有睇開瘋人鋒語呢個Facebook Page ge朋友都知小弟岩岩去完日本關西東海一帶既紀伊半島兜左個圈，仲好Q
煩咁日日post相曬命tim!
由於連載中既東京之旅一早比一世遙遠，打鐵趁熱，呢次紀伊半島之旅就係我記憶猶新興奮依然的狀態下寫左先啦~
不過以我寫野既速度…………可憐我既東京散心分分鐘隔多一年先出到街……..樂觀的話……….
=============================================
返左新工後苦捱於地獄半年，終於完左呢壇大野可以放假抖下啦!
呢次行程以日本紀伊半島為重點，由東至西兜一個圈，或者再簡單d講就係由三重縣 入熊野三大神社，再落紀伊勝蒲、串本、白浜，再返大阪玩幾日~
講真張機票我就11月買，但要一直等到3月先出發真係好頂癮!就好似你放碗叉蛋飯係個埃塞俄比亞人佢面前同佢講「你餓多4個月就食得ga la~」(其實呢倉比喻唔太準確，埃塞俄比亞而家好發達ga la一d都唔窮)
點都好啦，餓左旅行大半年有多，我終於可以再次囉起背囊等我變身先做返個backpacker!!!日本，我lai啦!!!!!
今次旅程要由香港開始講起
話說我日日頭痛緊6點九龍灣放工點先可以趕得切EasyJet 20:45飛機。雖然話已有一擲千金坐機場快線既覺悟，但星期四放工時間真係塞一塞車都係咁先
就係出發前一日，下晝老細突然同我講:「阿鋒，我想你聽日下晝一齊落亞洲博覽館site visit」
果一刻，係我係呢個部門第一次展露出真心燦爛既笑容~
「我可以囉埋背囊去直接放工ga ho~?」
就係咁，無呢啦間有公司專車送我去機場之餘，仲完全唔使擔心遲到tim~Unun腳食個Burger King都仲得呀!
 |
| (估唔到旅程竟然開始於亞洲博覽館，好日都唔會由呢度行去機場啦) |
 |
| (兩層魚柳包好食還好食，但真係好貴………) |
廢話唔講咁多，話咁快到左關西機場啦
根據本文標題，如果你以為我會講關西機場既KIX Lounge同Refreshment Square點又平又正輕鬆舒適咁渡過漫漫長夜既 ——– 少年你太天真了，事實係你根本唔會有機會入到果兩間coffee shop
好似我咁坐Jetstar 凌晨1點10分到埗，計埋排隊入境，起碼都要01:40先出到閘
但唔好忘記，關西機場唔係得你一架凌晨機，早過你到又唔想出市區既旅客一早已經攻陷左兩間休息室果數十個床位，何況仲有大量預備坐第日超早機既旅客呢
所以現實就係，唔好話Café，機場內所有既連排座位都全部訓滿哂人，甚至M記內既坐位都Full house，搵到位比妳訓既，妳勁!
(見到有d妙齡少女好勁連枕頭棉被都帶埋嚟，唉我無地方訓ar，可唔可以…….)
點知我真係幾勁，竟然比我係偏遠既某個角落搵到5連椅空凳!
之不過坐低5秒後，我就知點解呢度無人訓了
此座位旁邊就係一部60”plasma超闊銀幕平面立體聲大電視，24小時不停以播放嘈到你嘔既電視節目，另外40米距離外既失明人士指示聲亦不斷提醒妳”呢度有道門係度呀”
嘈都唔梗要，重點係聽住一句野重覆幾百萬次好煩呀!!!!!!
終於坐係度睇左陣暗殺教室同高達0080就頂唔順繼續搵位啦……….
點解我仲好似攰左咁ge……
有諗過不如係Burger King、松屋、すき家呢d 24小時營業既餐廳內食d野捱過呢個夜晚
但始終唔係18廿二，唔訓一訓聽日真係唔會有精神開始我呢個期待已久既行程(另外亦唔想增肥…….)
正當我想求鬼其搵個角度做露宿者時，我突然發現一樣野——
「Terminal 1既1至3/F基本上係全部爆滿，3/F係國內線離境大堂兼商店區，咁國外線呢??」
望一望水牌，行上兩層樓高既電梯到達4/F，即刻就比我搵到一大排唔係只得一張既空凳!!!!!
當時已經係凌晨4點鐘，即係由我落機到而家我係個機場移嚟行去onon居居兜兜轉轉左兩個幾鐘，梗本就係自己傻仔!
所以奉勸大家一句，要頹訓關西機場，即刻上4/F啦，真係少d人ga!
(其實好想食松屋，明知一開始旅程就唔會得閒食…….)
(東京散心篇時我原本好想寫一篇aboutすき家，而家唔知幾時會寫到…….)
其實我做左backpacker咁耐，真係第一次訓機場，講起都有d失禮
老老實實，關西機場都真係幾舒服，椅子全部都有軟墊，每排椅子亦有一定距離，加上室內氣溫適中，空氣流通，絕無商場熄冷氣既焗促感
再者訓得機場既多數都係有經驗兼疲倦既旅行者，9成都有一定既自覺性，唔會大吵大鬧開Party，想安安靜靜同周公拍下拖都非常容易，訓訓下肚餓又有24小時宵夜，又會有警察巡邏
所以除左”光殘殘”左少少之外，我真心覺得比某d歐洲hostel訓得舒服~太光既咪用毛巾包住對眼，或者貼兩片青瓜遮住對眼law~
點都好啦，今晚總算有個短暫的安身之所
背包做枕頭，大褸做被竇，抱住個隨身袋，頭巾笠過眼，好舒服咁就係機場呼呼大睡，度過我今次日本旅行既第一個晚上……..
第二朝7點幾就比一堆普通話嘈醒，睜開眼，發現數小時前周圍d熟睡旅人已通通唔見哂人!
即係得我一個仲係大覺訓，再衰d講就係霸住人張凳……..原來7點幾已經係訓得晏……
(好唔慣一起身就比咁多人圍住…….)
穿帶好，洗個面，笑一笑
8點正坐上巴士，為期10日既日本紀伊半島之旅正式開始!出發啦!!!!!!!
第一站—–三重縣松阪市!
===========================
請大家Follow我Instagram啦~
=====================================
我既Youtube Channel正式開通啦!!!!
新影片已upload，快d Click入 「鋒加西亞 / 旅人瘋語」Subscribe 睇片再禁個like啦!~
=================================
- Email : funggarcia@gmail.com
文章同時刊於以下平台，請各位多多支持呀!!!!!!!!!!!!!