德國慕尼黑啤酒節可以話係人生必去一次或以上既世界性大型活動!
但出奇地，關於啤酒節既介紹同攻略網上非常非常少，個少法係10年前同10年後check都一樣無咩人講，又或講緊都係「好好玩好盡興呀」呢d個人觀感，無乜介紹入場前所需要做既planning果類硬資訊
加上我睇返10年前我篇關於啤酒節既文章真係Hea得太過份……
適逢今次德國working holiday 10周年回歸之旅再闖啤酒節，就同大家分享下從遊客角度嚟講，參加慕尼黑啤酒節有d咩準備和注意啦~
========================
請大家Follow我Instagram啦~
=====================================
10年前既文章 :
德國working holiday第九章 : 10個去慕尼黑啤酒節的理由
文章概要 :
- 啤酒節舉行時間
- 到達慕尼黑方法
- 啤酒節住係邊度好
- 慕尼黑啤酒節會場地點
- 入場衣著 – 著成點好?
- 會場結構
- 帳篷內的位置分佈
- 啤酒節入場方法
- 啤酒價格及其特色
- 有乜好食?
- 總結
1. 啤酒節舉行時間
德國慕尼黑啤酒節Okotoberfest，又稱「十月節」，每年九月末到十月初在德國的慕尼黑舉行，持續兩周（大概16天），是慕尼黑一年中最盛大的活動。(直接copy from Wiki) 已舉行超過200年。
而2025年既啤酒節會於2025/09/20 至2025/10/05舉行~
其實德國其他城市都有啤酒節，但信我，完全唔係果回事，就好似香港歌手唱「Idol」同Yoasobi唱「Idol」，比較唔到ga wor!
真係多人到插針都唔入ga…..
呢個係Berlin Potsdamerplatz既啤酒節，流到呢……
至於時間，大約係朝早10點至晚上11點，目測以傍晚至晚上9點左右人流最高
另外，傳統上啤酒節開幕果日早上會有啤酒花車巡遊，有興趣既朋友不容錯過~
不過果日都係最多人既一日，好難搵位ga……
2. 到達慕尼黑方法
飛機方面，從香港出發，Qatar、土耳其航空、瑞士航空都係唔錯既選擇，轉一次機就可到達慕尼黑
Qatar最舒服，服務又好，但平機票多數都要長時間轉機，even有長時間stopover住宿優惠，但對我呢d假期唔多既人嚟講真係唔多友善
土耳其則好多時都要轉5個幾鐘機，出去又唔係唔出去又唔係非常雞肋
所以今次我選擇坐瑞士航空Swiss Air，唔要寄倉行李的話，呢個歐遊旺季都係6千幾蚊，非常ok!
而合併左既德國最大航空公司漢莎基本上同瑞士航空一模一樣，連search航班出嚟既結果都一樣，所以可以睇少一間~
話哂都係2024世界頭15名既航空公司，Swiss比我既感覺係…….無想像中咁好wor!
座位又窄，服務中規中矩，最重點係佢既機票經常出現一d唔合理既轉機時間
我今次去程係Zurich得兩個鐘轉機已經要保特上身100米衝呀!
回程直接得一個鐘轉機，最後仲delay到下班機飛左都未land……
所以大家買機票時要有轉唔切機既覺悟，唔一定航空公司賣得比你就做得到ga
記得轉機係要出入海關同check bag，唔係行過隔離呀……
(回程最後漢莎幫我轉左坐CX，不能不說，CX真係衰極都有返咁上下質素呢…… )
若果想坐CX或用Asia Miles，可直航至Frankfurt法蘭克福，落機後轉坐德國著名，惡名昭彰delay到癲既DB高速火車IC /ICE到慕尼黑
價格係越早買、越多人越平! 所以買左機票定好行程就好快d手啦!
我今次既團友就係一個女仔落機果下先買臨時買ICE車飛，成千蚊港紙ar……
當然如果閣下會買近年超優惠既「58歐車票」Deutschland-Ticket的話，咁就唔使book到時跳上其他火車就得，係慢d law~
(Deutschland-Ticket呢件事有d複雜，唔係度講太多了，想知多d大家可以DM我或google下~)
- DB 官網: https://www.bahn.de/
另外Frankfurt都有巴士落慕尼黑的，價格相對便宜，車亦坐得舒服唔會屁股開花，係時間慢d law，睇妳要時間定要錢啦
不過係我落筆時，國泰已宣佈2025年6月開始會有航班直飛慕尼黑，所以想去啤酒節ge，搶定Asia Miles好過啦!
CX應該唔會cut機咁衰仔ge~
而家巴士都唔一定比較平了……
- Flixbus 官網 : https://global.flixbus.com/
3. 啤酒節住係邊度好
住宿應該係啤酒節既最大問題
已經唔係「貴」既問題，係「無」既問題
當妳諗下一個城市一野多左十幾萬人wor，邊度有咁多住宿位? 真係城市內搖曳露營呀?
