完成Cesky Krumlov 4日之旅已經係20/10，距離約定既22/10仲有一日，於是打算21/10先到Salzburg過一晚，第二朝過國王湖可以輕鬆d
20/10係facebook曬命CK有幾靚時，有朋友兩夫婦叫我有時間不如去埋奧地利既Hallstatt，話如人間天堂一樣
好奇下用全能既google大神搵一搵，呢個咪前兩日U Travel facebook post相既“世上最美小鎮”？？？
再問問hostel老闆娘，原來我聽朝去Salzburg架包車本來就係去Hallstatt的!
一場嚟到機不可失!
於是我係出發前一晚九點幾臨時改行程，check車check時間睇資料book住宿，第二朝8點出車離開捷克直達奧地利中部小鎮Hallstatt，過一晚後將於22/10朝早經Salzburg到國王湖
朝早約11點幾到達Hallstatt呢個湖邊小鎮
來程時我已經被沿途美麗風光嚇襯，喂奧地利咁靚ga咩？
而到達後我卻有點予欲無言
呢個小鎮係咪世界上最靚我真係唔知，各位自己評價吧
至於我既朋友們，係睇完我facebook呢d相後一致目瞪口呆，公認呢度真係美得不可方物
而的確，呢度真係我呢世人見過其中一個最靚既地方
但靚唔係大哂既，我其實未有機會同大家講係呢個鎮遇到既麻煩事……….
此事容後再表，今日呢篇係用順序法寫的～
就好似U travel之前既介紹，此小鎮不大，除左呢個湖幾乎無其他景點，腳程快既只要十幾廿分鐘就可以行哂
咁當然唔係行哂走得啦，最perfect既梗係坐係湖邊食餐飯飲杯野~
正有此意時，才驚覺呢度唔係捷克係奧地利!
物價3級跳，要坐底食餐飯？無港幣二百個大洋唔使旨意安全出門口呀!
捨不得，最終只係囉40元正買個“薄切切”漢堡包配以群山湖水做餸
係捷克呢度半隻豬手ga la……………..（其實係stay東歐太耐一時唔慣je……）
因為Hallstatt一時搵唔到平住宿，所以我住係湖另一邊既小鎮Obertraun （其實都係超貴!$400一晚呀!已經係呢區最平!）
而呢度既交通真係幾唔方便下，到其他鎮的巴士平衡個零鐘一班，而穿梭船又會突然cancel
到Obertraun時又因為整路要改行上山誤左時間（但意外見到一大片靚草原玩左陣XD）
再加上check in時reception無人等左半個鐘，終於攪得嚟都無時間再返Hallstatt
而呢個鎮基本上同Hallstatt一樣 ——- 除左個靚爆湖景外就乜都無
既然係咁，呢個下午就坐係碼頭邊，望住呢個詩情畫意，鬼劃符postcard比朋友和重視的人，直到日落吧
（我寫咁耐佢係度咁耐，我懷疑佢係肚餓“吼”住我d postcards…….）
夜晚7點半理論上係一個現代人類正常合理既食飯時間—–我一直都係咁諗，但我錯啦
呢度為數不多既食肆竟然係呢個時間已經完全無食物供應或關門!!？？咁既遊客區我真係估唔到…………..
係幾乎無街燈黑mama既路上尋尋覓覓，但冷冷清清，終於凄凄慘慘戚戚地有間店打洋前幫我打電話問遍鎮內有咩餐廳仲開
阿彌陀佛!一公里外有間店開到9點呀!!!!去到岩岩好8點50……..
千辛萬苦有得食，唔理銀兩啦，Schnitzel加啤酒唔該!!!!
（個光球係月光而唔係街燈ar!）
寫完成篇，我先發現原來d麻煩事主要來自Obertraun!文不對題wor!
其實Hallstatt係指成個湖既地區範圍，即係沙田包括左大圍，沙田，火炭一樣
好啦……..Hallstatt小鎮係絕對值得去既，但可能真係嚟半日感受下已經夠
如果話想要stay幾日，輕鬆寫意又多野遊覽，Cesky Krumlov一定贏呢度!
就好似女人一樣，最靚唔代表最好ge
當然如果兩者兼備就wonderful la~
=================================
IG果邊間中會有d和Blog及fb page不一樣的相片和story，大家有興趣既去follow下支持下啦~
Instagram : https://www.instagram.com/fung_garcia/
Email : funggarcia@gmail.com
My Facebook Page : www.facebook.com/Garcia.in.Germany
Medium : https://medium.com/@funggarcia
另外文章同時刊於UBlog、 DC Fever Travel、 Blogspot 、遊牧爆谷，請各位繼續多多支持呀!!!!!!!!!!!!!