所謂物極必反，之前行程一直都運氣不俗，到某個位反彈原是意料中事
之不過，呢d倒楣事與其話自己運滯，不如話自己傻仔……
以下，就係Day5傍晚係串本町還車後所發生既連環on居事件…….
(一)【望梅止渴】
下晝16:50，由於太鐘意橋杭岩，係還車後仍然想去睇下佢日落時既樣子
Um，理所當然地，我係完全唔記得左太陽係西邊落山ga la~橋杭岩向東ga!!!!!!
呢個都小事，Day5.2大家睇相所見仲有少少餘輝射落都ok
只係我為左趕日落前到達，所以已孭住over 10 kg背囊由串本駅半衝左20分鐘過嚟
另一重點係其實我07:00起身到而家17:20，除左清水外係完全無食物落過肚的，可嘆的是周圍的食店已全體打烊，連便利店都無
望望地圖，行返去串本駅係20分鐘，行去上一個站紀伊姬駅好似近d wor，而且條路又未行過，一於去睇下啦~沿途見到有d咩野食咪求其塞落肚頂一頂law~
但googlemap有一個好大既盲點 —– 佢唔會話到比你知果條係平路定斜路
20分鐘街邊平路同20分鐘斜路馬路係兩回事嚟ga師兄…..
簡單d講，就係馬路版既洪聖爺灣行去索罟灣，中途點會有食店呢…..仲要小心旁邊飛馳中既私家車撞你落山……
背囊又重，對腳又攰，一邊行五臟廟一邊太鼓之達人，連馬路右邊既靚海灘都無乜心機欣賞……
行呀行，筋疲力盡之際……
ee!不遠處有個大大既招牌—–好似係隻紅色既雞!!
雞呀!!!!!!!!!我要叫雞…….呀唔係我要炸雞呀!!!!!!!!!!!!!!!
體內突然傳來一種力量，支持我繼續支撐落去!!就在不遠處就有野食啦!!!
腦內不停美國nba觀眾式叫喊「K • F • C ! K • F • C ! ………」
我終於明白曹操望梅止渴係咩一回事啦!!!!!
5分鐘——3分鐘——-越來越近了!
—— 1分鐘——終於到啦!!!!!
WA!!!!!!!間野好大間呀!!!!!!!!
WA!!!!!!!間野係賣鐵釘花盆鋼筋水泥既五金雜貨超市呀!!!!!食螺絲批啦你!!!!!!
(二) 【來回又折返】
考慮過自己腸胃唔好，鐵釘螺絲呢D生冷野都係避一避好
無問題ge，向前再行多約5分鐘就係紀伊姬駅，日本d車站邊一定有士多ga ma，衰極都會有朱古力掛
辛苦在行去車站呢5分鐘，連路邊d大白菜都想摘嚟食ar……
呼~終於行到紀伊姬駅了!
果種熟悉既西部牛仔片”do dodoo~”風吹沙漠感覺又再出現
Um，日本果然係一個不停給予我驚喜既地方ar
我真係完全唔記得日本係會有呢種乜都無既山卡啦車站law!!!!
Um應該話車站有間房有瓦遮頭已經係好好ga la! 但除此之外真係乜都無，連自動售賣機都無……
望一望錶，18:00正，JR要約18:40先到站，另加個零鐘到目的地，即係仲要餓多兩個鐘…….
我就嚟餓到當自己係嘉明，名乎其實食自己ga la………點解我平時旅行隨身攜帶既朱古力會食哂唔記得買ar…….
無力地飄返出馬路，望一望路口，有個牌 : 往串本駅既local bus，18:02到站
我投降了，跳上巴士，200yen，10分鐘後回到串本駅，再以牙買加保特跑100m既速度去超市買兩個炸薯餅倒落肚
一邊食，我一邊諗 ———- 我咁辛苦既呢一個鐘頭究竟做過d乜呢……
(三)【大廚出馬】
經過左非常on居無聊既來來回回行餐死+餓餐死一粒鐘後，總算準時上JR，來到今晚既落腳地，同時亦係近年超受港人歡迎+加我最喜愛的關西溫泉小鎮「白浜」了!
安全去到民宿(除左巴士司機飛站要行返轉頭外……)、Check-in、去白良湯溫泉鬆一鬆，時間話咁快來到夜晚10點鐘，肚又有少少餓了
記得出門時見到民宿pantry雖無爐頭但有焗爐and微波爐，與其求其食碗拉麵，不如係超市買野來個輕煮晚餐~
係有限既材料及環境煮到一級美食，方顯我中華小廚師「沙田味吉陽一」既手段!
 |
| (係住既地方有間大超市真係好開心) |
講講今既既晚餐先，主要係有
- 「唔記得咩魚既刺身」
- 「牛肉薯餅」
- 「清酒浸豬肉」
- 「咖哩烏冬杯麵」
以我既習慣，當然係一炮過煮好哂影大合照再一齊食啦!
