以下部份內容技巧涉及賤格行為，非到危急存亡的爆發臨界點絕不建議使用。
========================
前排見到有網友出左篇文教人歐洲邊度搵廁所，一時感觸，回想起當年係歐洲搵廁所既辛酸，忍唔住手痕又寫篇廢野
鬼咩，歐洲大部份國家去洗手間都要收費的，德國就50 cents起跳，當年既匯率即係盛惠5蚊大餅一個，係香港既話即係我5蚊買盒維也奶後要再用5蚊排返出lai!貴到喊呀!
所以我地呢d窮鬼working holiday人，為左慳果幾蚊，有時分分鐘唱足一日忍者小靈精，膀胱脹成個Agnes b袋咁大都唔捨得去釋放自己ga!
但長此落去都唔係辦法，於是大家當然各出奇謀諗諗計，之後就係茶餘飯後交流左一系列免費去洗手間既心得，現公諸同好，希望對其他歐洲窮遊朋友有用啦~
不過而家爆左出lai，d招數以後會唔會唔用得呢……..
(同樣地因為我主要係德國生活，好多例子都以當地為主)
連鎖咖啡店
去得旅行，生理需要呢家野不論大小當然係出門前攪掂左先啦，但如果真係人有三急又唔想使錢，首選一定大型連鎖餐廳、快餐店或者coffee shop，總之係自出自入無隍管形既食店，你都可以靜雞雞扮幫襯地”鼠”入去享用佢地既茅廁
小弟用得最多最方便既，當然係世界著名綠色招牌，總有一間係左近既Starxuck啦!
歐洲大國既大城市幾乎周圍都有，例如柏林既Sony Centre、Hackerschermarkt等著名地標既店都係乾淨企理首選。由於人流太多，你擺明車馬直接入去用toliet都無人理你，咁就免去比人眼甘甘超住”你係咪lai幫襯ga壽頭”既尷尬啦~
(居於柏林時的最日常蒲點Hackerschermarkt的Starxucks)
(Sony Centre)
(日常蒲點2nd)
連鎖快餐店
同樣地，M記、Burger Xing同call我呀雞店都係類似情況，大多數廁所門都係無鎖的，不過同香港一樣會無咁乾淨
以上係大多數店舖既情況，但注意各處鄉村各處例，例如德國黑森林Freiburg既Starxuck就要你比錢光顧先會比toilet門鎖個code你 ; 斯洛伐克Bratislava M記門口有閘，要入50 cents或以上先開等等
另外溫馨提示，柏林Alexanderplatz電視塔樓下間Starxuck個洗手間長年有紅隧過海式排隊，忍到腎虧都未排到呀，放棄吧啦!
(Freiburg間Starxucks好似係呢個城門旁邊)
超大型食肆
如果你係慕尼黑市中心，咁著名既HB餐廳亳無疑問係你既尿液釋放首選
呢一種無waiter幫你帶位既大型餐廳，基本上同上面講既coffee shop一樣turnover太大，自出自入根本就無人理你，應該話係無人會認得你
而且一間坐到成千人既餐廳，一定會有足夠既toilet數量，咁就唔使排長龍等餐矇啦
之不過酒吧既洗手間…….你懂的……..又未去到看見左格有兩個黃伯四隻腳粗壯雪白ge，只係衛生方面可能有d d問題law…….
而且仲有一個問題，就係旅行中都唔係咁易知道邊度有呢種餐廳，我都係除左HB之外就唔知歐洲邊度仲有………
網友們有心水既，還望告之!
(我強烈懷疑入嚟HB既十個有九個都係為去廁所)
酒店+旅館
作為一個遊客，唔識路，好正常呀!入酒店同hostel問路，好正常呀!再順便借個洗手間用，咁就更加正常呀!
一般門口reception都係一d親切可人既少女，禮貌地
電佢兩野問佢應該都無問題
舉例說 : 「靚女，妳真係索ga je，可唔可借個廁所用下？」，再比個梁朝偉既眼神佢，即刻無得輸，包你路路暢通
旅館洗手間既好處係一般乾淨程度都會達至滿意級別，並且非常易搵!
而呢一招更可以係全世界既“廁所衛生程度有唔太好”地方使用，例如係阿爾巴尼亞首都Tirana我就成功以此解決肚瀉，明乎其實一招傍身，世界通行!
但壞處係有d旅館真係會唔比外人使用洗手間，並且比人問起「sir，有咩幫到你」時會超尷尬!
