴，與我無關，因為 ——- 哪有女!!!!!!!!!!?????
所以今次就特登分享我去釜山時既一d非女性向，兼有返咁上下剛陽豪氣，甚至一支公都仍能逍遙自在既男性私房活動，比各位兄弟係旁邊果位血拼時可以抖下氣，造福下苦海中既羔羊!
唔係wor…….不嬲釜山都無首爾咁商業咁多野賣ga wor……..
你真係咁諗?…….
呢個世界，連原力都阻唔到女人shopping ga……. May the force be with you…….
1. 實彈射擊場
唔記得聽邊個講話，南北韓其實到而家都未簽過任何條約，所以根據國際法兩國仍然屬於「戰爭狀態」，希望呢兩日金仔同寅拖完手會好返啦~
我懶得去fact check流定堅，只知實彈射擊呢件事係韓國真係好普遍!
北韓就簡單啦，只係板門店大叫「食蕉啦人造人19號」就試到 ;
南韓都無問題，係釜山，海雲台海灘10分鐘步行範圍內已經有兩三間消遣用既實彈射擊體驗店~
我就跟住hostel既地圖，嚟到呢間「海雲台實彈射擊場」
間店個門口………..我只能講真係好大陸feel ar……
店內空間都頗大，且燈光昏暗兼一個人都無，更加似大陸d死城ar……
牆上則放滿槍械同有關介紹，感覺有d專業，但點解我會有置身保齡球場既感覺ge???
所謂久旱逢甘露，可能太耐無客，店主一見我即刻興致勃勃咁過彈嚟詳細講解~
望下下面個表先~
簡單講就係越多子彈就越貴，而每個plan都可以玩哂自動步槍同左輪兩種，好似我咁想扮孟波既，梗係要揀357 Magnum左輪啦!!!!
邊個係孟波? 咪即係冴羽獠 law
邊個係冴羽獠? 咪即係城市獵人law
邊個係城市獵人?
……………………..
如果有人覺得呢套經典係指果套垃圾韓劇ge，你可以出返去了…….
老闆話最貴既plan可以玩埋Scorpion機關槍，唔使上上下下左右左右就做到魂斗羅的確非常吸引，但200,000圜實在超級唔吸引呢!
幾分鐘時間射1,400蚊港紙出去我睬你都傻!!!
要最少彈數既20發70,000圜就得啦!
hostel小冊子有conpon加多4發total 港幣490蚊 24發，都係貴，但一場嚟到點都試下啦~
進入槍房後工作人員會詳細講解支槍點用，佢地英文非常流利無問題的~
而且支槍係用鐵鍊鎖死向前，更要穿上防彈背心及帶耳機，安全程度真係有返咁上下
所以大家需要做既，就係舉起支槍，幻想前面果個係你老細，大叫一聲「係洪興嘅標哥叫我黎殺你既ge!」，不停射呀射射他吧!
槍法方面，可能因為我少負氣節，沈厚寡言。又天資敏悟，強記書傳，尤好《左氏春秋》及《孫吳兵法》，所以一發，破其筈；再發，又中。職員大驚，話我可以挑戰遠d 10M啦!
遠左，咪又係咁準~
我只能夠話 —- 叫我做城市獵人~Oh City Hunter~
(on居相呢家野幾多都有~)
(下年春天會有新劇場版呀!!!!!完左近廿年竟然仲會回歸!!!超期待!!!)
不枉我細個交咁多學費比House of the Dead，呢個成績起碼無失香港人既面!
感受既話，真槍既聲效、重量同震撼真係遠比想像中強，24發射出後既反撞力令手隱隱發麻，女仔的話可能會覺得痛tim
所以想像到好似Mark哥 or Devil May Cry咁ge雙槍雄一晚成千發，應該柏金遜咁食飯ga啦
儘管係咁，實彈射擊真係一種與別不同既體驗，絕對可以高速令煩惱退散! 我都解釋唔到點解可以，可能因為男人天生鐘意發射子彈啦
玩既時間唔長，價格亦係高左d，不過相對韓國既安全措施有返咁上下保證，如果想安心體驗實彈射擊既話，呢處係好地方呢~
(好啦，我承認雙槍真係好型……..我又要!!)