(又幾好睇wor，我都想同d可愛女生一齊露營ar……)
無錯係真ge!
每到啤酒節慕尼黑就會出現大量露營帳篷「床位」出租，價格由50歐至80歐不等
無錯呀，比張地蓆你收你5舊水呀!
但如果閣下喜歡獵奇既生活，又對醉漢、尿味、喧嘩、暴力無感的話，都的確可以住下ge~
講真呀與其住呢d垃圾崗，妳不如Hand carry個紙箱去訓街啦
呢張係真係啤酒節期間既出租營帳模樣，google搵返嚟的
一般啤酒節期間既住宿都要一年前book定，如果好似我咁3個月前先confirm到，就唯有唔住市中心，改為住係周邊市鎮了
我今次住的Dachau係一個唔錯既選擇~
由慕尼黑中央車站(Munich HBF) 出發慢，S-bahn火車約22分鐘，RE火車更只需10零分鐘，最重要係11點打後都有車，同埋Deutschland-Ticket包得埋~
我今次住既LimeHome apartment 非常精緻乾淨，4個人住人均每晚$500港幣，可以話非常非常抵玩!
唯一係去邊都要早一個鐘出門口，因為要坐巴士落Dachau Bahnhof火車站先去到Munich HBF，等於你住流浮山要巴士出天水圍站先去到中環，好x遠ar……
真係遠比我想像中靚
4. 慕尼黑啤酒節會場地點
慕尼黑啤酒節的會場地點位於Theresienwiese，可坐U Bahn於U4/U5線「Theresienwiese」或U3/U6線「Goetheplatz」，
又或Tram 18 / 19 號於「Hermann-Lingg-Straße 」或「Holzapfelstraße」落車跟住人潮行去
其實由Munich HBF行過去都唔遠大約15分鐘only，路線亦簡單，除非你係響良牙如果唔係好難盪失路ge
5. 入場衣著 – 著成點好?
男人會著巴伐利亞傳統既皮革吊帶短褲Lederhosen，女士則多穿上強調心口輪廓、谷胸至上的 大 牛奶妹套裝Dirndl
當然掉轉著都無話唔得，反正係德國腸仔易買，係木瓜難搵d je
如果想著呢d傳統服應下節，個人建議都係淘寶定囉過去
因為一套正式既巴伐利亞裝可以係幾百歐元起跳，係估佢唔到咁貴，唔通你會買完著返工咩
東方昇真係為左拍片乜都做得出，真心勁!
連BOSS都有出呢種衫
另外重點!
入場係不能帶大袋，所有大袋、傘、西瓜刀、單車鏈、火藥、硫酸、毒藥、手鎗、手榴彈、三角銼、殺蟲水等，每樣能夠獨當一面既武器，都要放係入口既行李寄存處，收費約5歐起跳(我無存到唔100%肯定)，囉一次計一次
至於「大袋」既定義係任d黑人食蕉話點就點
一般嚟講約係單車籃放我落既size，但我今次就係團友同一個袋第一次入去ok第2次唔比，最後嘈左一輪兼有人幫口先肯放行
此事係我IG story「慕尼黑篇」有講，大家可以去重溫下~
此外金屬水樽、火機等，亦有機會於入帳篷時ge check bag被要求放住係Tent門口，不過唔使比錢，係飲完酒唔記得囉既機會較高je
6. 會場結構
慕尼黑啤酒節會場佔地約兩三個維園咁大，大約分為遊戲區和帳篷區(Tent)
遊戲區就好似中環AIA嘉年華，又鬼屋過山車無敵風火輪，逐樣收費而且唔平，仲要小心d醉酒佬玩風火輪時風火輪式嘔出嚟
帳篷區就係今次大家既目標啦! 即係大家飲啤酒既地方!
其中又分為大Tent和細Tent，你當係大間細間既啤酒屋啦~
大Tent一般是大牌子既啤酒廠，如HB、Paulaner 、盧雲堡Löwenbräu等，一個Tent可以坐幾千人，甚至仲有另一間屋作副tent tim
細Tent就包括……. 算啦香港人都唔會識ga la，總之就細好多啦
以2024年嚟講，大Tent有14個，細Tent有21個
大Tent細Tent各有好處，不過一場嚟到，當然要去人最多、最熱鬧、氣氛最好既大Tent啦!
