白浜你唔係講過啦咩？做咩又勾返個topic出嚟ar？？
即係咁，係上次我都講過，和歌山縣既白浜係我日本其中一個最鐘意既地方，於是係2016年頭去完第二次之後，呢幾年間又快閃左一次，又有d新既體驗~
同埋我發現我果兩篇舊文 —— 《白浜風景簡易全接觸》及《白浜刺身燒烤乜都有漁市場》只係講左有咩風景同野食，完全無講到著名既溫泉係咩狀況，而當地溫泉花多眼亂，初心者可能完全茫無頭緒
所以小弟就以自身經驗，綜合主觀評價一下白浜各個不同溫泉，睇下有邊個一定要去，有邊個話鬼知佢啦~
內容大要 :
- 崎之湯
- 白良湯
- 牟婁之湯
- 白浜温泉公園 – 草原の湯
- Toritori 之湯 (とれとれの湯)
- 御船足湯
- 三段壁足湯
++++++++++++++++++++++++++++++++++++++++++++
延伸閱讀 : 《【日本紀伊半島Day6.1】白浜風景簡易全接觸》
https://travelblog-fung-garcia.com/2016/03/day61.html
++++++++++++++++++++++++++++++++++++++++++++
====================
1. 崎之湯
毫無疑問，白浜no.1既溫泉，一定一定係崎之湯！
呢個已有過百年歷史既露天溫泉，座落於礁岩海邊，依岩坡層遞兩座大池，一入場所見已有濁浪排空，波瀾壯闊之感
呢個風景宜人唔在講，更特別既係唔止望到聽到來自太平洋既海浪，仲可以伸手掂到tim！
不難想像打風大浪時會浸浸下捲埋你落海餵蝦呀~
日本成千上萬個溫泉，望海邊既無一千都幾百，但近到咁既真係唔會太多！
兼且呢度溫泉水熱得岩岩好，唔會太”辣”肉之餘，海風吹來又唔會令浸緊既你覺得凍，環境乾淨企理，仲可以聽到一木牆之隔的女性專用池的聲音 ……..
不過呢度有樣野煩 —— 更衣處只係一個無乜遮掩既屋簷，意味冬天時大家要係零度之下除哂衫先落得池，只係果10幾秒已足讓大家變成一大條雪條了…….
而另一個唔好處對某d朋友嚟講應該係好處 ——– 係崎之湯再南多少少既海心觀景亭，係可以好清楚咁見到男湯內所有細佬ga……
(網上圖片)
(網上圖片)
(網上圖片)
(網上圖片)
入場費 : 500yen
前往方法 : 踩單車or渣車，由白良濱再沿海邊向南，過左新漁市場繼續貼海行就到
開放時間 : 話休就休，天氣唔好都有機會唔開 ; 另外官網寫以下時間，但我2016年果陣就定休星期三，希望係而家改左啦~
- 【4月1日～6月30日・9月1日～9月30日】8：00～18：00
【7月1日～8月31日】7：00～19：00
【10月1日～3月31日】8：00～17：00
2.白良湯
另一頗有歷史的古湯，最大賣點係位處白浜市中心 —— 最旺既白良浜沙灘地區
但我就覺得佢最大賣點係市中心步行範圍內其中一間最遲收工既溫泉
外表，室內，更衣室均古色古香，以木為主的裝潢令人感覺親切溫馨家庭feel
溫泉水超級熱！ 係超級超級熱！就算點潑水上身我都無辦法成個人浸落去！
所以大部份人(包括我)都係長期坐池邊浸腳條條fing only~
而我覺得最可惜既，就係呢個白良湯溫泉個樣根本就同普通錢湯無分別！
坐擁超極優越既地理位置 ——- 樓下就係純白色的白良浜沙灘，竟然乜野都睇唔到??