2. 海雲台海水浴場 and 廣安里海水浴場
聽海，係一個寂寞的男人沉思解憂既好方法
我既不能幸免，每次去到一個海邊城市，都總會去其沿岸慢步靜坐一番
海灘真係見唔少，估唔到海雲台同廣安里呢兩個真係唔錯!
先講最有名既海雲台，個個都話嚟食海鮮無得輸，但我卻寧願係呢個狹長又整潔的沙灘睇下日落扮下長腿叔叔了
當然啦，睇下女仔都好重要的
晚上的海雲台海水浴場是一片無止盡的黑暗，除非想同女朋友黑暗中對話+唔知做d乜外，真係無乜理由會落去
所以我更喜歡的反而係廣安海水浴場
與沙灘後方平行的是熱鬧的酒吧街，前方則是著名的廣安大橋，只係呢個組合都已經無得輸!
但最主要的，都係氣氛
在十色繁華的繽紛世界中央，唯我一人獨享一小片寧靜
寒冷的海風撫在臉朧，我坐在輕軟的沙土上，耳聽悠悠浪聲，眼看閃爍華燈，如此醉人美景，一陣感觸
唉，又想起前女友了
3. Skybar – Hotel Aqua Palace
學楚原叔話齋「明天總比昨天好」，忘記過去，搵間靚酒吧飲返杯啦~
轉身望下後面———-d呢棟野咁高既，唔知會唔會有skybar呢?………….
係有ga!!!!!!
呢間「釜山水上皇宮大酒店」Hotel Aqua Palace(아쿠아펠리스호텔) 樓高21層，係廣安里海水浴場一帶最高的建築物，如果咁都唔整間無敵靚view酒吧都對唔住各位鄉親父老啦!
真心奇怪原來無人介紹過呢間咁靚既Skybar!? 係呢個位置，可以一邊嘆靚酒一邊飽覽整個廣安里海水浴場既迷人夜景wor，幾咁逍遙自在ar~
可能你會話「天台bar咁浪漫風景又靚，點會只岩男人嚟呀?」
原因好簡單je —– 11月韓國海邊廿幾樓既露天座位，你估下會係攝氏幾多度~~~(笑)
我唔多怕凍都覺冷得我騰騰震呀!
要個女朋友陪你係出面扮急凍豬扒仲要飲凍野，佢唔擰甩你個頭先奇!
但坐係裡面隔住塊玻璃氣氛總係差左d，總之隔住層野既感覺總係唔太好啦
所以我幾凍都頂住，係外面做個瀟灑扮型既男人!
可能實在太型，一班阿朱媽走時比左一疊店家既毛毯我頂住，咁就舒服和暖得多啦~
唔好以為好貴，呢杯我係德國常飲既Kostritzer Draft都係70港紙左右，香港價位，絕對負擔得到呀!
傳聞呢間酒店以「有夜景的汗蒸幕」做賣點，假如對蒸無乜興趣，又或蒸完想補充水份(what!?)，上嚟飲返杯真係一流ar~
4. 一人烤肉
其實呢，要講特色呢間小店南浦屋就唔係太大，只係食物質素非常高，但我想講既唔係呢樣
有無一人行走南韓既朋友同我遇上同一樣的煩惱 ———- 間餐廳唔比你食野呀!
韓國好奇怪! 成日都有二人以上限定既食品，烤豬肉鍋ar辣炒八爪魚呀，我話一條友食兩份都唔比!
而家去食韓燒啦，又係間間都拒絕內進，我幾乎學李小龍甲由一聲jump snap kick踢爆佢招牌ga la!
到呢間hostel推薦既又係咁，仲話要3個人先可以食!
