出世到而家30幾年，每年去尖沙咀不下二百幾次，真心唔知九龍鬧市中竟有「訊號山花園」這座秘密花園!
而且園內寧靜無人，仲有維港海景、歷史古蹟做影相位tim!
當然可能係我新界仔見識少未聽過，但我到訪時所見香港人真係只有小貓數隻，大尾篤係佢二百倍!
雖然明知而家講出嚟佢可能又變另一座嘉頓山，不過我作為旅遊Blogger既宗旨就係要介紹鮮為人知既秘密地方嗎!
秘咩密ar~~~~~~~ 大把菲律賓姐姐係度野餐開P歡樂今宵呀~
有時我都諗，d姐姐分分鐘比我地更熟悉香港有咩窿窿罅罅……………….
===========================
延伸閱讀 :
===========================
- 文章概要:
- 地理位置
- 入口與中層
- 訊號山花園
- 訊號塔
- 訊號塔內部
- 花園其他地方
- 地理位置
「訊號山花園」地近尖東，正式入口係棉登徑緬甸臺，不過由尖東中間道出口行入去都可以~
作為一個曾經既大學生，當年係棉登徑都唔知經歷過幾多場生死搏鬥，那段「3舊水任飲，用個肝做人」的日子真係令人不勝唏噓~
邊會估到十幾年後我會為行山打卡而來呢度!
Anyway，呢個就係入口啦~
痴線真係30幾年來都唔知尖沙咀有個咁既花園……..
- 入口與中層
唔好比入口果條大斜路嚇襯!
雖然睇落又彎又長又有d斜，但幾分鐘攪掂ga la~
上完斜首先會見到平時阿伯后翼棄兵既枱凳，而家已經比姐姐開P用
反正呢個位無咩野睇，繼續上樓梯啦~
如果行左方的樓梯首先會見到洗手間，而右方的辦事處則有少許西方藝術風格~
攝影技術好而又有個靚女model既，應該呃到下like ge~
- 訊號山花園
再上樓梯就係訊號山花園了!
講真環境又真係幾清幽wor! (唔係星期日的話)
唔止可以從高處遠望北角，欣賞維港海景，呢排春日回暖更有鮮花盛放~
尖沙咀竟然有個如此景色怡人，又寧靜舒適的避世之處!?
 |
| (宮粉羊蹄甲) |
 |
| (宮粉羊蹄甲) |
- 訊號塔
不過要數最吸引的，都係「訊號山花園」的地標 ————— 法定古蹟「訊號塔」!
根據網上資料 ————-
訊號塔又名「黑頭角」或「大包米」，在1907年建成。塔身現高18.9米，建築帶有濃厚的古典巴洛克色彩，並加入當時流行的愛德華式裝飾特色，以紅磚配上淺色石構件。塔身呈方形，角位捨用常見的方角，採用雅致的斜削角。紅磚為特別燒製，並採用英式砌法，石作則以本地花崗石雕砌而成。其他建築特色包括花崗石基座、腰線和檐口，以及「吉布斯飾邊」的窗戶…………..
簡單嚟講就係一座帶有濃厚歐洲古典風格的歷史建築啦!
而係二十世紀初，訊號塔負起向維多利亞港船隻報時的工作。另外，訊號塔旁邊還有一座小型建築物，在熱帶氣旋吹襲香港的時候，該小型建築物就會掛起風球訊號到半空當眼處，以讓附近的人士清楚看見。
即係話，呢度根本係香港繁榮進化的重要一環! 非常具歷史價值!
不過我打咁多字(copy & paste)都無咩用，因為多數人既思考模式都只係「wa好靚wor!打卡上IG先!」
好多人口口聲聲話保育本土文化，係岩ge，但唔該再了解多d我地住既地方tim啦!
至於講咁多大道理既我——- 唔好意思，我都係嚟影相的~
 |
 |
| (我個茱麗葉呢?…….) |
- 訊號塔內部
塔外影既羅密歐茱麗葉feel唔係好岩我，亦唔好打我
塔內反而更饒有趣味~
白色螺旋樓梯，棕色矩形門窗，看戶外鳥語花香、眺遠處維港海景
不錯!
- 花園其他地方
另外，呢個花園有唔少長椅位於不順路兼隱蔽的花叢旁
相信設計者的原意係想比遊客坐係度賞花餵蚊，絕對唔係比醉酒男女嚟打war game嘅~
但由於我未證實到，所以搵晚我係尖咀食完飯嚟散步時再實地考察一下，先再同大家再報告報告啦~
 |
| (我寫包單呢度夜晚一定超神秘~) |
「訊號山花園」就係咁多~
其實第一次我去時天陰覺得d相唔靚，所以搵日平日放工天氣好時再去影過
第一次係星期日，都有d姐姐同香港遊人，但都真係唔多 ;
第二次係星期五下晝，真係鬼影都隻! 唯一見到辦事處實Q阿姐出嚟吞卜，佢仲用超奇異既目光望我，心諗呢個地方點會有條腸粉係度影相
Anyway la~ 我估附近d OL應該都幾熟呢度，因為此地絕對係Lunch靚view食飯盒既首選!
一個九龍鬧市中的公園竟有齊維港風景、古蹟建築，實在係非常難得!
大家嚟尖沙咀行到悶、食完飯，不妨嚟呢個充滿歷史文化，又寧靜舒適的綠洲休息下~
===========================
請大家Follow我Instagram啦~
=====================================
我既Youtube Channel正式開通啦!!!!
新影片已upload，快d Click入 「鋒加西亞 / 旅人瘋語」Subscribe 睇片再禁個like啦!~
=================================
相關篇章 :
- 香港郊遊
《004 – 赤徑與鹹田灣，宛如沙巴的美麗海灣》
《005 – 沙田行去慈雲山，原來超級簡單》
《006 – 大埔三門仔，零難度的全海景輕遠足》
《007 – 西貢大灘郊遊徑，長者行山無問題》
《008 – 飛鵝山芒草之行》
《009 – 粉嶺鹿頸至谷埔︱夕陽下的隱世蘆葦田》
《010 – 青衣自然徑︱馬灣海峽+青馬大橋無敵日落美景》
《011 – 大美督家樂徑︱4大隱世絕美風景》
《012 – 上窰郊遊徑+曝罟灣堤圍︱超強打卡+輕鬆行山首選》
- 發掘香港
《1 – 香港Staycation首選，皇家太平洋酒店住後心得》
《2 – 城市步行︱鯉魚門的絕美日落》
《2.5 – 鯉魚門石礦場︱夕陽下的芒草群》
《3 – 己連拿利︱港島攝影秘景，宛如荒涼未來的異世界》
《4 – 香港的希臘小店，味覺的新衝擊》
- Email : funggarcia@gmail.com
