尋日cooking class後，我再次lai到呢個網民一致推薦峴港旅行必到的古鎮會安Hoi-an
講起會安，其實一開始我係拒絕的
峴港周邊可以玩既地方太多了 : 順化古城有柬埔寨feel，巴拿山有超長既索道影相，甚至有出海快艇玩遊島，最重點係google ”Hoi an”時真係搵唔到d咩震撼人心既靚人靚景lai吸引我去!
Old town呢家野大大話話都去過百零二百個，有50%去完後既comment都係”啊係咁先”，我今次越南得4日3夜，浪費一日既cost太高了!
之不過，整合中外本地各方人士的不同評語，上面3個地方都各有缺點，只有會安呢個地方係一致話”要去抵去必須去”，加上尋日街市tour時匆匆一督既感覺都幾好，所以就”係啦好啦是但啦”
到達會安後第一件事梗係租架單車先啦~單車遊古鎮，真係聽到都爽~
租車費方面，都唔知呢個咩銀碼lai ge，$12租全日，放低passport就得，我租lai觀賞用齋睇都抵呀! 只要唔係扔落河就得啦~
有左架車梗係去d遠d既偏僻景點~
第一件事就係去Tripadvisor大推薦的法包店Phi Banh Mi咬支法國棍先!
15000越南盾=約$6一大個外脆內軟，正呀喂!!!!!
同老板娘吹兩句水，佢suggest我應該整件恤衫，話會安呢度好出名的
我話唔使啦唔夠時間，佢竟然話識得有人可以好快做，又好平又好靚可以帶我去……
我即刻覺得佢有d幫自己友搵水魚既feel……一句唔使就渣車絕塵而去
我始終都係對太過熱情的人有戒心呢……
渣車(單車)去距離市中心約半小時步行路程的Jack’s Cat Café~
我唔係貓奴唔係貓叔，但比動物玩都係樂意的
GPS show去到果條巷仔度———-做乜乜鬼野都無ge…….
街頭街尾兜兩轉，先發現一個中國式門面既大宅就係，旁邊貼住張紙今日休息…………..
我又白痴地功課做唔足啦………..
咁無計，返會安開始漫遊市中心啦~
入到鎮既我好快就發覺架車其實無乜用，一來個鎮太細，二來人太多，要左穿右插細味古鎮風情加行街shopping，行路真係仲interesting!
所以入鎮後渣左10分鐘就真係鎖起佢齋睇
(就咁lock左係度，一陣再返lai~)
行左陣，話咁快，對於呢個古鎮我就有少少鐘意左佢了~
唔止係個鎮既顏色係黃甘甘啡啡地岩我心水(咩原因lai??)，更重要係呢度無大陸古鎮果種娘味，保留住純樸與傳統，就像回到數百年前的越南一樣~(當然我唔會知其實應該係乜樣)
講真，遊古鎮都係為左睇呢d je，諗起桂林陽朔個象鼻山後面全部都係污糟灰白工業大廈真係想死………..
行深入d，就去到尋日cooking class ge會安中央市集
又周圍玩下先~今日可以慢慢行下個街市睇下有咩斬獲啦~
Ee個芒果幾靚wor~阿姐你個Mango點賣………係妳放係呢度果個Mango點賣ar!
40000越南盾近15蚊港紙?
妳當我傻ga? 個價開到咁高，還價15000就差不多!~
阿姐即刻黑面扔走個芒果再講左句野，我知道佢一定唔會係講粗口啦~
講下價je~唔岩價都唔使發脾氣ge~
(特登影低呢塊試食芒果皮lai記低此事~)
另一個靚既地方就係河邊啦~
會安有好多幾步路過條橋就去得到的離岸小島，河邊有不少船夫一樣會煩人地主動撩你上船玩，不過絕對可以唔使理佢!
因為係呢個美麗河岸最應該做既事唔係妹妹妳坐船頭哥哥我on99，而係搵間河邊coffee shop整返杯味帶香又帶甘既黑咖啡，讓舌尖徘徊在似苦又甜之間，一邊欣賞路上既越南美女，一邊欣賞搖曳綠柳輕舟飄~
又或在清涼濕潤的微風中漫遊文字世界~悠閒地度過一個下午~
真係諗起都回味~咁先係渡假ga ma~
嘆完咖啡，夕陽開始變得無限好，把泥黃的小鎮再披上一層金黃
真係估唔到咁樣撞色都幾靚wor!
