有睇小弟facebook都知，岩岩9月又去左一轉日本………..
無錯又係日本……實不相暪我係真係好鐘意日本旅行同日本既事物的!!!
日本菜啦，日文歌啦，日本動作片啦………………就lai變埋日本專屬Blogger ga la…………
唔得呀!!!呢個世界仲有好多野未發掘!!!!唔可以屈死係一個地方ga!!!!!!
今次呢，其實係阿哥需要去東京參加婚宴，兩兄弟好耐無一齊旅行過，咪再順便去大阪探親友law~
東京入大阪出，唔用腳行唔坐巴士的話，最抵既交通方式都係整個「7天北陸拱型JR Pass」沿北陸——-即富山、石川、福井等縣玩過去~
最正係可以新幹線當普通火車咁無限任坐，1個鐘既車程10分鐘攪掂，慳時間到爆~
所以今次「北陸之行」系列係base on呢張pass lai玩，唔打算自駕既朋友絕對可以慢慢追post參考參考!(好老式既賣廣告說話…….)
原本我想寫寫上年九州之行先ge，但諗諗下都係打鐵趁熱好d，凍左既就等佢繼續凍啦~
短短幾日，內容太多，預計會寫6-7篇，希望大家繼續支持呀!!!
好啦~前言講完，新連載開始!
=================================
黑部峽谷貴為日本落差最大最有名既峽谷，去得富山縣就無理由唔去ga!
Wa~~~~~~~睇相秋天時滿谷紅黃葉，真係靚到仙境一樣!
Um~~~~~~~但尋日日本打10號風球落大雨ar!!!!!!!!!仲有9月中有鬼紅葉咩!!!!!!
唉一早plan好哂又無理由唔去wor，唯有頂硬上啦……..
去黑部峽谷其實都幾”撓崎”
由東京出發，坐北陸新幹線到富山縣「黑部宇奈月温泉駅」，出閘後行去正對面的「新黑部駅」(超近，一出就望到) 坐20分鐘富山地方本線(要另外買票) 到達「宇奈月温泉駅」…………
wei大佬ar d名「衛詩 詩雅 衛詩雅」咁睇死人咩………..
宇奈月温泉區
而呢個攪左3粒幾鐘咁先lai到既地方，sorry，進入峽谷既入口ja….…仲要坐多1個鐘小火車先正式去到黑部幽谷深處…….
所以好多人都會選擇係呢個「宇奈月温泉」區過一晚夜，而事實呢度又的確係極有名的溫泉小鎮，就算唔住，stay一陣行個圈都係樂事~
雖然條街無乜野行，但近小火車站處的山彥橋觀景台風景相當不錯!
當然落緊雨時威力減50%是常識吧………….
誰不知落雨無view只係我今次「北陸之行 – 黑氣降臨傳」既前菜小點
小火車買飛時先知，計劃中既重點行程「鐘釣溫泉」因尋晚打風河水上漲要臨時關閉!!!!!!呀呢個係我黑谷峽谷最想去既地方呀!!!!!!!!!!!!!!!!
只好退而求其次去plan B的峽谷終站「櫸平」啦……………….
唉「霉運之達人」既綽號真係唔係浪得虛名…………….
黑部峽谷鐵道小火車
講少少架小火車~
由字奈月出發至櫸平大約一至兩小時會開一班，全程約一小時，中途只會停黑薙、鐘釣兩站，再上車要再買飛，無套票或pass，來回飛與買兩張單程只係皇恩浩蕩咁差左10yen，詳情可以睇呢個網址~
http://www.kurotetu.co.jp/tw/fare/price.html
車箱分為兩種，密封式既貴d，開放式既平d
當時我心諗痴Q線，邊有人坐密封式ga??? 要觀光梗係開放式同大自然世界零距離啦!
點知一入到峽谷溫度竟然急劇下降!!! 過隧道時更加估計去到攝氏10度以下!!!! 喂大佬外面廿幾度短袖衫緊ga!!!!!!!!