把鬼火，「而家我一個人叫3碟main course係咪唔得先!!」
終於店員屈服，而我就大食比賽咁一個人叫3人份量既肉啦!!
肉呀……..全部都係肉呀……….
第一樣上場既係我個人飛佛豬枚頭扒~
剩係睇個肉食同油花都知無得輸啦!
第二樣則係韓國人認為最好味的五花腩~
仲無啦啦放舊木係面……….原來松茸嚟 ga! 咁既組合又幾有趣wor~
五花腩則比香港既腍滑，連脂肪部份都十分爽口! 配埋個係爐邊滾住既蒜辣汁+紫蘇葉真係無得輸!
最後係———韓牛呀!!!!!!
睇running man睇日都見佢地為韓牛發癲，心諗佢地咁有米食幾多都得啦，使唔使咁誇
但原來韓牛既滋味真係與別不同wor!
一般常見既牛肉，美洲牛多以肉味濃見稱，日本和牛則標榜入口即化，重滑溜及油香
而韓牛我認為岩岩係兩者中間，無和牛入口即化得咁誇張，肉味卻猶有過之，簡直係集兩家於大成呀!
簡單講即係又濃又滑，好味!
唔知係咪老闆見我後生以為我唔識燒，我話左自己動手 ok都夾硬幫我剪開舊五花腩，唉我仲諗住show下call lee原舊燒熟佢成條咬ga~算啦佢都係太好服務je~
另一樣抵贊既係此店全用炭火，風味即刻唔同哂!
前菜仲竟然有辣椒醃生蟹!!! 辣得嚟又超鮮甜甘香，好味呀!!
下? 既然係前菜咁生蟹係咪都有得無限refill? 妳唔係以為我有咁既需要ar? 閣下係咪睇少左我叫果堆酒池肉林既份量ar?????
酒池肉林?……..Ee係wor，怪不得總係差左d野啦 —— 「小二~~燒酒唔該~~」
「燒酒!!!?????」
隔離枱3個韓國男人驚呼一聲，睇異形咁望住我，意思即係「呢條蛋散食座山都唔夠仲要飲酒?? 非洲返嚟 ar?」我先發現原來我一個人成枱野大吃大喝既異相已嚇Q死其他店內食客!
但對我嚟講，果3個韓佬恐怖d law!
食完我個份量既double肉+飯+煎餅外，埋尾仲整個面盤咁大既部隊鍋，呢個食量係撒亞人嚟 ga????
奇蹟地，我竟然食得哂，3人份量既韓燒我竟然食得哂，我即刻覺得腰圍粗左5寸!
埋單又唔係好貴wor，40000圜=$280，香港連一個cheap cheap烤肉放題都唔止啦!
我唔知韓國其他地方既燒烤係咪咁，以呢個價錢呢個質素我真係非常滿意~
如果閣下都係一個人嚟釜山，有個地方比你大杯酒大塊肉豪氣干雲一番，幾寫意呢~
關於釜山既野就寫到呢度~
其實我都仲有去過其他著名景點，例如梵魚寺睇無乜既紅葉(好中式，但都幾好)、嘎卡其市場(可以行下)、冬柏公園(呢個幾鐘意)等
不過呢d野實在比人講得太多了，我都無咩特別感想，反而食野就餐餐都有驚or喜，Facebook Page既「#環球美食吐糟區」有排講呀
好啦，短時間都唔會再寫韓國長文ga啦~
下回………寫多篇「東京雜記」定岩岩去完既新國家好呢?~
=================================
IG果邊間中會有d和Blog及fb page不一樣的相片和story，大家有興趣既去follow下支持下啦~
=====================================
我既Youtube Channel正式開通啦!!!!
新影片已upload，快d Click入 「鋒加西亞 / 旅人瘋語」Subscribe 睇片再禁個like啦!~
================================
- Email : funggarcia@gmail.com
文章同時刊於以下平台，請各位多多支持呀!!!!!!!!!!!!!