點解特登呢個時候要寫一篇咁既野，因為今次挪威自駕遊，超過一半時間都係係架車度的
縱然多年來已坐過無數痛苦之極既長途車，但仍以這次為最!
總應該用片言隻字記一記既
今次自駕遊，起點由芬蘭Rovaniemi開始，到瑞典Kiruna後我加入，再直駛到挪威Lofoten islands，總共7個人
我個fd小笙一早話book錯左架車好細既車可能會逼d
唔緊要～我上年曼谷去華欣果程小巴已經見識過“逼”既極限啦～只係我唔記得有樣野叫突破極限g ma!
基本上係一架7個人坐都有d逼既私家車，另外再加7個人既行李…………
唔夠具體？你可能想像車內空間係俄羅斯方塊，但長期處於仲有3行就game over囉!
除司機外既腳下大脾膊頭凳底，全部都係喼同袋，每次上車落車都玩一次倉庫番…….
手腳基本上成程車都動彈不能，真係練習扮演五香肉丁既最好機會!
去程時雖然大家都做緊沙甸魚，但奇怪地感覺並不算太難受
最主要原因係沿途風景實在太靚啦!!!!!
瑞典既冰雪世界固然夢幻，但到挪威後既湖光山色就真係叫人目瞪口呆啦!
倒影見得多，雪山既倒影真係未見過!理論上個湖應該結哂冰ga!?
陽光下汽車高速飛馳，看盡極美的山水……感覺似籠屋有維港海景，算唔算苦中作樂？
但風景睇得多都要抖抖，咁長車有咩做先？
同行者中其實最好有一個可以雞啄唔斷既口水怪，咁起碼唔會dead air,一dead air司機就好悶好易訓好危險ga la!通常呢個都係我，但用英文打5折ar plz
好彩今次既柴可夫100萬個多野講!我都甘拜下風，總叫有d生氣～
另外要長途自駕遊既，唔該預備10000首MP3，一首歌幾好聽都好，重覆到第5次你已經想熄左佢ga la!
如果你係車上睇戲會暈，聽歌又覺無癮，坐長途車有個秘技可以無咁辛苦ge
一個字 —– 訓!
只要你訓著，咩擠迫夾腳苦悶無聊乜都無ga啦!
所以，你唔使渣車既話，唔該之前果晚訓兩三個鐘好啦!
不過我聽過有d人自駕遊個司機唔比乘客訓，話唔公平又乜乜乜
我同意副駕唔訓得要負責keep住個司機清醒ge，但其他乘客……唔好咁啦，無野做又困住係好痛苦ga!
食方面，零食係唔少得的，真係會令你感覺輕鬆開心左ga!之不過又坐又食之後見到自己條車軚會唔開心返g ma………..
而沿途未必有餐館，除非能吸風飲露，否則最好前一晚整定一大堆三文治，釣命ga!
何況前一晚大家一齊整三文治，第日休息時於戶外野餐，感覺都唔錯呀
所有長途車乘客都會同意，上車後，你會從來未咁鐘意過油站!
特別係你坐到第4個鐘打後，果個唔係油站，係綠洲!係酒池肉林呀!
係綠洲，你可以拋開所有負擔，展示你筋骨柔軟度，攝取你想要既飲料，釋放你之前既飲料，簡直就係囚犯放監呀!
當然啦，返上車時都會有返監倉既感覺
回程時，因為少左兩個人又少左好多行李，由五香肉丁變成樂天熊仔餅， 諗住好d啦~
但我太天真啦………….坐位係鬆動左10倍，但呢程車由挪威Lofoten到芬蘭Rovaniemi，要橫過成個瑞典北部，由朝早6點半出發，我地一直到夜晚10點半先到達!
16個鐘車呀!!!!!!!!!!!!!!睡公主都訓唔到啦!!!!!
不過…….就算我地乘客幾辛苦，其實最陰公都係柴可夫……..
同埋細心一睇，同係北歐同係北極圈內地域，但3國係有明顯不同的
挪威山多湖多彎路多，温度亦明顯不高 ; 到瑞典時，卻會變成一望無際的純白色森林 ; 芬蘭四周就是平原，白色一片沒甚特別
而溫度方面瑞典亦明顯低得多，車內溫度計顯示過最低-36℃，未計real feel wor!到油站去室外廁所時，個感覺真係會凍死人ga!
不過一回到車內就24℃，一出一入溫差近50度…………
而這時車內兩位芬蘭人又好似唔太滿意全廣東話既對答，變左我同小笙講大學時代d八卦野都要用英文，即刻有d無癮
就係呢個苦悶既情況下，最終坐足一日車，到達小笙同佢男友居住既芬蘭北部城市Rovaniemi啦
心水清既朋友，都知我下一章會講咩ga la~
最尾加返個小學生作文式總結先 :
長途車雖然係極辛苦，但事過境遷後，他日諗返起，你又會覺得幾過癮ga la~
呢個都係我而家對呢程車既感覺，針無拮到肉ar嗎
===================
相關文章 :
《德國working holiday第五十三章 : 北極光全攻略》
《德國working holiday第五十四章 : 挪威Lofoten，漁村美之極致》
====================
Email : funggarcia@gmail.com
Instagram : https://www.instagram.com/fung_garcia/
My Facebook Page : www.facebook.com/Garcia.in.Germany
Medium : https://medium.com/@funggarcia
另外文章同時刊於UBlog、 DC Fever Travel、 Blogspot 、遊牧爆谷，請各位繼續多多支持呀!!!!!!!!!!!!!!
