伊真火山Mount Ijen先係印尼行火山之旅最後最強的重頭戲! 佢有兩大稀世景點 : 藍色火焰和硫酸火山湖!
而嚟印尼玩既遊客，就算唔去Bromo都一定會來Ijen!
今篇就同大家分享下，我呢次囉條命嚟教飛去行完既伊真火山之旅……
========================
請大家Follow我Instagram啦~
另外Threads果邊有我其他教書、旅行和大學時代既攪笑/悲慘故事，快d follow埋啦~
https://www.threads.com/@fung_garcia_backpacker
=====================================
文章概要:
出發與起行前的準備
預備上山啦
黑暗登山
下降去火山湖啦
藍色火焰與硫酸湖
伊真火山的日出
終於回程
1. 出發與起行前的準備
上集講到呢個3日2夜Trip既第2日中午11點我地離開Bromo，又4個鐘車，來到一個不知名的小鎮既酒店，我地會係度過夜然後先出發去伊真行火山
「過夜」呢個字形容得唔太貼切，應該係「過日」，因為我地將會係晚上11點出發
3-11，都有8個鐘妳休息呀~
少年你太天真了
呢8個鐘係包埋妳lunch、dinner、沖涼、執野，仲有按摩…..
呢度按摩港紙50幾蚊一個鐘好平! 之前瀑布同Bromo行得咁辛苦唔係唔按ar?
扣扣埋埋，得返3-4個鐘訓ga ja!
但都要訓ga，今晚係通頂行山ga……
間酒店睇落幾4正
晚上10點，我訓醒起身，坐係床邊發呆，諗返係呢間酒店呢幾個鐘發生既事 :
- 花灑滴滴仔無熱水……
- 訓訓下比蚊咬……
- 訓醒件晚餐三文治比螞蟻搬緊返屋企……
尋晚Bromo間酒店已經夠差，點解呢度可以更上一層樓……
再審視下自己既身體狀態 :
- 雙腳肌肉因為短時間過勞而嚴重疼痛
- 每行一步都痛到我尖叫
心裡知道係睡眠與休息不足令個人recover唔到，而且顛倒的睡眠+密集的體力勞動令我疲憊不堪
10年前可能我仲ok，但已41歲既我，恢復能力真係慢左好多好多
起身果個Moment，真係有諗過不如唔好行啦
但今次唔行應該呢世都唔會再嚟呢d印尼山旮旯，來都來了，雙腳貼滿殺龍巴斯，頂硬上呀!!!!
2. 預備上山啦
晚上11點出發，再坐多兩個幾鐘車，凌晨1點終於來到伊真火山山腳base camp
所有團友落車時都問大家訓唔訓到呀?
因為岩岩上山條路非常唔係路，仲顛簸過過山車!我以為炒車炒足一粒鐘!
第朝見到條路原來中左天馬流星拳咁，司機在深夜只能硬著頭皮片過去，無計!
亦因為咁，車上補眠亦泡湯了……好攰呀……
所有伊真火山登山團都會和其他tour夾成一group group人，每group由3-4名當地登山嚮導帶住我地行
佢地會全程於group的最前、中間、最後夾實，仲有一個負責上下遊走，確保隊內無人走散，都算幾好服務呀!
開始前會有briefing和教妳點用防毒面具，伊真火山係世界著名的硫磺礦，空氣中突然就會飄出刺鼻刺喉的硫磺味 (其實係酸性水蒸氣)
而到火山湖時更不用說，藍火和硫酸湖其實都係源於硫磺，火山口根本就係一個硫磺小天地，所以防毒面具係好緊要的!
登山費和工具費已包埋係Tour度
聽緊briefing，左邊3位就係今次行伊真火既導遊
3. 黑暗登山
凌晨2點，正式開波啦!
先講下今晚既行程先~
伊真火山的登山路線大約分成3部份 :
- 頭1.5km是上山大斜泥路，攀升約700米，大約要行75分鐘
- 中段輕鬆平路到火山頂，大約行15分鐘
- 由火山口至藍火焰火山硫酸湖，需急降700米，大約行30分鐘
即係所謂既「登山」，其實係同平時我買股票一樣上到最頂就會急速衝返落嚟
理想的話，大約2.5小時就會到達目的地~
聽落好似唔難wor~ 係香港平時行山都起碼3-4個鐘啦~ 你得ge~
開波啦!
果個係「平時」呀嗎…… 我而家咩狀態先得ga
對腳行平路都已經痛到想死，24小時前先chur左瀑布35層樓+Bromo火山，再加唔夠訓休息唔夠，體能只剩日常既20%
兼且山路斜率極高，火山泥又滑又冼，一開始5分鐘已經喘到肺甩! 仲有粒幾鐘要行呀!!!!
