【印尼行火山 - 布羅莫、伊真火山】出發前需知+行程簡介

「去印尼行火山? 全世界咁多火山唔去，做乜鬼要去印尼呀? 印尼唔係只得峇里ga咩?」

無錯，係大部份香港人眼中，印尼咪等於峇里囉!

同Yoasobi等於Ikura，Ive只有張員瑛，櫻木花道、水戶洋平&其他一樣，仲有好多好野被人漠視左，慘!

咁不能不說，印尼的確本不在我的To Go List之內，只係某日比幾個IG旅遊行家朋友燒到——

印尼爪哇島的「布羅莫火山」日出和「伊真火山」藍火燄又幾特別幾靚wor!

咁岩時機、機票、天氣等等都夾到，於是此地就成為我2025唯一既新國家solo trip了~

而當我做功課時，見台灣的blogger幾個都話好易行，有對腳就得

但當我返嚟後，根本係無左超過半條人命! 果d網上資料skip左好多必須要知既部份呀!

所以，一如以往，希望呢幾篇文章會幫到大家啦~

印尼行火山

========================

請大家Follow我Instagram啦~

Instagram :
https://www.instagram.com/fung_garcia_backpacker/

[instagram-feed feed=1]

另外Threads果邊有我其他教書、旅行和大學時代既攪笑/悲慘故事，快d follow埋啦~

https://www.threads.com/@fung_garcia_backpacker

=====================================

文章概要

地理位置與機票
天氣+衣著
網絡與本地交通
住宿 – 平到癲
食物 – 都係平到癲
必備物品
如何選擇Tour?
行程簡介

1. 地理位置與機票

「布羅莫火山Bromo」和「伊真火山Ijen」位於印尼爪哇島東部，夾係泗水和峇里中間

地理上由西至東是「泗水」->「布羅莫火山」->「伊真火山」，坐船過海就係峇里但由於峇里和Bromo相距甚遠，加上峇里咁多野玩去到都唔得閒，所以多數行呢兩座火山既朋友都會以泗水Surabaya為出發點

而好多人唔知道，國泰係有機直飛泗水的!

每日一班，下晝2點幾機出發，回程下晝2點幾返到嚟香港，即係點都無得請半日假，d時間西到呢……香港人邊有咁多annual leave浪費呢

不過如果唔介意呢一點，坐CX真係最佳選擇，因為Asia Miles幾乎無人會換呢程機，分分鐘長連假都有得換!

至於Miles則為13000單程，同去日本一樣g ma，稅+油費仲平tim!

所以如果無得去東京大阪，咪去印尼泗水囉~

……

我自己都覺得講完呢句會比另一半打……

2. 天氣+衣著

熱呀!

印尼咁近赤道有咩可能唔熱，但又好似無泰國越南果種行出街即變燒乳豬果種咁癲

我9月尾10月頭去，泗水日間溫度約34度，夜晚約28度，短衫短褲都算舒服

不過一定要帶定禦寒風褸，因為呢個行程唔係玩泗水而係去行山睇日出，山頂好x凍ga!

簡單講即係要預備香港炎夏出街與初冬行山既衣物~

另外行山鞋亦係必須，大量路段都係火山灰泥冼到pk!

再講，你著對靚靚紅色Air Jordon去都無用啦，落到山咪一樣黑色

3. 網絡與本地交通

Club Sim、Air Sim等都包到，我去到山區都收到無問題~

當然去鴨記or落機機場買卡都無問題~

至於市內交通，泗水無機場鐵路，巴士亦不常見，反正泗水物價低唔係貴，去邊都係call Grab 或者 Gojek

用法同Uber大同小異唔詳細講啦，只不過兩個app既價格是可以有幾大分別的，無話邊個一定平d，最好兩個都望下先

如果無係香港或其他國家set定Grab 同 Gojek都唔使驚，泗水機場出口有大量穿官方制服又識英文既職員幫你

不過我個人嚟講係泗水call車都遇過幾多神奇事

例如架車係我面前直片而過但當我上左車，又或個司機開左另一架唔同車牌既嚟但系統又認到wor……

就係呢架，個司機嚟到話佢換左車……

4. 住宿 – 平到癲

泗水並非熱門旅遊城市，至少我成個Trip竟然一個香港人都見唔到!

連CX來回機都係full of 姐姐和大陸團!一句廣東話都無!

可能遊客唔算多，加上印尼本身物價低，造成酒店幾乎平到嚇死人!

點平法?

我第一晚純過夜既IBIS四星酒店，距離其中一條市中心大街步行10分鐘內，double bed room只係$170

咩事!? 係日本韓國連hostel床位都無呀!

呢間房$140一晚係咩料……

如果去到一向高價既國際品牌，全城最貴最貴JW Marriott，都係一千零幾一晚，即係香港濕9麗晶大賓館既價錢

係「平既地方要住貴野」既定律，我決定豪一次，book左泗水起碼頭5位高級既Double Tree by Hilton，比行完山返嚟既我好好休息~

亦都好彩係咁，我完Tour返嚟後病到9彩……

呢間酒店$600一晚，係咪平到癲左

只係呢個pool都無敵啦

5. 食物 – 都係平到癲

一講印尼食物，當然係印尼撈麵啦!

