因上一篇所講Kaliningrad混亂既交通，我第n次更改行程，早左一日嚟到立陶宛首都維爾紐斯Vilnius
不過又一句重複左n次既老生常談，塞翁失馬焉知非福，我走左班車，但竟然於亳無計算之下撞岩2月16立陶宛國慶日!
對於鐘意體驗外國特別節慶既我嚟講，真係好似中獎一樣，有無咁岩ar？？？
死啦真係越來越覺好多野真係注定的………..
到達後飽睡一晚，第二日微雨中漫步維爾紐斯舊城區
比起Tallinn and Riga，Vilnius舊城區算是比較細小，也沒有很多高大或超華麗的建築，但卻很有小國寡民的樸素感，令人感到親切。
同時柳暗花明，左一柺右一轉，隨時能看見某些戰時遺跡，或於小巷中發現驚喜
舊城區北邊是維爾紐斯大教堂Arkikatedra Bazilika及Gediminas Tower
前者為主持國家級重要宗教儀式的典堂，後者則可登高望遠，唯溶雪時石地超濕滑，小心進一退二……
Vilnius舊城區內有一處叫Užupis（中文譯“對岸共和國”或“奧蘇比斯共和國”）的所謂獨立自治國家（私人國家，未被國際承認）
根據維基王百科:
「1997年4月1日愚人節，該區宣布成為一個獨立的共和國，並擁有自己的國旗、貨幣、總統、憲法，並成立一支12人的軍隊」 ，而憲法包括「每個人都有權在維爾尼亞河邊生活，維爾尼亞河有權在任何人身邊流過」，「一隻狗有權去做狗」和「每個人都有權去不擁有權利」等等……..
總之就惡攪成份甚高……..
同時這裡係藝術家聚集的聖地，去到仲可以係passport打個豬嘜印證明你到此一遊!
但個嘜頭無開門之餘，我覺得呢個區域並唔算非常非常特別，至少北京798壯大好多……….
點都好，Vilnius舊城咁細，行埋佢都仲有大把時間，如果一場嚟到無理由唔睇睇ge
到下晝4點左右，各國慶節目開始啦～
首先係總統同主教演說，唱國歌及鳴槍，之後係市中心大街有簡單既巡遊，教堂有彌撒，教堂旁廣場有少林功夫加唱歌跳舞……..都係呢d la~
吸引我既反而係晚上既Gedimino大街燃起一個個熊熊烈火堆，仲要係路飛開party果隻正方形～
十幾個campfire一路向上伸延，配埋燈飾，都幾壯觀華麗～
不時仲有手風琴在旁演奏民歌，我幾乎想問可唔可彈首”成吉思汗”嚟跳下舞ar?
營火盡頭，有一班救世軍型機構在派發立陶宛傳統濃茶，我當然唔執輸啦～
味道不算特別，但寒冬中團在火邊飲飲茶同陌生人傾傾偈，氣氛一流呢!～
呢種慶祝獨立日方式雖不如煙花盛放咁璀璨奪目，但自有一般豪壯的熱鬧氣氛!
唔好又鬧香港政府住! 街上起火堆呢件事香港真係做唔到! 至少消防條例一定唔比過!
更重要既係，如果攪得成，全香港d腸仔雞翼肯定一個鐘內掃清光!!!!d師奶唔port到你暈!!!!!!？？？？
（飲茶時認識的韓國及日本exchange大學生）
晚餐方面，立陶宛菜同其他東歐國家一樣，味濃重肉多油大份量
之不過佢地更擅用豬呢種食材，豬耳豬手都係著名的，不過可能情意結，都係廣東既鹵水豬耳同南乳豬手正d!
而hostel推介既兩間餐廳Snekutis及Aline Leiciai都係價廉物美既上上之選，飽到上心口都唔使$100! I love Lithuania!!!!
左上 : 蒜蓉麵包吸油條+芝士醬，傳統小食，好味但極肥極濃!
左下 : 自釀白啤酒，有花蜜及煙燻香，勁好飲!
右上 : 食過最估你唔到既食物!焗薯仔麵粉（德國配豬手果種薯波波既粘質地）+煙肉白汁，但下層竟然係水煮爛既連骨南乳豬手走南乳…….但又幾好味wor
右中 : 薯蓉包肉碎餡煎成餅+酸忌廉，油，但又係好好味!
右下 : 自釀黑啤+煙燻豬耳
（黑醋什菜羊架）
真係要講講Hostel “Home made House”!
此Hostel由一對德國+立陶宛的夫妻小本經營，係我而家訓超過40間hostel以來真正最有“家”的感覺!
當我早上經歷上回講既混帳走車事件後，晚上到達雨中既維爾紐斯已身心俱疲
但一開門，老闆娘已用笑容迎接我 : “Welcome! How’s your day?”
“Bad day, the worst day ever”
“oh…..It’s ok, we will make you feel good~”之後帶我入大廳倒杯紅酒比我定神，同其他住客一齊嘆酒傾偈一輪先聽我講發生咩事，仲細心咁幫我plan埋市內遊覽路線及我去其他地方既交通，而我亦都未見過hostel過客會聚埋一齊食早餐玩Jenga
男主人Loco非常健談熱情，就算我有交友疲勞症感覺都好似相識多年一樣!
我晨早7點離開，佢兩個眼訓極都堅持起身送我走，我直情覺得只住兩晚咁少係對唔住佢地呢!
亳無疑問，最親切溫暖的Hostel，無之一!
===================================
IG果邊間中會有d和Blog及fb page不一樣的相片和story，大家有興趣既去follow下支持下啦~
Instagram : https://www.instagram.com/fung_garcia_backpacker/
==============================
我既Youtube Channel正式開通啦!!!!
快d Click入 「鋒加西亞 / 旅人瘋語」Subscribe 睇片再禁個like啦!~
=================================
Email : funggarcia@gmail.com
Facebook Page : www.facebook.com/Garcia.in.Germany
文章同時刊於UBlog、 DC Fever Travel、 Blogspot 、遊牧爆谷、Medium，請各位繼續多多支持呀!!!!!!!!!!!!!