我係加拿大黃刀鎮Yellowknife又睇到北極光了!
點解我會用個又字ge?
如果係小弟既老讀者，可能都會見過我12年前紅過下既一篇《北極光全攻略》，果次係係挪威Lofoten Island見到ge，當時我仲係歐洲一人瀟灑流浪中~
後來認識我身邊美女後，佢講過幾次好想去睇，咁岩2026新年假請2放9 Asia Miles都有機票去加拿大，又咁岩係極光爆發年，就順理成章去碰下運氣啦~
而結果係……
其實我都唔知呢個Trip叫好彩定黑仔，因為極光的確係睇到，但除左睇到果一陣極光之外，其他野都係一塌糊塗……
請大家Follow我Instagram啦~
另外Threads果邊有我其他教書、旅行和大學時代既攪笑/悲慘故事，快d follow埋啦~
https://www.threads.com/@fung_garcia_backpacker
=====================================
-
文章概要 :
-
未出發先奶野
-
終於抵達黃刀鎮
-
1st Night – 差點凍死的Round1
-
1st Night – 大爆發的Round2
-
2nd Night – 極光小木屋的體驗
-
後記
1. 未出發先奶野
我由溫哥華飛黃刀鎮既飛機，原定夜晚8點飛，但中午12點先話cancel飛唔到，仲直接改我地班機到第2日中午
我即刻呆Q左 不論打比Air Canada CS，定係Trip.com CS主動打越洋data call嚟幫手，今晚都一樣無機走……
我已經唔多理要花錢即book多晚溫哥華酒店，黃刀無得cancel第一晚住宿，同埋要超煩地claim旅遊保險呢d野
我最最concern既係，本身呢個Trip已因為行程關係只能stay 黃刀3晚，咁樣攪一攪，即係話我得返兩晚追極光咁少!?
Working holiday時係北歐10日先見得1日，今次得兩晚，即係考驗我呢12年捐左幾多錢比馬會je?
後來先知cancel原因係大寒流，黃刀當晚氣溫再急降至零下44度，連當地人都話風吹如刀割極難受，偏偏果晚就極光大爆發……
(第2日睇新聞，原來卡加里都零下廿幾度大暴雪……)
2. 終於抵達黃刀鎮
班機被改到第2日下午2點正，早個半鐘到機場，計返即係11點開始要由Downtown出發，飛兩小時兼時差+1，即落機時間係5點
到時天已黑，即係今日完全被廢了……
而更廢既係，Air Canada再發揮傳聞中只得61%既準時率，係候機室睇住佢足足delay多5次，最後成4點先飛到……
(係候機室等到呆哂……)
我以為Air Canada咁好死為補償就比個Exit Row Sit有extra leg room我
的確係闊到伸直腳都得呀，但我從未坐過張飛機椅背係90度直角，而後方都係exit row唔比挨後……
坐墊版坐到扁哂之餘仲飛起向前傾，尾勞骨位就有硬物un住……
我真係從未坐過咁差既航班!!
好多人成日話CX點差點垃圾點墮落 我真心覺得，唔好咁harsh啦，CX未必完美，但不完美得嚟仍然係世界頂級
你試下呢間一代加拿大最具代表性既航空公司先啦
落機都已經成7點幾 第一時間唔係著衫避免凍死，而係通知bnb主人我地到左，超唔好意思要佢等咁耐嚟車我地呢……
Settle down後身第一件事唔係睇極光，係去超市買嚟緊兩日既糧食!
餐廳同超市都就關門啦喂!!
意料之外黃刀鎮超市既糧食唔係特別貴，部份甚至比溫哥華平!
(計返$11港紙一罐，平過百佳wor!)
(出前一丁都係HKD$24 五包，好OK呀!)
介紹下我今次間BNB先~
屋主係兩位本地男士，Airbnb上評分非常高，幾乎係整個Yellowknife最高果幾位
房間 係一大間近400尺，連廚房浴室洗手間，設計時尚又乾淨，有餐桌書枱梳化電視機齊全，舒適到我直情想搬嚟長住~ 約HK$1100一晚，係黃刀鎮嚟講算平~ 大推薦!
最重點係間屋位置偏遠，行去後園已極夠黑睇極光!
所以我今次既追極光大計，係頭兩晚(最後得1晚)只係Apartment附近碰運氣(兼慳錢)，最後1晚則預早book了極光小屋
好似大過我屋企……
-
我的黃刀鎮bnb : https://www.airbnb.com.hk/trips/v1/reservation-details/ro/RESERVATION2_CHECKIN/HM5HJES9JJ
意想不到，係超市買個餸，返到屋企落的士就見到頭頂有條激光射出嚟了!
一定係我平時做善事多鋪得多草皮啦~~~~ 馬會多謝你呀!!!!!!!!
但極光加屋頂，實在太似幻彩詠香江啦! 我嚟北極圈唔係要呢d呀!