鬼叫個泉係二樓咩……再加上蒸氣霧氣，坐係水裡根本就無可能見到任何野，只能on居居咁白烚豬腩肉………
泉質感覺唔錯，但如果對浸浴環境有要求，呢度都係唔好浪費時間了
但如果似我當年咁夜嗎嗎到埗，民宿又無溫泉的話，呢處都係個選擇ge
(網上圖片)
入場費 : 420yen
前往方法 :市中心Family Mart 後面(獨立一間好易揾，好似”旺地恆”咁地標來的)
開放時間 : 07:00 – 22:00，收工前30分鐘唔比入，星期四休息- 相關網址 : http://www.nanki-shirahama.com/search/details.php?log=1332744752
3.牟婁之湯
另一靠近市中心的公共溫泉，整體上同白良湯非常相似
唔同既係裝修相對有feel，浸浴區亦因為樓底高而相對開揚，另加多幾隻2米幾高的玻璃窗令你感覺無咁翳焗
注意只係感覺而已，因為我浸果陣焗到差d暈低……..
感覺上呢個室內溫泉既抽風唔係咁好，我要靜雞雞開條窗罅大力係咁索先好返d……..
整體嚟講so far so good，印象唔深，除非住附近，否則都唔使特登過嚟
(網上圖片)
入場費 : 420yen
前往方法 : 白良濱南方，行過三樂莊後繼續行海邊or穿過隧道就係
開放時間 : 07:00 – 22:00，收工前30分鐘唔比入，星期三休息- 相關網址: http://www.town.shirahama.wakayama.jp/kanko/onsen/1454046683492.html
4. 白浜温泉公園 – 草原の湯
呢個溫泉公園號稱白浜最大最有規模，睇相亦都唔錯，咁岩近我酒店所以上次行左去望望
當時12月，佢話所有露天風呂同貸切風呂都唔開，只有普通內風呂，一場嚟到咪比500yen浸下law
wa ……… 都唔係普通既甩皮甩骨wor…….
簡單d講，我有少少似係沙田街市二樓魚檔度浸緊既感覺wor……係差在無魚無血je……
ok 我形容得衰啦，但污糟既白色牆身同地方真係令人非常之不能放鬆！
係日本真係無見過咁岩岩杉杉既浸浴處呀！！
5分鐘左右，頂唔順，閃！
入場費 : 500yen
前往方法 : 位置超唔方便，簡單講就係白濱著名酒店「ホテル天山閣 海ゆう庭」隔離，行路要行上山，渣車會好d，但最好都係唔去
開放時間 : 9:00 – 22:00，年中無休- 相關網址 : https://onsen.nifty.com/shirahama-wakayama-onsen/onsen003439/
 |
| (睇相，戶外露天既溫泉似乎幾好~ 同意的~ 不過我唔會再比機會佢ga) |
(網上圖片)
5. Toritori 之湯 (とれとれの湯)
位於Toritori漁市場隔離，但好多人只係去漁市場食完魚生燒烤就byebye，錯過左呢個絕對唔差既大溫泉~
設計上係大江戶溫泉物語果種現代新式，夠大夠乾淨夠企理，仲要夠多浴池tim！
講真呀，呢個溫泉我去過兩次，但我腦海裡既image仍然係會張佢同台場大江戶溫泉物語撈埋一齊，咁大家就知大概係咩質素了~
非常適合一個一個池慢慢浸hea返一輪放鬆relax~~~~~
我次次去都咁諗，但次次都做唔到……
原因係 ——– 時間錯配！！！
一般既combo都係Toritori市場食完野先再嚟浸，計一計作為一個遊客既時間 —–
10點起身，11點check out or 出發，等巴士去Toritori，行漁市場，買野食野，快極都2點，BBQ仲耐d tim!
冬天4點幾就日落了，仲要換衫著衫等巴士去圓月島白良濱等等………..
即係話如果要睇日落，你只有約1小時stay係度
唔係唔得，但會好趕急law，白浜係hea既地方嚟ga~
唔睇日落？？傻ga，白浜個日落靚到爆呀!
