晨咁早離開住左兩晚美好既伊勢風見莊，開始呢個旅行既重點行程 — — 熊野三山，即熊野本宮大社、熊野速玉大社及熊野那智大社3座大野
雖然話三重縣同和歌山縣只係隔離，但由伊勢市出發去我第一個目的地熊野本宮大社都真係有d遠…….或者應該話太過山卡啦了!
8點鐘伊勢市出發，JR到多氣駅再轉特急到新宮市，再轉巴士上山進入紀伊半島中央既本宮市，之後仲要再兜一輪………..
(紀伊海邊真係好靚ar~)
(會經過熊野三社既速玉大社背面，呢個係Day4既行程，遲d先講~)
終於下晝接近兩點鐘先到達………6個幾鐘，我飛返香港再返到屋企煮完食埋個餐蛋麵都仲夠時間有突ar!
而我亦都知道，呢d咪無自駕遊既後果law~
(用左成朝先到既新宮市，仲要再轉車)
(乜鋪頭都無開既小城市)
不過，好似我咁要背包遊哂熊野三山都無問題ge
可以選擇買網上多人推薦既呢種「熊野交通3日Bus Pass」，新宮市JR對出巴士總站有售，3000yen任坐，計落都係抵玩有賺的
之不過要留意呢個pass只係for「熊野交通公司」的巴士，即係同樣行於熊野三山既「龍神巴士」、「奈良交通」等係要另外比錢的
由於山區巴士就好似中年男人既頭髮一樣密極有限，所以每到一個地點都要計好下班車係幾點開，等兩三個鐘都事小，分分鐘係成個下晝都無車ga! 我今日稍後就係因為咁奶左野………….
呀重有，要小心保管，張pass第日淋雨溶左一半………….
(因為真係乜店舖都無，係車站前小店買d咁既野上巴士做lunch算lu)
總算lai到本宮町本宮呢個山區小鎮!
落車地站係Information centre，對面直望IP都唔使check就係著名既熊野本宮大社!
入社之前，食d野先啦~
由於車程太耐加上新宮JR站周圍無野食，好多人落車後都會選擇係呢個小鎮食個lunch抖一抖先
我就梗係唔係普通人啦~係一個度縮既人g ma……………
慳錢慳時間，都係便利店三文治最快手! 反正日本便利店一向都係高質之選，求其一個三文治都正到爆
Ok我承認只係比個半熟蛋吸引左je~
(information centre的後方，用河床做停車場，有無咁大ar…..)
(生肉都有得賣，便利店做埋超市果份，又係有得諗wor)
正式入宮啦!
熊野本宮大社既主祭神是家都美御子大神，即大家成日講既阿彌陀佛
至於點解會係佢，唔好意思，我真係唔知，維基百科講ge~
我只係知以外貌來分辨既話，本宮大社以綠色為主色，由入口鳥居至參道至百步梯都插滿一支支白色旗幟，只係個氣勢已經夠勁揪!
至於本宮大社內部，老實講，就同尋日Day2.1既伊勢外宮一樣，意義重於美觀，
有古樸之意，無奢華之感
所以，都係睇相啦~
(每年住持都會寫隻字for a year, 今年係”気”，我不停諗，如果比我會寫d乜…….ok我承認我諗親既都唔係好野……)
千山萬水來到本宮大社，入去打個白鴿轉唔夠半個鐘無野睇走得?唔係掛!
係本宮呢個小鎮度，仲有一個超級注目既景點，就係號稱日本no.1既大齋原大鳥居!
好明顯我又係無做功課啦~lai到左先知有個咁出名既景點!
咁都無緊要，除非你盲左，否則要睇唔到呢個高約34m既巨型建築物真無無乜
可能更型既係，入鳥居前果一條超級大直路，左右方均堅壁清野，襯托起中央參道的高高在上!
果股氣勢，直情令你有許文強既感覺! 但前方大鳥居又有令你進入惡魔城打怪獸既一去不返氣慨!總之就係正!
我睇返d官方相，如果係春夏之際，四周田野一片青蔥綠油油，襯起藍天白雲更是美不可言!
既然無咁靚，唯有用我自己lai令佢變靚d la~~~~XD
(影相技術太弱，唔識點樣可以影到呢座鳥居既宏大，唯有亂嚟啦)
(官網圖片)
進入鳥居後的大齋原，為熊野本宮大社的原址，是河床中心的一片小高地
若干年前(唔記得幾多年)大社被洪水沖毀，於是搬屋到而家的位置，但原地仍然為神明所居，所以不能拍照– — — — -根據我超水皮既日文對個告示牌既理解係咁ar
傳聞呢度更係賞櫻秘景，不過我入到去就落雨，都係靜靜行一個圈感受下啦
(大齋原外之河床，咁既樣，好明顯落大雨時山洪暴發得幾利害)
本宮小鎮的景點大致上係咁多，係時候坐巴士去下一個目的地啦~
Ee~~~唔通就係岩岩駛過我面前呢一架~~~~太好啦~~~~~~我走左架一個鐘頭45分鐘一班既車呀!!!!!!!!!!!!!!
都係自己on居!唔記得一早check定timetable!!!本宮又已經完全無哂可以睇既野，肚又唔餓wor，點算!?
11號車ge話要咩住個磚頭一樣既背囊行個幾鐘山路wor，咪同等下班車一樣!?
的士呢? 一架都無!
順風車呢? 日本人都係唔識順風車手勢……..我試問過幾個車主可唔可以載我一程，結果都只係一個英文字NO!
咁都好過一個英文字Fxxx ge……….再諗方法啦……..岩岩幫佢地影相既西班牙情侶又無渣車…..
就係咁傻更更企左係馬路旁一面試hitchhiking一面徬徨左半粒鐘
這時身後士多的老板娘剛要關門開車走人，我就再決心一試，佢竟然主動話願意車我一程! 實在太感動啦!!!!!!
唯一有少少可惜既係我原本想去號稱日本最古老溫泉、已登錄世界文化遺產的湯の峰温泉つぼ湯，但因語言溝通問題，老板娘只不停叫我講我住係邊度住係邊度．．．．．．．
又的確唔可以亂咁當人司機既，雖然可惜，但都唯有直接去到我今日Ｄａｙ３既目的地川湯溫泉旅館「明日之森」啦
(網絡圖片，原本想去既湯の峰温泉つぼ湯)
如果熟悉當地既朋友，一定會知我下一集會講ｄ乜啦～
所以，又係下回繼續！
多謝唔肯影相上鏡既老板娘呀！！！！！
=====================================
- 相關文章 :
《【日本紀伊半島Day1.3】誤闖海女小屋食返餐總之好食就得》
《【日本紀伊半島Day1.4】風見莊是伊勢住宿no.1（無誤!）》
=====================================
請大家Follow我Instagram啦~
=====================================
我既Youtube Channel正式開通啦!!!!
新影片已upload，快d Click入 「鋒加西亞 / 旅人瘋語」Subscribe 睇片再禁個like啦!~
=================================
- Email : funggarcia@gmail.com
文章同時刊於以下平台，請各位多多支持呀!!!!!!!!!!!!!