於是快手快口食d野，整理好萬全裝備，便根據屋主的建議走到屋後的散步小徑追光了~
大飢荒咁勁買罐頭
是日晚餐 :烤豬肉+Caeser Salad+字母炒味精雞湯
3. 追極光1st Night – 差點凍死的Round1
當晚黃刀鎮氣溫約零下36-40度，另加風勢和湖邊濕氣，已經唔係凍，係極端既嚴寒，連呼出的空氣的水份都會瞬間結冰
室外比急凍肥牛既雪櫃更凍，即係我一出街就變雪花肥人
或者具體d，妳當出街=比人塞入雪人裡面啦
我係瑞典Abisko都遇過零下42度，但好似黃刀鎮更凍一層樓!
而日本藏王山頂大風雪更係未夠班啦!
藏王樹冰
於我著左包含大羽絨和Heat-tec x2在內7件衫，3條褲，兩對襪，兩對手套，包頸頭巾，頸巾，厚頭巾，耳罩，成個柯柏文咁行出屋
但不到2分鐘已覺全身發寒，係由心裡寒出嚟果種寒!
係wor我而家直接吸緊冷空氣入肺wor白痴!
要立即以包頸頭巾當口罩阻隔寒氣才能正常呼吸….
Google map 7分鐘的路，在雪地上走多一倍時間
終於在向湖積雪的小山丘上，相隔12年，我終於再次看到那美得近乎妖艷的北極光舞姿了
和上次不同的是，上次只是近岸淺淺的一圈淡綠光，這次卻是一大片在星空下飛舞
而且上次有情侶朋友求婚，這次卻有我的美女在身邊呢~
靚係好靚，但都係撞板既開始
屋企預先set好既腳架熱脹冷縮到鬆哂，雪地手套不靈活，攪得嚟部大機已冷若冰塊
而影每張相都必須在寒風中長期曝光10幾秒，到第3張相部機已經郁唔到收得皮
最終所有極光相都係我部IPhone 15無Pro攪掂，完全唔知咁重囉部大機嚟為乜
(返到屋企，部機連腳架結左冰……)
但Iphone都頂唔到太耐，開始凍到篤掣無反應
而我地企係雪丘上呢樣果樣太耐，美女開始出現「手指尾突然劇痛，轉瞬變到毫無知覺」既情況，嚇到我即刻抱住佢衝落山!
而我係兩分鐘後都出現同樣症狀，但都只能夠用暖包包實手指頂住，口中不停安慰美女「唔使驚好快到」，但我之後連腳指都凍到毫無感覺了
果段路就好似係水底氧氣樽叫緊要快d衝返上水，有咩ee郁就有生命危險既感覺!
好彩都叫無事安全返到，手腳都回復知覺，只係一直keep住痛多半個鐘
零下40度，係一個出街太耐都會出生命危險既超極端環境嚟ga!
呢個係安全達陣樣
4. 追極光1st Night – 大爆發的Round2
出去一次好似打完場仗咁! 但無理由咁快放棄ga! 極光仲係外面呀!
於是我地改變策略，放棄厚重既雪地手套，直接戴防風薄身，然後衫袋放暖包，用暖包既熱力直接暖手和電話
呢招堅work!
起碼手指再無事，而電話條命都長d!
第2次出門，我地唔上山丘，直接在行3分鐘路更暗的後院森林邊追光
起初夜空回復一片漆黑，以為今晚係咁先，點知10分鐘後，比剛剛更強既極光爆發了!
終於可以好好地欣賞妳啦!~
無奈點禦寒都好，係呢個小便都會變冰柱既恐怖寒氣下，不論電話定我地身體都有其極限
相機app已經陣亡，腳指亦開始無感覺，只好快手快腳衝返屋企
但亦因為太急趕，我地完全唔記得合照，有人類身影又唔算太out fou的極光相亦只有2-3張
但唔緊要啦~ 聽晚仲有機會! 聽日一定會有更靚既極光ga哈姆太郎!
5. 2nd Night – 極光小木屋的體驗
就係無呀哈姆太郎!!!!!!
第2日由中午開始陰雲密佈，一直到入夜成個天都係灰黑一片，即係最岩射個蝙蝠Logo上天果種狀態呀!
正常呢個樣係日落緊
而呢晚我地一早book左極光基地團，小木屋主人阿姨不論點努力安慰我地「極光隨時出現ga~」
韓國美少女職員Yumi點超開朗地提供各種飲食娛樂，熱茶熱朱、UNO Jenga、周打魚湯與即焗鬆餅，亦難掩成間木屋死氣沉沉
於是成晚就係出出入入、易服影下相、on99呆望Campfire，渡過超無聊的4小時
極光小屋，係無極光時只係一間極悶小屋
我呢個俄羅斯皮草大亨look真係說不出的怪異……
最後走果陣，忍約見到薄雲處有輕微綠影 明明雲後就有美艷既極光，我從未試過咁想自己識龜波氣功law……
比左CAD$115~HK$655 呆坐4粒鐘，真係有d肉赤
咁又唔可以責怪木屋團ge，本身北極光就係粉紅色xx可遇不可求，咁易睇到就唔係咁珍貴啦，只能怪自己真係太黑仔
但我地又未算太慘ge Yumi話佢極光獵人團朋友開車到60公里外依然乜都睇唔到，車又凍d又舟車勞頓，佢地慘好多……
點都好啦，係感謝阿姨和Yumi的熱情招待的~
屋主阿姨
又高又靚英文又好既韓國美少女Yumi，其實我覺得佢似日本人多d~
-
阿姨與Yumi的極光小屋 : https://www.bucketlisttour.com/cozycabinaurora
6. 後記
回到屋企凌晨2點，天氣預報話2小時內天會清
於是我死頂到4點幾，天氣報告話現時無雲星現，我睇睇出面，咪一Q樣，平行字宙呀?
