續上回做完步兵回到Sheki市中心有d餓，下晝2-3點食個lunch又有d heavy，小食最好既當然係本地出名既甜品Halvasi啦~
呢種好似pizza咁樣既阿塞拜疆著名甜品當地人話本身已經好好味，而Sheki呢度更係公認全國no.1的!
不過我又唔記得一樣野 ——- 齋戒月開始左大部份店舖都唔會開門做生意呀!!!!
由山上行落市中心，10間有9間都黑掹掹，好不容易先有間開門!
店員劈頭就話要成底咁買! 大佬你呢個批我屋企張飯枱咁大wor! 會唔會個面積已經大過我個胃既體積ar????
一輪手語，最終成功令佢cut一塊多士size比我外賣，1manat = $4.6，平ar~
當然係街邊坐底慢慢嘆~
一如所料甜到一個點!
Halvasi大致上係用米紙春卷既野包住大量穀物，另加好多好多好多糖漿整成，外層酥脆，內裡鬆化，口感有d似食藜麥飯
好唔好味就見人見智，但至少甜得嚟唔會好”kwok”喉，仲有蜂蜜既香味，一試無妨的~
食完好似唔係好夠喉，於是走去超市睇下有咩local野買
超市職員對有個外國人走入嚟似乎相當驚訝，不時派人跟係我後面睇下有咩需要
當我對架上無遮無掩無密封既糖果餅乾感興趣時，就即刻變身為日式超市係咁隊比我試食! 我第一次明白女士比人sale化妝品係咩感覺
結果就係一包二包咁買左堆做手信~ 大理石樣既朱古力同杏鋪都好好味呀~
3半左右回到民宿，這次終於有熱水可以沖個靚涼了!
但沖完涼既同時我就發現 ——- 點解我個人咁呆ge? 仲有d發冷tim……..
大鑊……..開始發燒了……..
即刻啪兩粒感冒藥，訓左個晏覺抖下先……..
訓左一粒鐘個人好似好返少少，望下天氣咁好，雖然話病都無理由浪費ga
Sheki剩下有興趣睇既野不多，就一於去Gunay介紹約廿分鐘車程既城外小村莊Kish (Kiş)啦
出門搵的士先 —— 又係你呀Ninja!!!!?????
尋日受老伯之託拖我上城堡information centre既圓臉的士佬呀! 咁有緣唔坐你車都唔得啦~
於是佢又發揮Taxi本色，橫衝直撞開行音樂，仲想抄捷徑而差d片上人地仲鋪緊既瀝青路，比人喝住先識sorry…………
本身想媽叉佢，點知佢又好熱情咁係橋邊停車話個view靚主動幫我影相……. 唉算啦
Kiş其實係一個四面環山的古村落，歷史大概可以追溯到公元1世紀
而盯到埗既感覺上同今朝上山前的村係有少少似的，梗係啦，唔通沙田公屋會同大埔公屋有好大分別咩
而Kiş的亮點就在於呢座Church of Kish，根據維基所講，呢座教堂因為政權交替都唔知改過幾多次宗教了，真係曾經滄海難為水左唔知幾多鑊，所以如果對歷史有興趣又有心機睇教堂內的英文的話，應該會好有趣~
至於周圍既風景，我自己就覺得可以啦唔算特別，不過我d朋友就話「靚wor!」咁所以都唔知係咪我審美疲勞了……….
好啦我承認如果有時間的話，係度飲杯茶都係樂事嚟ge~
而我最後係村內既路邊坐底，睇埋個日落就走人lu~
可能一休息個人就放鬆左，回到民宿我既發冷越來越嚴重，明明入黑後溫度只係25左右我都要著起我既冬天大褸!
好想係民宿就咁訓覺，但個胃又咕咕聲…….唉都要食野先有力氣同病魔作戰ga
出到市中心，點都唔想食返尋日果間又貴又唔好食既餐廳，係個市內行ar行…….
乜都無ge??????? 齋戒月真係齋得咁過份?????
好不容易搵到間門口有好多食物貼紙既店，行到入去發現都係茶館only! 去過伊斯蘭國家都知佢地d茶館真係只得茶飲ga ja!
等等先…….咁茶館唔係飲茶咁你想做咩呢?
點知wor，揚州炒飯都無揚州啦…………
Anyway，出返門口，見到有3位西方樣的外籍人士又係想同我一樣走入去搵野食
閒談兩句，發現大家同是天涯淪落人，都係餓到爆都完全搵唔到Sheki市內有咩本地餐廳! 似乎外出用餐於呢個地方係奢侈品呢……..
臨走前果位來自巴西的大舊佬比左一細舊街角有售既local炸麵包比我試食，好似新鮮熱辣油炸鬼咁又幾唔錯wor~
不過成舊啪既話我真係唔使食飯，而家一忽仔試味岩岩好，當做backup plan，繼續搵食啦!
但又真係搵唔到wor!!!!!
行左半粒鐘，even入去間靚酒店問reception佢地都話附近無餐廳開門! 只係話如果我想要可以要求水吧叮個麵包比我，有無咁誇張ar????
死火啦，唔通要去超市買杯麵??
最後reception同我講上山方向有機會仲有一兩間餐廳開緊，咁我向果邊行左約10分鐘，好不容易見到有一間kebab店!!!!
Wa離開左德國之後都好耐無食呢種我最愛既street food了，就你啦!
行到門口，腳都未踏入去 —– 「你終於搵到嚟呢度啦~」大舊佬三人組正熱情地向我招手~
其實! 真心! 我病到咁既死樣，一d都唔想同人講野應酬! 之不過咁既情景，唔通我真係掉頭走or坐開一邊咩……. 只好夾硬chok起個精神，開開心心食一餐啦!
好彩佢地3個都非常熱情健談，講下大家高加索既旅遊經歷已經不亦樂乎!
Last night in 阿塞拜疆，都仍然遇上好好既人呢~
(好明顯自拍時唔記得較返細光圈……….)
飯後無錯係精神左少少，但都係快d回民宿訓覺，希望聽日會好返少少啦…..
旅行作病真係好麻煩ar…….
下回繼續!
======================
相關文章 :
《格魯吉亞背包行Day4 – 烏樹故里，那僻遠村落中的僻遠村落》
《格魯吉亞背包行Day5.1 – 係咁ee睇下Kutaisi》
《格魯吉亞背包行Day5.2 – 一支公hostel天台BBQ》
《阿塞拜疆背包行Day6.1 – 司機傻更更 (#過客列傳13)》
《阿塞拜疆背包行Day6.2 – 熱心老伯有性格 (#過客列傳14)》
《阿塞拜疆背包行Day6.3 – Sheki市區與遇上的女士們 (#過客列傳16)》
《阿塞拜疆背包行Day7.1 – 與鬍鬚型男上山記 (#過客列傳17)》
=================================
我既Youtube Channel正式開通啦!!!!
快d Click入 「鋒加西亞 / 旅人瘋語」Subscribe 睇片再禁個like啦!~
岩岩開始，完全未有人睇呀~
=================================
IG果邊間中會有d和Blog及fb page不一樣的相片和story，大家有興趣既去follow下支持下啦~
Instagram : https://www.instagram.com/fung_garcia_backpacker/
Email : funggarcia@gmail.com
My Facebook Page : www.facebook.com/Garcia.in.Germany
Medium : https://medium.com/@funggarcia
另外文章同時刊於UBlog、 DC Fever Travel、 Blogspot 、遊牧爆谷，請各位繼續多多支持呀!!!!!!!!!!!!!