毫無疑問我已經處於group內最後的位置
中途都有一兩間士多買野飲
好彩我永遠唔使一個人行路I will never walk alone
仲有4字頭既奧地利女士，3位德國既少女，還有殿後傍住我地既嚮導黑Gym小弟
我呢6個最弱既已經跟唔到前面d 廿幾歲後生仔，乾脆另組成Behind group慢慢行互相扶持奸爸嗲!
如果無佢地精神支持，我諗我開波呢段路已經可以收皮
就係咁，大家慢慢行，慢慢行，辛苦就抖抖，悶就吹下水，一步一步地向山頂前進
遠處有光既地方就係峇里
同行既behind group
4. 下降去火山湖啦
好不容易，終於行完頭75分鐘既上斜部份，岩岩行到中途又有硫磺煙，帶住防毒面具咁行山真係再無命多幾程重
而家到平路就輕鬆好多可以抖抖~
抖鬼到咩，平路15分鐘後，就突然進入急降落火山湖既路段
呢段路先係成個行程最危險既地方!
所謂上山容易落山難，下降的路並非完整石級，只是之字形的自然亂石，斜到幾乎垂直，而且佈滿是火山硫磺粉末碎石
一個唔小心叉錯腳，就係超音鼠咁直碌落山，而下面全部都係岩石嚟
係呢個時候，又再一次提提大家 ——- 我對腳係完全無力ga~
好x驚呀喂!!!!!!!!!!!
我對腳每一步都係80歲阿伯咁震住放低，超驚落到唔知邊一步會突然發軟蹄，由睇藍色火焰變成睇地獄火焰呀!
但可以點呀?單行線後面一村人跟我落緊，讓路都讓唔到ga，頂硬上啦!
用呢個詞好似好老土，但呢段路真係步步驚心，有幾次差d差錯腳ga……
5. 藍色火焰與硫酸湖
我無死到呀!!!!!!!!!!!!!!!!!!!!!!!!!
千辛萬苦，行足咁多日，我終於來到伊真火山既終點啦!!!!!!!
經歷左無數生死關頭(I mean頭先落山每一步)，係時間獲得我既報酬啦!!!
傳說中既藍色火焰呢?~~
Ee?就係呢盤Campfire 啦?
原來世界聞名的印尼伊真火山藍火焰的面積，大約就係大尾篤麥師傅開兩個爐咁上下大
藍色火焰相傳係撒旦的證明，曾經係一夜之間用藍火屠殺了大量神職人員，但繼承了藍色火焰的撒旦個仔偏偏立志要成為驅魔師，於是一場大戰在所難免……
以上青之拔魔師既劇情同伊真火山既藍火一d關係都無~
根據導遊和維基所講，藍火其實係「高溫硫磺氣體在接觸空氣時燃燒所產生的化學現象」，由於藍火光度低，所以要凌晨天最黑時先係觀賞良機，that’s why我地要倒塔咁早出發了
導遊話藍色火焰世界上只有伊真火山和冰島會有，AI則話埃塞俄比亞Dallol都有，3者當中亦以伊真火山最為活躍
但最猛料都係咁，係咪他朝有一日我去冰島唔需要睇呢……
至於影相方面，你諗下成晚幾千個龍友都圍住呢盤火BBQ，zip到埋去影到一兩張已經好勁啦!
Set腳架?你試過比人打未~
另一重點硫酸湖正正就係藍火隔離，但基本上唔會有人理佢
唔係因為佢危險，只係一個好簡單既原因……
周圍黑媽媽叉睇到個湖咩! 有條殺人鯨係你面前都睇唔到啦!
而事實上呢個硫酸湖其實一d都唔危險~
無錯佢ph值係低過1，仲酸過胃酸，但只要無傷口唔入眼，洗下手落沖個涼其實無咩問題， d水仲暖笠笠好舒服tim~
絕對唔係d咩掂一掂即刻見骨既韋小寶牌化屍粉，更唔會話自由式50米後成個人唔見左
所以大家如果有幾十斤肉+鈣想抬上嚟溶左佢既話都係死心啦~
Btw我係湖邊聽到有人慘叫得好悽厲
好似係有個荷蘭仔岩岩落山時損手流血，之後走去湖邊洗手……
我後面其實就係個硫酸湖，乜都影唔到啦
係火山口觀星都唔錯~
6. 伊真火山的日出
係火山湖逗留約半小時就要返上火山口邊了
一諗起要踩返上果條又冼又斜又長既碎石路就有少少崩潰
不過最難既已經過去，上山總會易過落山，頂埋佢!
Non stop連續上返45分鐘，途中仲要不停閃避人潮，我終於係天光前既一剎那回到火山口邊!
Yeah成功啦! 我又無死到啦!