原本諗住天色已黃昏就鬆人，點知facebook有fd留言話呢度d夜景好靚
係真唔係ar~就睇下妳有幾巴閉~
而我慢慢發現隨著天色漸沉，日落如霧燈，個鎮點解越來越多人ge??
人流量由下晝既旺角變成聖誕12點既尖咀!!!!
而我架風馳電掣孖輪車亦即刻變左手推車!!!
又真係估唔到，夜左既會安完全係另一番景象!
日間的古樸純真轉眼變成繁榮熱鬧，功臣正是一棵棵澄黃華燈，不但將沿河兩岸映照得璀璨奪目，更將整個會安變成了古代的園遊花燈會
那種如節日慶典般的熱鬧，把「美麗夜景」升上了一個更高的層次，係我完全無想過會在此體驗到的
Night view就應該要係咁，樸實無華，大巧不工，好似上海周莊同湖南鳳凰古鎮果d花呢碌又扮現代化，夜晚仲要幻彩詠香江咁lai把鬼咩，要睇燈我去行IKEA啦!
會安，一定一定要睇埋夜景先走!!!!!
(手震，d夜景相比比面ar)
最後仲有段小插曲 :
話說我打算坐20:00既會安Express返峴港，我19:45去到上車點，職員同我講架車開走左!!????
What!? 我真心未聽過會有交通工具會早成15分鐘咁多開走!
問多兩句，佢改為怪我點解唔早兩個鐘預約，原來timetable下面有行好細既字寫住，但係我由峴港來會安時都係15分鐘前到達就有車wor
好，算，係我唔岩，咁我唯有等一個鐘後班車la
轉頭想出去行多陣時，exactly 20:00去峴港果架車就lai到!!!!係有大把空位但職員點都唔比我上!! 我問個職員點解佢一開始話架車唔係去峴港，chok多佢兩句就反口話因為我無預約
真心覺得呢件事痴媽筋!
而更痴媽筋既係，真正上車前我同佢講「我還單車啦」，個職員「哦」之後呆左望住我，我無表情咁望住佢———–呢個動作keep左15秒
職員一臉疑惑「yes?」
yes你老板咩!!!!我個passport呀ye s!!!!!!
職員繼續一臉疑惑「你有擺到passport係度咩?」
…………………借單車個手續係妳幫得攪ga…………
(就係呢位職員同呢架”唔係返峴港”既車)
最後講一講交通先~
去會安最平既方法係坐公共巴士，車站於峴港粉紅色大教堂外，單程大約$10港幣就ok~
缺點係唔舒服，兼且班次疏、唔準時，goolge話車程約100分鐘，網上有人話45分鐘，總站距離會安舊城區約20分鐘步行，回程巴士下晝5點就收工，所以並唔係多數遊客既選擇
最受歡迎既係shuttle bus~
多數酒店都會有自己的shuttle bus往來會安同順化，如果好似我咁住hostel，都可以去坐Hoi An Express，買飛同上車地點係Han Market旁邊，單程約$40港幣，但會直接去到old town，車程約45分鐘，重點係每小時都有車來回until 22:00，而且坐得都算舒服，個人來說是推薦的。但記得早一兩小時預約。
另外如果係Big C消費夠唔知幾多係可以坐佢地既免費shuttle bus去會安的，當然，妳消費左既銀碼一定會多過妳齋買車飛既銀碼。網上有好多關於呢個交通方法既闡述，我未用過就唔多講了~
好啦~會安就係咁多~
岩岩講呢個其實係我既Day3，Day4只係去左五行山同去嘆咖啡，係前一篇已經講左就唔重覆了!
所以窮遊越南系列就暫告一段落~~
下回開新野!!!!記得繼續支持小弟啊!!!!!
=================================
我既Youtube Channel正式開通啦!!!!
快d Click入 「鋒加西亞 / 旅人瘋語」Subscribe 睇片再禁個like啦!~
岩岩開始，完全未有人睇呀~
=================================
IG果邊間中會有d和Blog及fb page不一樣的相片和story，大家有興趣既去follow下支持下啦~
Instagram : https://www.instagram.com/fung_garcia_backpacker/
Email : funggarcia@gmail.com
My Facebook Page : www.facebook.com/Garcia.in.Germany
Medium : https://medium.com/@funggarcia
另外文章同時刊於UBlog、 DC Fever Travel、 Blogspot 、遊牧爆谷，請各位繼續多多支持呀!!!!!!!!!!!!!