Ærø位於丹麥南部，鄰近城市（亦係我落腳既城市）Svendborg，係我藝術家老友“11號全日遊街”極力推薦必定要到既小島!
如果唔係，呢個根本無乜香港人去過既小島我真係諗都無諗過嚟呀!
由Sovenbourg海邊可輕易坐船到Ærø，十個去Svendborg 9個都係去呢度ga la，其實仲可以選擇直接住係島上tim!
點解我唔住島上既hostel?
哦好簡單je~因為我傻仔唔記得check law…………
不過Svendborg呢間bnb都幾靚幾抵住，老闆娘仲因為行政問題upgrade左我去單人靚房tim!
好入正題啦!
比起前日既Fano， Ærø就各樣野都相對大得多啦，只係重要小鎮都4，5個，連坐果隻船都係6層樓高既可運汽車大郵輪，船內小食店梳化老虎機一應俱全!連個銀碼都大得多呀!
一嚟收我港幣$260!我呆一呆，但原來係包來回都順氣返d……….丹麥d交通真係好貴…….
我老友係推薦我踩單車環島既，但自從上次立陶宛果鑊粥後有d驚驚地（第六十八章），而島上巴士係免費的，咁只要計好巴士班次同尾班船就得啦～
第一站去到最南部的Marstal，鎮內感覺雖悠閒但特色欠奉，主要落車後沿海邊行，就會睇到海ga啦!（點解呢句好似廢話到有d語癌ge？…..）
剛巧碰上天色陰轉晴，聽海都變靚海，good左!
坐巴士到島另一端最北的Søby ，同樣都係一個輕鬆既海邊小鎮，不過Marstal係遊艇會海岸，呢度就係島民夏天享受夏日既石灘
而我都開始發現點解我個fd叫我踩車，因為小鎮唔算極特別，反而公路上沿途既風景非常優美!
另外呢度係屬於“寫意氣氛感受型”旅遊區，有架單車拍拍走走當然係好feel得多～
可惜太遲了，唯有巴士上唔訓，影多幾張相啦!
回到碼頭旁的主要小鎮Ærøskøbing，不得了!
晚上7點仍普照既北歐夏日陽光，穿過岸邊樹林透射到淺灘上，泛起翠綠色的寶石波紋，與離岸天海共色互相輝映，好想即時除哂衫跳落海嚟返兩個直池與魚同游!
返返現實啦喂!!!!!!!!!夏天都10℃緊ga!!!!!!!!
無計啦……..唯有坐係木橋上吹返半個鐘海風當游左啦………..
望望手錶，仲有時間，望望地圖，仲有個廿分鐘路程既海邊未行。雖然人已攰，但一場嚟到，點都去望一望呀
幸好我做左呢個決定，呢個海灘原來先係呢個島既精髓所在!
正評不解釋，睇相算啦!
晚上9點幾天色終於暗落嚟，行左8個鐘，係時候坐尾班船回Svendborg
之但係，臨走都要整個咁靚既日落島景比我，即係擺明要我唔捨得你je~
好啦! Ærø ，我記住你，下次嚟丹麥時再見!
=================================
IG果邊間中會有d和Blog及fb page不一樣的相片和story，大家有興趣既去follow下支持下啦~
Instagram : https://www.instagram.com/fung_garcia/
Email : funggarcia@gmail.com
My Facebook Page : www.facebook.com/Garcia.in.Germany
Medium : https://medium.com/@funggarcia
另外文章同時刊於UBlog、 DC Fever Travel、 Blogspot 、遊牧爆谷，請各位繼續多多支持呀!!!!!!!!!!!!!