至於日出呢，導遊一早就話10月係睇唔到的，無咩期望
只係由天黑開始行到天光前可以完成完結，好似成功達成左一個大Mission咁je~
睇睇標高牌，2386m，仲矮過富士山成公里，點解會辛苦咁多……
咁我當然知座山既高度同難度係無關係啦，咁行富士山都好辛苦ge……
如果要我講，我覺得伊真火山既辛苦係短時間上落極大超勁chur ; 富士山既辛苦係上落山好很悶……
今次行山既戰友behind group~
天光之後，幾乎所有group都會係火山口休息吹水~
呢個就係慢慢同火山湖影相既好時候~
都咪話，清晨既山頂真係幾凍下!
全程毫無怨言傍實我地既behind group導遊小弟~ 仍話佢尋日leg day完，夜晚就比佢老友捉左嚟做tour guide
7. 終於回程
天全光後開始原路落山，就睇到好多上山時黑媽媽睇唔到既野
除左壯麗既山景，仲有每個行過身邊都會問你「Lamborghini?~(笑)」既車伕了
導遊話呢d「林寶堅尼」超勁貴，單程每人起碼HKD$1000，上山再貴d，會用既多數都係某個國家既後生仔女，佢地志在上嚟打卡，完全無任何挑戰自己打算，語氣間對此極度鄙視
講真，以我對腳既狀態，我承認如果只係兩舊水的話一定會叫人車我上去~ 無叫只係我度縮je~
不過而家既我，會好慶幸自己真係腳踏實地，一步一步咁征服左呢座火山
呢個應該係我一世難忘 (咁辛苦咁牙煙) 既回憶!
呢幾架就係Lamborghini
原路落山時，更加feel到岩岩摸黑上嚟時條路有幾斜!
成地火山灰泥，加塊木板就可以snowboard滑落山law!
不過可能大家心情輕鬆，Behind group一路上談談笑笑都唔再覺得辛苦~
70分鐘後，早上6點40分，共花了5小時，我地終於完成伊真火山攻頂之旅了!
回到Basic camp會有早餐食~
成個Camp幾百人都係岩岩行完落嚟，明明個個都成晚無訓，但熱鬧程度同開P無咩分別~
Behind group話我地呢一程行左約18000步，係上落山路呀喂，仲多過同女人shopping
個早餐算幾豐富~
食完野傾多陣就要同Behind group和我呢兩日既團友告別了，因為佢地全部去峉里，得我一個回頭路返泗水……
點解我無諗過去峉里ga!!!
點解我坐6個鐘車要返去乜都無既泗水呀!!!?????
係plan行程時計算失誤ga la……
不過又咁講，峉里食住都貴過泗水好多，要慳錢應該泗水好d ge
何況…… 行山就話我solo ok je，扔低屋企美女自己一個去峉里，家變都有份呀……
回程就係坐呢架車
8. 後記
回程車上，精神的疲倦，雙腿的崩潰，仍掩蓋不了心內滿滿的成功感
呢個印尼Tour，係自己奇差的狀態下，爬過了大瀑布、看了日出、登上了兩座活火山，見過前所未見的震撼風景
望下錶， 7點30分，今日先係「三日兩夜行山Tour」的第3日早上7點30分
wtf即係我48小時內行左3座山、睇左兩個日出、通左兩次頂呀!!!!
10幾年Backpacker生涯既我，真係第一次遇到咁chur既行程!
41歲既我真係唔認老唔得，我強烈懷疑過多10年我應該完成唔到呢個Trip
想著一陣要好好慰勞比自己休息下時，就係車上直訓到泗水了……
對自己好d，我一早book左泗水其中一間最高級既酒店DoubleTree by Hilton Surabaya，都係6舊水一晚ok啦負擔得到
終於唔係agoda 7.4分既大賓館，我終於可以正正經經沖個熱水涼啦!!
呢間酒店$600一晚，係咪平到癲左
只係呢個pool都無敵啦
原本計埋今日我仲有3日Full day係泗水玩，但由於雙腳正式報廢，第1 日係床上郁都郁唔到，差d要叫酒店輪椅推我上房
第2日開始發高燒，一整日食藥+訓
連續兩日行得最遠就係3餐落𨋢口囉Grab Eat……
到第3日先去泗水動物園同泗水公園行個圈當玩左，今次印尼之旅就此完結
講真，藍色火焰絕對唔叫壯觀，亦唔算好夢幻好打卡，但又真係世所罕有前所未見
如果妳只係為左呢團火而想特登山長水遠走嚟上山下海，咁性價比係有d低的
但如果妳係心裡有團火去挑戰自己，而最後成功獲得既禮物，就係人生難得一見既藍色火焰，咁就非常值得一到啦!