你山長水遠飛十幾個鐘都係為左個氣氛je~ 真係為飲一杯啤酒後返屋企咩~
但大Tent既人又超級多，特別最受歡迎果幾間如HB、Augustiner等可以迫過年初一黃大仙上香，隨時有人流管制唔比入
而小Tent為左搶生意，一般d酒都會平1、2歐，某d時段甚至會有Happy hour優惠，而且人少d無咁嘈，適合較文靜既I人~
大Tent
大Tent
大Tent
細Tent
細Tent
7. 帳篷內的位置分佈
首先講Tent內~
大部份都係以中央舞台為核心向外擴展，你當係煎太陽蛋，舞台係蛋黃，蛋白部份就係場內氣氛最熱鬧既地方，幾乎唔會有人坐底，一定企哂係凳上飲住啤酒跟住音樂狂un狂跳!
放心啦呢度唔會有實Q因為你企起身而拖你走的~
至蛋白外既煎pan黑色部份，當然都感受到熱力，但氣氛普遍都係冷左一截，更不用說二樓樓上果d，真係同食爆谷睇戲無咩分別ga ja
所以識玩，梗係點都逼入去蛋白area啦!
睇下實Q幾惡~
(東方昇果次其實係煎pan位，不過佢地要拍野講野都好合理)
- 毛記果條片 : https://www.youtube.com/watch?v=Xxxq807lLY0&t=806s&pp=ygUW5q-b6KiY6Zu76KaWIOWVpOmFkuevgA%3D%3D
由於人流實在太多， 唔少大Tent都會開放埋戶外空間
戶外只能聽喇叭傳出來既音樂，理論上該會比黑色煎pan位更沉寂
但唔知係我好彩定唔好彩，我去親d Tent外都特別多痴線佬!
露股镎又有，小便緊比杯啤酒你又有，唔通真係「被趕出課室既學生特別曳」?
其實當full哂house既時候Tent外都的確係一個選擇，不過小心落雨啦~
以上為大Tent既配置，細Tent就當係一間有Live band既酒吧，無咩好講啦~
另外某d大酒廠會於大Tent後方另設副tent，我無入過去，但係外圍望氣氛都好似ok~
8. 啤酒節入場方法
進入啤酒節會場，以及各大小Tent都係免費的，簡單啦~
唔簡單既係搵位呀! 無位就無酒，無酒點玩啤酒節呀?
基本上在慕尼黑啤酒節搵位既方法有4種，兩種正式，兩種偏門 :
正式方法 ——–
官網book枱
正式官方既說法，係可以於官網預約座位的，但大部份都晨早full哂
無計，大部份慕尼黑既公司傳統上係會包張枱同員工一齊玩當春茗，何況你而家同緊全世界既人搶飛wor~
儘管話開幕一個月官網有機制系統去比人退票+重售，不過一般都係6-10人枱無咩大用
對香港人嚟講，約埋10個fd入長洲都難啦，難度你想玩到咁大2個人去都book 10人枱??
Walk-in搵位
無得book就walk in啦!
多數大Tent都設有non-reserved area，比無book枱既客人自己走埋去，只要係該範圍內自己咁犀利搵到位坐低，自然就會有該area既waiter過嚟serve你問你要幾多杯酒的~
不過要小心留意邊d枱坐得邊d唔坐得，有人預約左既枱面多數有紙寫住，唔好見有吉位就飛撲埋去
另外由於場內年宵咁多人，non-reserved area的指示多數非常唔顯眼，個人建議可以問下行過的waiter or樣貌全部超凶狠既實Q，禮貌+笑容永遠無死ge~
不過講真，peak hour搵到蛋白area位既機會率真係好低，祝大家好運啦!
唔得既就換Tent或坐外圍啦~
門口等仕入tent內係常見事，呢張相好少人啦
以上係非常正式既入場玩樂方法，以下介紹既兩種係比較偏門，但又的確係可行既方法……
即場撩人搭枱
多數去得啤酒節玩既人都係超級E人，非常樂於同人傾偈識朋友
所以只要你有超強勁既交際手腕，或超強勁既身材，絕對可以撩人傾兩句就搭枱一齊玩的~
此方法係連reserved table既人都有用，而且成功率唔低，仲可以識到朋友tim! 話唔定一段美好姻緣亦由今晚開始呢!
當然係一晚定更多晚就閣下既事啦~
(利申我無用過呢招識過女仔!)
搵杯酒自己high
根據規定，Tent內應該要有座位waiter先可以賣酒比你，但間中亦有waiter為左賺多d，而向搵唔到位徬徨遊盪緊既你，靜雞雞又好大聲地問「係咪要酒呀? 囉錢嚟!」
比完錢後，佢就會轉頭囉杯酒比你，由你自生自滅~
其實重點都係要杯酒同場內live band je~
呢個時間妳只要囉住杯酒逼入蛋白area，個氣氛係同有座位一d分別都無ga~
Yeah可以盡情發癲了!!!!~
呢個方法可以話成功率最高，亦超級多人用，所以除非閣下係聽到粗口都會打冷震既正義魔人，否則就去好好enjoy la~
9. 啤酒價格及其特色
每間廠的啤酒價格其實可於官網睇到
2013年既啤酒節，一杯1L啤酒大約係9歐，當時兌10即$90
2024年既啤酒節，一杯1L啤酒大約係13.5-15歐，當時兌8.6即$116 – $129
wa咁貴! 比埋個蘿友你呀笨!
