旅行先lai落雨，從尋晚開始就無停過，仲越落越大，唉呢呢兩日既熊野古道係我重點行程lai ga……
咁無理由因為陰天就影響心情既(雖然點都有d)，一樣晨咁早8點就離開仙人風呂，坐巴士向熊野三社最有名的「熊野那智大社」進發啦!首先要去「大門坂」呀!
要去那智大社，首先又要坐返個幾鐘巴士出返去新宮市，再轉車去那智駅，而呢兩程車都可以用到Day3.1所講既Bus pass，所以都算抵返的
返到新宮望一望個時間表——-仲有成40分鐘先開車，無理由呆坐浪費時間ga….附近既徐福公園又已經望過………
把心一橫，一於走去原本想放棄既「熊野速玉大社」啦!
因為所有資料都話呢座速玉特色欠奉，行程緊迫既我本來就諗住算把啦六師弟，而家見有時間，當然係去埋來完成「三社制霸」既偉業啦!(其實只係去左3間廟g ma……有幾巴閉…..)
之不過唔係走去，係衝去，因為根據google map，由新宮車站出發到速玉大社要行20分鐘，即係一來一回要40分鐘，我仲要咩住個石頭咁重既背囊+落住大雨……………
結果係 : 小明咁衝到過去影兩張相拜兩拜後就快過小明咁衝返車站，開車前30秒上到車
一額汗ar………………………………………
雖然跑到嘔+出哂汗+腳都跛，而且速玉除左門口條橋外又真係無乜好大特式，但去望一望都係好事~
而係開車後10分鐘，我就發現，神社出面有個車站ar……………….
到達那智駅後要再等半個鐘先有得轉巴士，無自駕遊既後果咪係咁樣等車等車等車浪費哂d時間law……..
買盒壽司邊食邊睇地圖———um………..睇個路程，要係神社周邊搵locker放背囊似乎好有難度，雖然話背包客本來有行到邊孭到邊既覺悟，但經過頭先趕車既狂野時速擔泥真人版，真心唔想孭住咁重既背囊行山ar
呢個時候我望一望呢個簡陋既那智駅仍有一格空著的locker，二話不說，一腳就申個背囊入去
而之後上到山我發現真係無locker的! 所以想去那智大社既朋友，記得將行李係車站攪掂左先呀!
(話時話，個秋刀魚壽司好好味!聽聞那智係盛產秋刀的!)
十零廿分鐘車，終於來到那智大社參道，熊野古道中邊路最著名既一段「大門坂」啦!
基本上係所有鑿住「熊野古道」4隻字既宣傳照片都係影come from here的，即係果d「參天巨木樹影透光的山路走兩個和服竹笠少女出嚟」既相呢，真係無嚟過大門坂都唔算行過熊野古道呀!
等等先………..樹影透光同我有咩關係……..而家落緊dog shits wor…….
都無計ga! 唔通唔行咩!
拉一拉緊件防水羽絨，開始行山啦!
(入口超巨大的迎客樹)
意想不到既係，原來落雨都幾好feel wor
雖然無澄黃日照穿林而出的璀璨華麗，但雨中的森林卻顯得更莊嚴肅穆，參道兩旁滿是過百年的參天古樹，就好似步進巨人的世界，會驚嘆點解d樹可以活左咁多年都無人劈佢落嚟賣ge？日本人對自然及神明既崇敬真係不得了
而雨中既空氣更見清新，綠葉青苔顏色亦更見鮮明，故縱然係大雨下一步一步小心翼翼勁驚pk咁龜速前進，我仍然行得非常開心，不停為雨中叢林之美景而驚嘆
20分鐘後，我行完了
o下大門坂咁短ga ja？？？？？我預左行兩粒鐘ga wor!
不過都好ge，我件羽絨既防水力已經差不多到極限，連內膽都開始濕哂，要先搵個地方避避雨，再繼續向山上既熊野那智大社進發
(回頭望一望，估唔到咁快行完，有d唔夠喉………)
未完，下回Day4.2，繼續相多過字
=====================================
- 相關文章 :
《【日本紀伊半島Day1.3】誤闖海女小屋食返餐總之好食就得》
《【日本紀伊半島Day1.4】風見莊是伊勢住宿no.1（無誤!）》
《【日本紀伊半島Day3.1】熊野本宮大社&大齋原都好偏僻呀》
《【日本紀伊半島Day3.2】千人混浴︱川湯溫泉 仙人風呂》
=====================================
請大家Follow我Instagram啦~
=====================================
我既Youtube Channel正式開通啦!!!!
新影片已upload，快d Click入 「鋒加西亞 / 旅人瘋語」Subscribe 睇片再禁個like啦!~
=================================
- Email : funggarcia@gmail.com
文章同時刊於以下平台，請各位多多支持呀!!!!!!!!!!!!!