只好同阿哥兩條友露宿者咁縮埋一舊…………
好…………x…………凍……..呀…………………
(另外出發前會有職員幫你影官方相，好似越礦飛車咁想要的話回程時可在車站購買)
就好似開波時所講，黑部峽谷以秋日漫天紅葉絕景馳名江湖，9月中呢d尷尬位又無花又無葉應該係最無野睇既季節，仲加埋落雨扣你50分，好應該悶到抽筋
但又估佢唔到wor!?
綿雨絲毫不損峽谷的宏大氣勢，灰色天空配綠色山林更顯出一股森嚴之象
更重要下雨帶來另一美景 ———– 嵐!
唔係果5條慒佬呀!!!!!!!!
「山嵐」係指溫度氣壓改變下的山中煙霞，將整個山谷籠上輕紗，為山勢的剛陽添上婉約，猶抱琵琶半遮面，若隱若現更為誘人
儘管火車路上只見山只見水，另加凍到黐肺，我地兩兄弟依然暢遊得非常開心，不停讚嘆呢一次無lai錯!
話咁快就冰鮮左一個鐘去到總站櫸平啦!
全車既乘客第一件事唔係去廁所，係衝上車站頂層既食堂整碗熱辣辣既黑拉麵驅驅寒!
今朝7點東京幾起身到而家1點先正式入到峽谷，舟車勞頓成6個鐘，唔食d野抖一抖好易死ga!
講真碗麵味道係not bad的~ 望住個靚view飲啖熱湯暖胃，梳乎~
黑部峽谷
正式遊下呢個日本最大落差既峽谷深處啦~
首先去車站面向河左邊行廿分鐘到達的猿飛峽，係整個黑部峽谷最狹窄既位置，窄到連馬騮都能一躍而過而得名
我望左好耐…………雖然話塌過山泥je，呢個位都未免太闊la掛…….腳下水流超急，各位屬猴人士請勿嘗試………
至於外觀，我反而比較鐘意一路上既景色呢~
行返廿分鐘原路返去車站腳下的「櫸平足湯」~
唔使諗啦~超多人洗緊臭腳，都係專心d睇下橋下風景啦~靚呀!
回到車站，過紅橋前方有另一名勝「人食岩」，感覺就同花蓮太魯閣既燕子口步道極度相似，不過呢度細d條路都短d~
好乜多溫泉呀………
繼續上斜前行，約5分鐘左右就見到櫸平既另一名勝「名劍溫泉」
喂又溫泉…….. 好亂ar……..究竟呢度有幾多個溫泉放題ar…….
簡單d講，小火車既起點係「宇奈月溫泉」，開車後會經過「黑薙溫泉」、「鐘釣溫泉」，到總站櫸平呢度有「櫸平足湯」、「名劍溫泉」同最隱秘的「祖母谷溫泉」
「祖母谷溫泉」話係以上所有溫泉既源頭，睇地圖只係距離「名劍溫泉」約1公里，但當地人千叮萬囑我地要有「最快都行一粒鐘」既覺悟! 即係話一定上斜加超難行啦! 仲要原路返lai wor! 睇相又唔係特別靚，我都係睬你都傻算了!
至於個「名劍溫泉」，又係睇落無咩好特別，望一望錶，就有下班車，不如都係早d走算了
返富山
下!? 山長水遠入到lai粒幾鐘就話走?????
係ar，最靚既風景係小火車都睇哂了，櫸平呢度都非常靚，但開始有少少審美疲勞了
下次當佢有紅葉既時候再lai過la~我都幾sure鐘意山水既老豆會鐘意呢處
不過我而家concern既，係要再用成兩粒鐘先去到富山………..坐車坐到ou ar…………..
=================================
我既Youtube Channel正式開通啦!!!!
快d Click入 「鋒加西亞 / 旅人瘋語」Subscribe 睇片再禁個like啦!~
岩岩開始，完全未有人睇呀~
=================================
IG果邊間中會有d和Blog及fb page不一樣的相片和story，大家有興趣既去follow下支持下啦~
Instagram : https://www.instagram.com/fung_garcia_backpacker/
Email : funggarcia@gmail.com
My Facebook Page : www.facebook.com/Garcia.in.Germany
Medium : https://medium.com/@funggarcia
另外文章同時刊於UBlog、 DC Fever Travel、 Blogspot 、遊牧爆谷，請各位繼續多多支持呀!!!!!!!!!!!!!