但當你諗香港一杯500ml都要約$80加一，1L又好似算係咁wor!
2013年我飲左3杯
2024飲得兩杯
大部份酒廠供應的都是「啤酒節限定版」啤酒~
同平時既Large有咩唔同?
根據我個胃既人肉實測，場內啤酒會比一般飲到既濃度略高，味淡，啤酒花較少即係無咁苦，碳酸含量大幅減低，即係方丈咁少氣呀
再簡單d嚟講就係更易入口，方便大啖大啖倒落肚，令大家更快進入興奮狀態~
從我返到住處嘔左2個鐘就知有料到啦~
不過奇怪，成個會場內醉到嘔既人其實唔多，甚至可以話極少，至少toilet同地板我未見過有嘔吐物，啤酒杯內反而見得多
所以醉呢家野，扭曲阿Tyson果句 :「唔係d酒勁，係你廢je~」
(當然草地上大量醉酒人士係基本功啦)
10. 有乜好食?
Tent內可以order食物，有d大併盤非常巨大睇落好吸引!
不過咪又係豬手呀腸仔呀薯仔沙律呀果d，德國菜咪又係呢d
價格我唔知因為無食過，估計唔會平，不過果個moment就算幾貴妳都會買ga la~
另外不時會有d「賣麵包的小女孩」嬸嬸穿插於通道，價格約比市面貴3-5倍 (我指個麵包唔係個嬸嬸)，而且個Pretzel硬到扑得死人，唔建議買
(其實我想影個嬸嬸，點知個靚女waiter走左入鏡)
放心~ Tent外會比較多價格合理dd既小食
例如腸仔包、豬扒包、燒肉包、鯖魚包、炸魷魚包、鞋過鞋底既三文魚包等等
亦有以上既齋protein ver.、炸薯條、焦糖杏仁等等
總之只要有錢就唔會餓親啦! (都幾廢話)
但個魷魚圈完全無味，可以不吃
唔怕腥既，個鯖魚包其實好好味~
啤酒節既資訊應該差不多啦~ 最後都要提下大家注意安全 :
- 我遇過Tent內小販話幫你影張相，轉頭就整個鎖匙扣出嚟收你6歐。記住除非你主動搵d小販，否則自動埋身既一律當賊辦!
- 場內龍蛇混雜，我見唔少人偷偷地明目張膽索一d白色既粉末，如果有人請你食記得拒絕，點都唔會係糖嚟ga!?
- 場內醉酒佬特多，所以儘量唔好同人嘈交，周圍的確企滿住保安人員，但我怕你無左兩隻門牙先叫到實Q呢
呢個樣真係on9到呢……
總之， 慕尼黑啤酒節真係一個一生人必須去一次的盛大慶典!
希望呢篇文章可以幫大家做好準備，去到啤酒節放開心情，盡情狂歡啦~
有咩問題可以隨便email或IG fb DM我呀~
慕尼黑啤酒節官網 : https://www.oktoberfest.de/en
========================
請大家Follow我Instagram啦~
=====================================
=====================================
我既Youtube Channel已經開通啦!!!!
快d Click入 「鋒加西亞 / 旅人瘋語」Subscribe 睇片再比個Like禁個鐘仔啦!~
鋒加西亞/旅人瘋語 Youtube Channel
主要影片 ：
白濱系列 :
- 【和歌山】【白浜】白浜七大溫泉評價! 熱到烚腸仔? hea到似街市? 浸哪個好一一盡錄!
- 【和歌山】【白浜】超高性價比溫泉酒店介紹!(上集) 最平最型，兩層複式+望海露天風呂，竟然港幣千零蚊!?
- 【白浜】【和歌山】超高性價比溫泉酒店介紹!(下集) 「白浜館」好味到難以置信的一泊二食︱房內優雅露天溫泉+市中心對正沙灘，勁抵住!
旅行故事系列 :
=================================
相關篇章 :
歐洲隨筆
《002 – 德國人少見多怪的飲食習慣(上)》
《003 – 德國人少見多怪的煮食習慣(下)》
《005 – 卑鄙無恥的免費廁所全攻略》
《006 – 路不同，各自遠走》
《007 – 土耳其烤肉卷》
《008 – 喚起聖誕的葡萄酒》
《009 – 外國月亮特別圓，鬼佬床褥特別軟》
===============================
Email : funggarcia@gmail.com
文章同時刊於以下平台，請各位多多支持呀!!!!!!!!!!!!!