如果你怕比人知道你爆石ge，唔緊要，你記住茫茫人海，你同佢只係呢一分鐘既朋友，呢世都唔會再見到呢個reception ga la～
(右邊果棟就係Tirana最靚既酒店，好似係)
油站& Information Centre
除左以上之外，如果真係好急，油站同information centre都有機會有free toilet
不過只限偏遠地區，例如捷克返德國既高速公路中途站，挪威北部至瑞典的山區，以及丹麥Mont Klint的Information Centre等
但我都試過係波蘭油站既廁所要我比錢先入得，問題係架巴士本身係立陶宛至柏林，只係凌晨三點穿過波蘭而已，夜mama我邊度搵到地方找換波蘭幣ar，門口阿姐又死都唔收歐元，終於我要忍龍上身忍到下個停車站…………
(立陶宛經波蘭返柏林呢一轉急尿快車，呢一世都記得個巴士姐姐同我講巴士上個toilet “It’s full”個尷尬表情)
博物館and公共交通工具
另外大型博物館免費展覽部份都好有機會有free toilet，如柏林博物館島既德國歷史博物館同慕尼黑唔記得左叫咩名又係地圖搵唔返既博物館
公共交通工具如巴士上，火車內都係免費的，我就曾經為左小解而上船遊左一轉柏林Wannsee，反正有月票唔使錢～
匈牙利既溫泉，芬蘭Suomenlinna要塞內，地中海既海灘同埋人地屋企既花叢都係免費的
仲有，唔100℅肯定，英國殖民地系列國家都好似多免費廁所，至少香港同馬爾他都係
(來往Wannsee的船，有DB Tickets就可以上船)
(赫爾辛基既芬蘭堡Suomenlinna)
(唯一一張廁所相，因為當時係Suomenlinna差d凍死，好開心搵到個廁所避一避寒，第五十八章 : 赫爾辛基冰上要塞，凍過北極!!)
假如以上咁多方法都無一樣解決到你既緊急狀態，我覺得百貨公司會係最佳選擇，因為真係乾淨，就算要比錢都無計
只不過，講實話，如果你扮唔知，見到門口個兜都唔比錢快手快腳走左去，其實真係唔會有問題，最多都係比打掃阿姐背後鬧兩句
但呢個就牽涉到個人道德操守問題啦
就好似巴士唔讓座，法理上無問題，但道德上會比人媽叉到上天花板
歐洲經濟唔好，清潔姐姐分分鐘係等你果50cents廁所小費開飯ga
岩岩你個咖哩蛋糕整得咁開心，人地幫你執手尾wor，比返少少人好應該ar
記住一般德國公價係50cents即約$3.5至$5港幣起跳，我初到歐洲時唔知，以為20cents成2蚊已經好多，立刻比阿姐x到反艇……….
(成個德國都有既大型百貨公司Galeria，搵洗手間無難度)
(SORRY我搵唔到更優雅既相片)
萬一真係連比錢既洗手間都無，鐵路站、酒店旅館、百貨公司乜都無，又或者凌晨時份係街上啤酒飲太多急到瀨既
我建議隨身帶備解決3寶 ———— 橡筋、水樽、盆栽! 至於用法方面大家可以自行決定………………….
就地解決啦!!!!!!!!!!!!!
搵個角落頭渣渣臨攪掂佢!唔好扮咩道德人，你真係急到爆炸既又無洗手間ge話係咁解決ga la!
柏林街角有唔少隱蔽處早晨時都會飄著陣陣濃郁芳香的阿摩尼亞，有德國人話原因就係柏林夜生活太豐富
所以雖然唔建議咁做，但危急存亡之秋時，學習下柏林地道文化都無可厚非的………
我既concern反而係要學哂咁多國家既“唔該借借”點講法真係好煩…………用google translate發音得唔得ga呢？………….
其實，大小二便，人有三急，生理需要嚟ge，人皆有之，如果真係頂唔順既，入鄉隨族，比錢去洗手間都係合理事
最終如何選擇，就各下自理啦～
總之希望大家係歐洲去得暢快～
=====================
好多靚靚地相片及無聊小故事的Facebook Page :
My Facebook Page : www.facebook.com/Garcia.in.Germany
Instagram : https://www.instagram.com/fung_garcia/
有咩就Email我啦 : funggarcia@gmail.com
請繼續多多支持呢~