無錯，好似之前所講， 我已離開環遊歐洲既最後一個國家馬爾他
但你地估我唔到～返德國執包袱前，仲要係意大利米蘭轉機!即係，呢個先係最後一個歐洲旅行既城市
無計，鬼叫馬爾他直航機去柏林超貴咩，而飛馬爾他既廉航有限，最後好彩比我搵到兩張機票，係Malta—->米蘭，米蘭—->柏林，中間相隔約7小時，都唔平，加埋都要近70€，但已經係最平，除非我游水橫越地中海再行路上柏林啦!
反正我連米蘭站都未去過，就會一會呢個有AC同有國際既大都會啦!
如果坐Ryanair去米蘭，通常個地點會寫Milan(Bergamo)
因為個機場其實係位於米蘭市外東北邊約一個鐘車程的貝爾加莫Bergamo，如果各位轉機時間不夠千其唔好出去，一來一回要2 hours ga!
至於我，計埋都仲有5個鐘玩，係機場外的停車場一間小屋背包寄存後，向米蘭進發lu!
(高空望落嚟既意大利又幾鬼靚!)
落車地會係米蘭中央火車站外，記得要問定回程巴士幾點呀!
而米蘭中央火車站同荷蘭阿姆斯特丹中央火車站非常相似，都係大、靚、古蹟+扒手天堂! 中途已經有不少人撩我纏住我!
另外，內裡都係搵唔到information center囉地圖的（至少我行左幾個圈都無），所以，小心財物，影完相，快d走啦～
由中央火車站前面大街直行，Via Vittor Pisani大道兩旁都係現代商業寫字樓
見到有間餐廳唔少白領走入去，我又八卦走入去～
點餐係IKEA方式，超級多選擇但我完全唔知價錢!無價錢牌亦同其他意大利人溝通不了，於是只保守咁叫左3樣野——雞肉串、芝士通心粉同闊麵卷+支水仔
味道ok，但咁已經要8.4€!!？？？？米蘭好貴呀!!!!!!!
(Via Vittor Pisani大道)
雖然無planning，但我呢幾個鐘目標非常清晰!
米蘭最出名係咩？問d女人一定會答LV、Gucci、啫啫阿媽ly……..
唔係米蘭站呀!!!!!梗係米蘭大教堂啦!!!!!!!!!!!!!!!!!
貴為世界第二大size教堂之一（from維基，第一大係梵蒂岡聖伯多祿大教堂），就算呢一年來睇過幾多大大小小三尖八角五顏六色的，已經嚴重教堂美學疲勞症既我仍然覺得呢座野非常非常靚!
與同德國科隆大教堂高聳入雲的哥德式建築風格不同，米蘭大教堂係混合哥德式及巴洛克風格，歷時5個世紀成500幾年至1960年先正式完工!會唔會太誇張!
但就算懶到好似我咁乜資料都無睇，就咁嚟到都可以感受到佢既氣勢宏大!
好流咁講幾句內部啦 ——- 好靚!
完!
…………………………………..
對唔住law~宗教野我真係識條鐵咩!唔通寫「四月初八日，是吉祥的日子，佛陀出生了」？？
但如果你係宗教狂熱者，就一定會讚嘆「Oh my God!呢個一定係神蹟呀!」然後係度hea返3/5/6個鐘
好似我咁乜都唔識既俗人，都可以一件一件欣賞內堂的藝術品，甚至每一磚一瓦，都有其歷史故事存在，絕對值得細味!
另外我都錯過左坐lift上天台迴廊參觀，唉睇返人地blogger d相好靚ar!
（呀，影相好似要收錢ga，我偷拍的）
米蘭大教堂前既廣場Duomo Square都係意大利有名的人群集散地，當然都係影教堂既最佳位置啦～
只不過，同火車站一樣都係騙徒小偷既集中地
我自拍緊果陣，就有超過3個人先後走過嚟話幫我囉機影相，wa你囉我部機跑左左去點算!睬你都傻!
走之前，果然就見有遊客中招，果班人囉住佢地部機要求影相費………
意大利係邊一度都要小心呀!（延伸閱讀 : 德國working holiday第125章 : 深夜尾行者 ）
面向教堂的左手邊，係著名室內長廊Galleria Vittorio Emanuele II，基本上全世界最貴最豪既名店都會係度
之不過，行慣尖沙咀廣東道既我地真係唔覺係咩回事啦
反而係商場內既地板天花真係值得仔細玩味
場內某處地板上有隻公牛，佢條啫啫有個窿窿(你無聽錯，咁實有窿ga啦!正常!)，傳說只要用腳踭踩住順利自轉一圈既，就可以帶來好運!
不過當時我唔知，係返香港睇到「叻哥嘆世界」講先知原來係咁!
如果唔係!?我轉到王小虎咁都得呀!