d雲厚過年榚呀，放棄吧啦
攝於凌晨4點半……
如是者，我既黃刀鎮極光體驗就此完結
唔可以話呢兩日兩夜好差，因為我真係睇到好多人一生都睇唔到既極光!!
但遺憾既係兩晚加埋只睇到10幾分鐘，仲無同美女在極光下合照，佢超級唔開心…… 唯有安慰佢我地已經比大部份人幸運，下次同佢去北歐睇過啦~
(返到屋企睇相先發現，呢張相後面有極光，係咪可以當同極光合照左……)
Btw，呢一篇雖然無講到，但黃刀鎮其實係一個完全無野玩、悶到爆炸小地方，如果唔係極光老是常出現真係搵鬼去
所以你問我北歐同黃刀睇極光有咩分別
個人意見會話北歐Kiruna、Abisko、Tromsø、Lofoten一帶風景為人間一絕，可以自駕遊一個個小鎮玩落去
黃刀鎮就只能被困於一個乜都無既無聊小鎮，但看見極光的機率卻是全世界最高
如何取捨就睇閣下想點玩啦~
不過講到尾，看極光還是要看運氣 所以記得由今日開始，過馬路時，記得留意身邊有無阿婆啦~
當年挪威Lofoten既美景，一世難忘
========================
請大家Follow我Instagram啦~
另外Threads果邊有我其他教書、旅行和大學時代既攪笑/悲慘故事，快d follow埋啦~
https://www.threads.com/@fung_garcia_backpacker
=====================================
我既Youtube Channel已經開通啦!!!!
快d Click入 「鋒加西亞 / 旅人瘋語」Subscribe 睇片再比個Like禁個鐘仔啦!~
鋒加西亞/旅人瘋語 Youtube Channel
主要影片 ：
白濱系列 :
- 【和歌山】【白浜】白浜七大溫泉評價! 熱到烚腸仔? hea到似街市? 浸哪個好一一盡錄!
- 【和歌山】【白浜】超高性價比溫泉酒店介紹!(上集) 最平最型，兩層複式+望海露天風呂，竟然港幣千零蚊!?
- 【白浜】【和歌山】超高性價比溫泉酒店介紹!(下集) 「白浜館」好味到難以置信的一泊二食︱房內優雅露天溫泉+市中心對正沙灘，勁抵住!
旅行故事系列 :
=================================
相關篇章 :
-
名古屋、北陸自駕遊系列 ：
《名古屋8日父母自駕遊行程 (上)︱行程概要、下呂溫泉及上高地》
《名古屋8日父母自駕遊行程 (中)︱富山、冰見、金澤漁市場+加賀溫泉+兼六園》
《名古屋8日父母自駕遊行程 (下)︱福井縣海岸線、三方五湖+名古屋鰻魚飯推薦》
-
九州自駕遊系列 ：
《Day0.1 – 日本自駕遊初體驗(上篇)︱初心者租車攻略》
《Day0.2 – 日本自駕遊初體驗(下篇)︱準備清單與第一次自駕心得》
《Day1.2 – 福岡糸島打卡精選︱海邊韆鞦、夏威夷風海灘、夫婦岩鳥居、爆蛋三文治》
-
仙台山形系列 ：
-
京都紅葉系列 ：
《1 – 京都紅葉隧道此生必去︱貴船神社、琉璃光院︱叡山電車紅葉路線介紹》
-
富士山登山全記錄：
-
日本溫泉及溫泉旅館介紹：
-
日本富山、石川、琵琶湖 :
-
日本和歌山、白浜 ：
-
東京、大阪、京都：
-
韓國濟州島 :
《Day2.1 – 東門市場的遺憾︱豬肉湯麵+海鮮飯卷推薦》
《Day2.2 – 龍頭岩海水汗蒸幕︱最強黑毛豬餐廳「石窟黑豚」》
《Day4.1 – 濟州島 9.81PARK 重力賽車公園》
《Day4.2 – 濟州島 Arte Museum 光影饗宴》
《Day4.3 – 濟州島春日咖啡廳BOMNAL︱涯月咖啡街》
================================
-
Email : funggarcia@gmail.com
文章同時刊於以下平台，請各位多多支持呀!!!!!!!!!!!!!