最花時間係「清酒浸豬肉」，只需要將呢盒超靚既豬肉眼片放入碗內加清酒，入微波爐叮熟佢就食得，又有酒香又有豬肉味，無得輸~
「Ee，點解個pantry會無碗ge……….」
件事係歐洲出現真係唔奇，但日本呢個咁鐘意食湯麵既國家竟然會無碗!!!!????連杯都係得驗尿式紙杯仔，我點煮ar???
搵ar搵，搵均哂，終於比我搵有一千零一個比較有深度既器皿 ——- 無錯，就係咖哩烏冬杯麵個杯啦!!!!!!! …………..即係要我食左個麵先ga je
唉團體相無lu，不呢個就小事je，咪食哂其他野先囉~
刺身~~~~~~um~~~不出所料，呢個廚房係無刀ga~~~~
算~~成舊咬!!!
生番一樣咬左兩啖……..點解個味變變地ge? 以而家零度既天氣lai講應該唔會ga……
一剎間記起，舊魚生係我係串本町超市買落放入背囊的，來白浜坐JR背囊放地下，比腳邊既暖氣吹左1粒鐘………..
多左出嚟既呢舊魚就比我一個轉身射個三分波直入垃圾桶了
得返個薯餅配烏冬都好過無啦，識食既一定係焗爐猛火焗到外脆內軟~
薯餅起碼要焗3分鐘，呢個時間落水焗麵岩岩好~
3……2…….1………食得!
掀開個蓋——–點解………好似少左d野咁ge…….係一種不安感…..平時打開個麵唔係咁ga…..
腦海突然新類型人式一道閃電略過!
「Masaka！？」
唔通!!!!!!!!??????????
神色凝重地伸出手指試一試味———-雙眼一瞪——–再望一望那大水瓶——-
果然!!!!!個保暖壺裝既係冰水呀!!!!!!!!!!!!!!!!!!!!
 |
| (即刻扔左入微波爐監生將凍水叮滾佢) |
怪不得開蓋會無煙啦…….凍水煮麵，呢鋪都算係on居既代表作啦……..
Um~個麵係微波爐內轉下轉下，開始熟啦~有煙啦~
煙………等等…….點解個pantry咁大煙ge…….=_=”
無錯～除左我之外，大家都記得個焗爐係存在住ga~
結果就係開爐果一剎那，我以為自己空間跳躍去左龍和道
仲驚嘆!!!!？？？？？快d開大隻窗啦!!!!!!我唔敢想像深夜12點響警鐘消防員趕到會有幾7呀!!!
更重要係我用條命擔保屋主一定會一腳踢我走，零下1度訓街wor……不過分別都唔大啦……開大左窗零下一度既風都吹緊入嚟了………
呢個時候先得閒睇下個薯餅，發現個餅都唔係咁燶je，只係自己發神經，張隻紙碟扔入焗爐g ma!!!!!!
 |
| （隻紙碟個啡色真係……又幾整齊wor~） |
好啦攪左咁多大頭佛之後，終於食左杯麵薯餅，並平平安安煮到個main course清酒浸豬肉了~
酒香+靚豬肉既清香～～～woo~~~
我都想有咁美好
無鹽無糖無豉油，兜野只係得豬味同酒味，豬肉太鞋，酒味太濃，呷一啖，感覺就似阿媽炒完肉片將d碟底餸汁倒落拜神用白酒……都好耐無食過咁難食既野了
默默地把呢盒原本生姜燒用既靚肉片吞落肚，仲要又洗又抹個pantry一大餐
不禁諗 :
我今晚究竟做左d乜？
最後，奉勸大家一句 : 係民宿廚房，千其唔好亂咁煮野食呀!
行錯一步，就會柒出國際ga啦!!!!
唉訓啦渠頸，Day5完結
=====================================
- 相關文章 :
《【日本紀伊半島Day1.3】誤闖海女小屋食返餐總之好食就得》
《【日本紀伊半島Day1.4】風見莊是伊勢住宿no.1（無誤!）》
《【日本紀伊半島Day3.1】熊野本宮大社&大齋原都好偏僻呀》
《【日本紀伊半島Day3.2】千人混浴︱川湯溫泉 仙人風呂》
《【日本紀伊半島Day4.2】熊野那智大社又幾ok wor》
《【日本紀伊半島Day4.4】勝浦露天風呂「中之島」靚到痴孖筋》
《【日本紀伊半島Day5.2】橋杭岩 – 日本版十二門徒石》
=======================
請大家Follow我Instagram啦~
=====================================
我既Youtube Channel正式開通啦!!!!
新影片已upload，快d Click入 「鋒加西亞 / 旅人瘋語」Subscribe 睇片再禁個like啦!~
=================================
- Email : funggarcia@gmail.com
文章同時刊於以下平台，請各位多多支持呀!!!!!!!!!!!!!