繼續馬爾他Day1~
上回係Sliema一帶行到攰，終於都係坐巴士向馬爾他首都Valletta進發~
話就話地圖睇落好近，原來我行左一半路剩餘既坐巴士都要廿分鐘，anyway，終於來到啦!
同其他國家唔一樣，Valletta真係一個完完全全封於圍牆內既小城市
根據資料顯示，Valletta係由於四百幾年前與鄂圖曼帝國戰爭後被馬爾他騎士團發現其貴重的戰略價值，於是快手快腳移山填海，用5年時間係度起左呢座巨型堡壘，外圍作戰略防守，內部則為民居，可以話係歐洲第一個係完善規劃下建成的首都城市
城內自正門起由一大理石主街道直線貫穿至海旁，兩旁樓房則特別起高，這樣海風就可吹進整座城市，主街則以樓影作陰涼散熱
咁完美？？係咪得ga？？？
咁我印象中…….Valletta又的確唔係太熱wor…..hey其實地中海一帶都係一無太陽就涼爽ga啦～
(此乃國會)
沿大街直行到尾轉右沿海邊行，會見到著名紀念碑The Lascaris War Rooms同Upper Barrakka Gardens
先不理紀念碑背後此地一篇篇血肉橫飛的故事，係呢度望出去，果一片廣闊蔚藍，怎會不令你心廣神怡，去憂解困!
嚟歐洲前，個個都話地中海好靚好靚一定要去 ; 嚟到呢度，我真正感受到啦!
雖然只係第一日遊覽Malta，但已經深深覺得，能夠以呢個國家作終點完結我既一年之旅，實在係太好啦…………
(The Lascaris War Rooms)
行完右邊行左邊，這邊沒有大型紀念碑或公園，海邊反而比較民居化，不時見到一班小朋友踢波tim~
呢個時候見路邊停左間車係度，「車～路邊有車有幾奇～」
行過左3步，呆一呆，倒退兩步…………雪糕車你都有!!!？？？咁把炮!!!？？？？1€一杯軟既唔該!!!
天氣咁鬼熱，望住個咁靚既海食軟雪糕雪糕雪糕真係無得頂!!
囉部相機影張相後，突然一陣狂風吹嚟——「呼～～～～」——-我杯軟雪糕以肚瀉般既速度溶解呀!!!!!!!!!!!
論論盡盡收返部機後，已經有1/4杯係我手上，係真係係我手上!
於是我人生中從未試過用半分鐘時間ko一杯軟雪糕……..抹手既時間仲耐d…….
味道呀？都ok ge~香港既好味d~
(我都想係咁樣既海洋下揚帆出海……)
再走回橫街窄巷，路上四處可見天主教風的石像及各大小教堂
當時教堂內正舉行婚禮，作為一個好事之徒我又走去係門口”裝”下個新娘
太遠睇唔到，但裡面熱鬧的氣氛和莊嚴之浪漫氣息卻令我神往
我本身並不相信任何宗教，但都會覺係古教堂內舉行婚禮會係一件受祝福同完美既事
當然首要係有個人肯同我結啦~
想到此處——唉~都係走回黃土色的石灰岩建築，享受爍金色的夕陽餘輝吧
(馬爾他教堂之王「聖約翰大教堂」)
第一日遊Valletta基本上就係咁多，其實如果係熟西史或者做多d功課先嚟，呢度會有超級多歷史故事同文化遺產睇的
但對於我呢d又懶又hea既旅行者，只係風景同建築都夠我睇一日啦!
哎呀!我好期待聽日去其他地方會睇到咩風景啦!!
(夜晚既Sliema都係超靚~~~)
下回馬爾他Day2~仍然係靚到核爆!
============================
補完此Blog上未成文的相片和無聊閒事:
My Facebook Page : www.facebook.com/Garcia.in.Germany ，多多支持呀!~