(米蘭既象徵十字架)
(以我既黑仔程度，起碼要轉到咁啦)
穿過Galleria Vittorio Emanuele II外面係史卡拉廣場
史卡拉係乜水我唔知，因為呢個小廣場有個搶哂鏡既人像——
無錯!就係果個害到湯漢斯差d無命，全世界最鐘意玩密碼既意大利佬——聞西!!!!~~~~呀唔係!!達文西~~~~~~
不過老老實實，個像的確係比其他普通歐洲街頭石像來得高來得有氣勢，不過你只係刻個Leonardo係度，我鬼知佢就係Da Vinci咩!你話佢係DiCaprio都得啦!
所以下面呢張相其實只係我無意中影低，我真心唔知佢就係聞西………呀唔係達文西…………
(話時話，米蘭大教堂其實係聞西設計的)
路過Galleria Vittorio Emanuele II外邊，見到有間門口有非常精緻朱古力裝潢的雪榚店，見人山人海睇嚟係出名野，入去整返杯Gelato係常識吧~
都唔平，要2-3歐(對比香港我知係極平~但比起德國……)
一等就等左近半粒鐘!佢生意真係好好!好彩有冷氣，當抖下休息下啦~
至於杯雪榚……..係好味，不過無我想像中會伙頭仔昆布式彈起”好好味呀!!!!”果種感覺
而且朱古力味太濃太濃，好好味，但我身上真係唔夠水飲，大熱天時好似都係食d解渴d ge好………
行過舊城既街道，經過商人廣場Piazza Mercanti，我來到米蘭另一重要景點Castello Sforzesco斯福爾扎古堡及Parco Sempione森皮奧內公園
古堡門口有座建築中，用白色管及玻璃啤牌金字塔式既新起建築物，咁奇怪ge？無啦啦起座咁既野……
一年後既今日新聞——-「米蘭世界博覽會開幕～入口既白色金字塔建築…………….」
Shit!!!!!!!!!!!!!!!!!!!!!我完全唔知道原來係咁重要既事!!!!!!!!!!!!無特登影低佢呀!!!!!!!
(商人廣場Piazza Mercanti)
（唯一得呢幅相影到d Expo Gate……..）
Parco Sempione森皮奧內公園係一個都真係幾大下既城堡花園
如果話要相似既，我覺得似係東京上野恩賜公園搬左入波蘭克拉科夫舊城區………呢個比喻係咪仲難明呢？
Anyway，呢度就係一個有樹木有湖水有鵝有鴨有小販有城牆有賣藝既大公園～
當時氣溫高達37℃，我行到呢度已經非常疲倦
遠望非常遠處既和平之門Arco della Pace後，我既米蘭停站5小時亦都就此結束
回到Bergamo機場，囉起背囊，穿過閘口，一個多月既南歐巴爾幹半島之旅正式完結
由2014年6月11日開始，由柏林落慕尼黑出發去斯洛文尼亞，沿阿德里亞海東岸一路南下，經克羅地亞各沿海城市，中途進入波斯尼亞，再到期待已久的蒙特內哥羅（黑山），至阿爾巴尼亞再跨海西行到意大利，最後以地中海島國馬爾他為終點站，2014年7月15日經意大利米蘭返回德國柏林，35日間走了7個國家約28個地點（由 第九十六章 至呢篇第132章）
聽落好似走馬看花幾乎一日一城，但其實有d係一日來回或一日去幾個的景點，我每個大城市都起碼逗留兩三日的，另外歐洲夏天日照時間長，所以幾乎每日都玩到好夜睇到好多野
而呢個月既南歐之旅最大特點，就係每日都好熱!好熱!好很熱!
平均每日都係35℃以上，日日煎到燶哂，咩油咩汗都出哂嚟，無太陽油太陽眼鏡既我諗皮膚癌死左啦!
不過都因為日日曬住係咁行6-7個鐘，我瘦左又靚仔左～～～～～
雖然係咁熱，但亞德里亞海同地中海真係超級無敵咁靚!呢個月有超過9成時間都係望住一片蔚藍的～真係好開心!
所以，係歐洲冬天要去北部，夏天更加要去南部是對的!
如果由離開柏林去波蘭開始計算，我整整連續旅行左兩個半月，咩起背囊、居無定所咁漂泊左兩個半月
講真，玩係永遠都唔夠的，但到呢個moment，我真係覺得攰了
晚上10點，我回到德國柏林，haha竟然會有少少回到「家」既感覺，今晚就好好訓一覺啦
好啦，我呢個德國working holiday既記錄亦快要進入尾聲
要開始真正的回家之旅了
=======================
補完此Blog上未成文的相片和無聊閒事:
My Facebook Page : www.facebook.com/Garcia.in.Germany ，多多支持呀!~