網上有唔少台灣Blog都話伊真火山「好易行」「人生必去」
而呢一篇文章，我就係用自己既生命話比大家聽 —- 諗清楚先好去呀!!!
9. 最後係其他行伊真火山既注意事項:
- Tour時盡量訓夠休息夠，特別係如額下再不能飲通宵後第日返工，已介通一次頂會謝幾日既年紀，會好似我咁會想死ga
- 火山口邊幾凍下要有風褸 ; 可以的話帶埋行山杖 ; 上山時有一兩間士多，但隨身都要有水和少量食物，e.g.朱古力。腳架用唔到的放棄吧啦
- 火山湖上落時同時會有硫磺工人在工作，遇到就讓路比佢地過先啦
- 火山湖範圍內會有小販賣硫磺公仔，極度易碎，德國少女唔聽導遊講買左，個好可愛既公壽命係20分鐘
- 行完山一定無半條命，最好Book定間靚靚酒店慰勞自己，都好彩係咁，我先舒服地捱過呢次發高燒……
今次印尼行火山之旅就到此結束~
如果大家想知多d ge歡迎隨時IG / Threads DM問我呀~
另外 ——————
同場加映 :
因為需要用既Asia Miles一樣，所以我張回程機票其實係CX 泗水–>大阪，要係香港轉機18小時，返屋企訓一覺，第朝就飛大阪啦~
印尼行火山係好開心，但係日本睇棒球、飲啤酒、浸溫泉、食燒肉係另一種開心呀~
========================
請大家Follow我Instagram啦~
另外Threads果邊有我其他教書、旅行和大學時代既攪笑/悲慘故事，快d follow埋啦~
https://www.threads.com/@fung_garcia_backpacker
=====================================
我既Youtube Channel已經開通啦!!!!
快d Click入 「鋒加西亞 / 旅人瘋語」Subscribe 睇片再比個Like禁個鐘仔啦!~
鋒加西亞/旅人瘋語 Youtube Channel
主要影片 ：
白濱系列 :
- 【和歌山】【白浜】白浜七大溫泉評價! 熱到烚腸仔? hea到似街市? 浸哪個好一一盡錄!
- 【和歌山】【白浜】超高性價比溫泉酒店介紹!(上集) 最平最型，兩層複式+望海露天風呂，竟然港幣千零蚊!?
- 【白浜】【和歌山】超高性價比溫泉酒店介紹!(下集) 「白浜館」好味到難以置信的一泊二食︱房內優雅露天溫泉+市中心對正沙灘，勁抵住!
旅行故事系列 :
=================================
相關篇章 :
印尼行火山系列 ：
《Day2.1 – Mountain Bromo布羅莫火山日出》
《Day2.2 – Bromo布羅莫火山︱最輕鬆的火山攻頂?》
《Day3 – 伊真火山死亡攻頂︱世界罕見藍色火焰︱硫酸火山湖好恐怖?》
加拿大黃刀鎮極光系列 ：
名古屋、北陸自駕遊系列 ：
《名古屋8日父母自駕遊行程 (上)︱行程概要、下呂溫泉及上高地》
《名古屋8日父母自駕遊行程 (中)︱富山、冰見、金澤漁市場+加賀溫泉+兼六園》
《名古屋8日父母自駕遊行程 (下)︱福井縣海岸線、三方五湖+名古屋鰻魚飯推薦》
九州自駕遊系列 ：
《Day0.1 – 日本自駕遊初體驗(上篇)︱初心者租車攻略》
《Day0.2 – 日本自駕遊初體驗(下篇)︱準備清單與第一次自駕心得》
《Day1.2 – 福岡糸島打卡精選︱海邊韆鞦、夏威夷風海灘、夫婦岩鳥居、爆蛋三文治》
仙台山形系列 ：
京都紅葉系列 ：
《1 – 京都紅葉隧道此生必去︱貴船神社、琉璃光院︱叡山電車紅葉路線介紹》
富士山登山全記錄：
日本溫泉及溫泉旅館介紹：
日本富山、石川、琵琶湖 :
日本和歌山、白浜 ：
東京、大阪、京都：
韓國濟州島 :
《Day2.1 – 東門市場的遺憾︱豬肉湯麵+海鮮飯卷推薦》
《Day2.2 – 龍頭岩海水汗蒸幕︱最強黑毛豬餐廳「石窟黑豚」》
《Day4.1 – 濟州島 9.81PARK 重力賽車公園》
《Day4.2 – 濟州島 Arte Museum 光影饗宴》
《Day4.3 – 濟州島春日咖啡廳BOMNAL︱涯月咖啡街》
================================
Email : funggarcia@gmail.com
文章同時刊於以下平台，請各位多多支持呀!!!!!!!!!!!!!