堅ga!印尼真係好多餐廳都賣撈公仔麵，味道仲同我地香港食到既一Q樣tim!

喂餐餐公仔麵，食到胃癌ga喂!

仲有其他粉麵飯ge，印尼菜同其他東南亞食物一樣離唔開燒、炸、辣，濃味多油，係重口味人士既天堂

幾Q多油……

印尼撈杯麵

我都鍾意重口味，但到第3餐已經有點吃不消，熱氣到清熱號沖涼都唔掂

好彩要食西餐、Pizza，甚至法蘭西菜都容易，甚至可以話必食!

原因咪又係平到hihi囉

唔好計Pizza Express一個Pizza+雞翼只係香港一個pizza 2/3價格

大街JI. Tunjungan上最靚最貴果間「Tunjungan 39」，前菜法式田螺，主菜咖哩燒魚，甜品自製花生雪米磁奶凍，加杯mocktail，加埋服務費&稅，埋單只係$150港紙……

呢個……就係Bill Gate食米芝蓮fine dining時既感覺啦?????

呢度$110港紙……

Tunjungan 39勁好食

叫到唔使錢咁

自製花生雪米磁奶凍

6. 必備物品

蚊怕水 — 就算市區甚至靚靚餐廳酒店都會有蚊，如果你同我一樣係蚊飯人，記得帶最強既泰國蚊怕水呀!
風褸/禦寒衣物 — even印尼邊度都熱，但夜晚總有d涼，到山頂更凍，凌晨等Bromo日出時更達零度!行山為求輕便，最好帶薄身擋風褸和摺到既薄羽絨。不過再唔得ge話Bromo觀景台村可以租衫的
水鞋 — Tour幾乎都會帶埋你涉水行Tumpak Sewu瀑布，爪地力強既涼鞋或有後踭既Crocs prefer~千其唔好著拖鞋，除非你想冼落山做空中飛人
行山鞋 — 呢個唔使講啦，行火山唔係行飛鵝山咁波鞋攪掂，同富士山一樣勁多碎石ga!
替換衫 — 呢度講既係濕身後既替換，因為行完Tumpak Sewu瀑布同潛完水係無分別的，女仔千其唔好一件白色T恤就算 (但我心裡希望妳咁著)
防水袋 — d濕衫濕褲濕底牌分分鐘要係妳個袋放兩日
頸枕 — 印尼既公路狀態唔會太好啦，架旅遊Van既避震又一定唔會太好啦，而上落火山既路中完天馬流星拳咁。所以頸枕唔係比妳易d訓覺，係令你唔好chok斷頸呀!
行山杖 — 伊真火山大上大落，路上又有大量泥灰，有枝行山杖安全好多
隨身食物 — 我個3曰夜Tour好似只係正經食過一餐……特別車程較長，一定要有d儲備食物。不過公路上都有唔少便利店，買水買三文治都好方便
殺龍巴斯 — 講真，48小時行3座山又唔夠訓真係好chur…… 有包殺龍巴斯，當行氣活血又好，拗柴頂一頂又好，總之帶定以防萬一啦

餐廳有蚊怕水提供真係好癲……

呢個係我乾緊衫既狀態

行瀑布經常要踄口

有個包同保礦力係身安心好多

7. 如何選擇Tour?

一般的印尼爪哇島行火山Tour，都係布羅莫火山Bromo和伊真火山Ijen連埋一齊，而且都會順路去埋千絲瀑布Tumpak Sewu三位一體，好少將阿聖父聖子聖靈分開

我今次參加既就係呢個Tour，係名為3日2夜，但其實3個地方會係48小時內去哂，兩晚都係要凌晨開始活動，所以第3日其實只係for transit妳到目的地

而4日或以上既團多會去埋某d海灘或文化村落參觀，是否需要就睇閣下興趣啦~

到妳真係揀團既時候，一定會發現點解同樣既行程內容，點解會有不一樣既收費?咁似hotel定ex叉叉個廣告口號ge?

其實各團不同之處，主要在於 :

起點終點會係泗水定峇里 — 常見路線係泗水入峇里走唔使行回頭路，不過返泗水交通費其實平d，何況泗水既生活、酒店、機票等都平好多，當然玩嚟講一定峇里精彩d
大團or私人包車團 — 大團係行山時甚至會同其他車既圑友一齊，落後左就落後左，跟唔上時可能有少少壓力。私人團導遊會就哂妳意思，甚至陪住一齊行山照顧，架車都會舒服d
住咩酒店 — 講真我Tour果兩晚間酒店超差，仲要一山還有一山差，大約係大陸3星旅館level熱水都無，訓完同無訓無咩分別 ; 我有網友跟私人靚團，有香港4星level，睡眠充足夠力行山好緊要! 不過考慮到我個Tour唔使2千但佢果個4千幾，又好似我果個抵好多wor……