不過真係時間上錯過左都唔使灰心，呢間とれとれの湯既男性戶外溫泉標榜睇到日落的~ 女性果個得唔得我就唔知道了~
不過唔緊要，萬一睇唔到咪過隔離睇law，我相信大家唔介意的~
(網上圖片)
(網上圖片)
(網上圖片)
入場費 : 750yen，幾廿蚊港紙咁既質素抵到爛啦！
前往方法 : 行去or單車or巴士or渣車，見到Toritori漁市場既左邊行上果條長命樓梯
開放時間 : 9:00 – 23:00，年中無休- 相關網址 : https://toretore.com/yu/
++++++++++++++++++++++++++++++++++++++++++++
延伸閱讀 : 《【日本紀伊半島Day6.2】白浜刺身燒烤乜都有漁市場》
https://travelblog-fung-garcia.com/2016/03/day62.html
++++++++++++++++++++++++++++++++++++++++++++
6. 御船足湯
有時攰攰地、唔方便、無時間、唔想除衫等等，又想鬆一鬆，足湯都係一個好選擇~
但多數足湯都有一個問題，就係d水唔夠熱，只係浸隻腳落去暖暖地，之後on居居咁住全身唔郁眼碌碌唔知做乜
但御船足湯就完全相反，水既熱度岩岩好，唔會凍滾水又唔會燒豬蹄，又有開揚海景，仲擦邊望到圓月島tim~
加埋木製屋簷及座位，以足湯嚟講真係算非常唔錯~
最佳組合應該係碼頭睇完日落，行返去浸個足湯鬆一鬆到完全入黑先走~
睇日落既碼頭係邊? 當然係睇返我既《日本紀伊半島Day6.1 – 白浜風景簡易全接觸》啦~ 我又搵到位回帶了~
入場費 : 蚊飯 (夏天限定)
前往方法 : 白良濱北面，沿大馬路過左白良莊酒店再上，松乃湯對面
開放時間 : 夜晚10點熄燈，年中無休- 相關網址 : https://thegate12.com/tw/spot/2508
7. 三段壁足湯
白浜最知名既景點三段壁都有一個非常唔錯既足湯~
講真，感覺上呢個足湯人工成份有d高，但由於位置太過靚了 —– 可以係高處浸住腳一覽成個三段壁海景，就算唔計足湯都係一個絕佳既影相位置~
由於個view咁好，吸引左好多日本旅客——— e.g.日本女仔，or大陸旅客———-e.g.國內大媽同你一齊泡泡腳聊聊天~
各位可以依照個人喜好調節啦~
入場費 : 免費
開放時間 : 09:00 – 16:30
前往方法 : 三段壁遊客中心外，一定行過唔會見唔到的- 相關網址 :
===================
一講就講左7個溫泉咁多!
其實白浜仲有超級多靚溫泉，如果係住溫泉旅館就更恐怖，例如最有名既「浜千鳥の湯 海舟」咁，我阿哥直情話係「靚到都無需要出去浸」，咁我自己無親身體驗過就唔寫了~
希望呢篇主觀評價對大家有d用啦~
其實我係白浜仲住過一間溫泉旅館係性價比超級高的，不過又好似同呢篇文唔係好夾，寫唔寫好呢…….
都係睇心情啦~ 唔知下篇寫d乜呀~ 總之就下篇再見啦~
===================
相關文章 :
《日本紀伊半島系列 Day1.1至Day10.2》
===========================
IG果邊間中會有d和Blog及fb page不一樣的相片和story，大家有興趣既去follow下支持下啦~
=====================================
我既Youtube Channel正式開通啦!!!!
新影片已upload，快d Click入 「鋒加西亞 / 旅人瘋語」Subscribe 睇片再禁個like啦!~
================================
- Email : funggarcia@gmail.com
文章同時刊於以下平台，請各位多多支持呀!!!!!!!!!!!!!