去得斯洛文尼亞，當然就要去埋位於佢南部，同為前南斯拉夫共和國既克羅地亞Croatia啦!
係我開始working holiday之初，曾一度plan定此處係我旅行既最後一站，之後由於時間同其他種種原因計劃有變，但仍為我十分期待既一個國家!
不過我份人既命格一向都係“希望越大衰得越勁”
拜託呀!!!!唔好令我失望呀!!!!!
其實一去到Slovenia我已不停向人打探Croatia有咩玩，最後得出兩個結論 :
- 沿住亞德里亞海岸線，基本上個個城市都咁靚!
- 首都薩格勒布Zagreb好悶!
我見又唔順路又無野玩，所以就直接ignore薩格勒布，選擇最接近Ljubljana既海邊城市Rovinj做我克羅地亞之旅第一站啦～
少有地我為克羅地亞做左唔少功課!神蹟呀!!!!!!!!!!!!!!
刨完一堆資料後，決定聽從Utravel blogger “Ying’s Blog”既建議，點都要到Rovinj呢個小城市睇日落～（音 : Ro Thin）
但Rovinj無Hostel，唯有住係佢南邊45分鐘車程既Pula啦
睇日落有一個必要因素—–除左有對眼之外，無錯係要有太陽ge!
去到當日天氣極好，無死啦掛～～
於是到Pula hostel後一扔低背囊就飛奔去Rovinj!
寫左幾百字啦!!!有相睇未ar!!!!!!
sorry sorry我發現今次個前言真係有d長…………好啦入題啦!
於巴士站落車後轉左直行即可見到Rovinj既海岸——-wa有無咁靚呀!!!!!!!!!!!!!
古老山城見得多，藍天白雲都見得多，碧綠透底零污染仲有魚既海灣就真係唔係咁易見呀!!!
其時我正直接中緊強勁既烈陽攻擊，皮膚熱到煎得熟荷包蛋!
真係想即刻除哂衫凌空翻騰3周半跳落海呀!!!!!!
但比起變人肉鐵板燒，我更怕要同銀包電話passport講sayonara…..
唉…………我第一次遇到一個人去旅行先有既麻煩啦……..
去到第一件事就係報Blogger所講既Sunset tour
沿海岸邊有一系列既宣傳廣告版，價格一般都係$100港幣左右，不過船既質素都有幾大分別，好多都係一百幾廿萬人五星戰隊咁擠於一舟
最後睇岩一隻的的骰骰既靚船時，一個亮光頭、濃黑髯、一身橫練鐵布衫、二頭肌大過哈蜜瓜既船主主動撩我 :
「上船啦!」
「而家？我想報7點既sunset tour wor」
「無啦!而家得Islands tour，今晚無sunset tour!」
「點解ge？」
「我今晚有concert表演!」
「Oh! You are a super star!」
「No, 我今晚教會choir唱聖詩 」
果個moment，我feel到我兩隻眼同咀唇組成左3個倒品字既O型
望住佢強勁臂彎上的左青龍右白虎，點睇都係鎚仔爆吉他風格啦……..點會企係穌哥腳邊唱“哈利路亞”ar…….
果種不協調感，就好似叮噹係百寶袋囉出龍虎豹，集齊七粒龍珠召喚出比卡超，甚至銀魂既桂小太郎出盧山升龍霸………….ar對唔住，最後一樣係有可能的
唉總之算啦，唯有搵其他tour公司……..
奇哉怪也，頭先仲好多人叫報tour，一轉眼乜sales都無哂，唯有遲d再算啦
(公仔佬tour個招牌)
(明明咁多counter，突然唔見哂人ge!?)
開始行入內城，越行越覺得，呢個城市好有意大利風格!
一來此處極近意大利，二來此地古時曾為意大利土地
再睇睇地圖劃條直線，係Rovinj只要游3日水就可以去到威尼斯ga啦!!!幾近!!
仲有，此處山崖邊既天然海灘都真係一流!
既然落唔到水，係山崖餐廳飲杯野都好呀!
睇睇個銀碼———-吝嗇的我又縮沙了……………
原來克羅地亞物價無想像中咁平呀……..
最終只係hea底買件pizza係海邊慢慢嘆～
咬得兩啖，一瞬間狂風大作，天氣話變就變，大暴雨殺到埋身!!!!
望室內都去唔切，求其衝左入個路邊木架帳篷頂住先!
睇住風面上驚濤拍岸，真係好難相信兩個鐘前仲係曬到牛扒都煎得熟………
不過都慶幸無報到sunset tour，呢個時間想太陽出來了都好難
有d野，真係整定ge，不過我相信嚟緊係克羅地亞仲有機會的，話哂條海岸線係向西的~
(一影完呢張相就嚟料，幾乎走唔切)
半個鐘後雨細左d，穿上防水風褸雨中漫步埋其餘的城區
儘管雨天景色威力減半，但我對呢個城市真係越行越愛! 甚至可以話此處令我第一日已愛上克羅地亞了～
最後行到攰，坐低飲杯香濃熱朱古力，睇埋場世界盃，whatsapp比朋友曬下命，咁就坐巴士返Pula，完結於Croatia滿足的第一天了!
(大雨下對腳勁污糟，寧願成隻伸落海洗)
係盧布爾雅那既hostel少女職員曾經話Rovinj係一個好無聊既地方，叫我唔好去
好彩!我有嚟je!
雖然我旅途上一直都靠緊人地把口既資料，但都要講句 ——– 有時，唔自己親自試過，唔知會知岩唔岩自己ge~
Rovinj呢度，對我嚟講，真係無嚟錯!
==================================
wa下篇就係第一百章啦!!!!!!!
究竟到時會有咩事發生呢!!？？？？？
下回敬請留意!!!!!!!
=====================================
IG果邊間中會有d和Blog及fb page不一樣的相片和story，大家有興趣既去follow下支持下啦~
================================
我既Youtube Channel正式開通啦!!!!
新影片已upload，快d Click入 「鋒加西亞 / 旅人瘋語」Subscribe 睇片再禁個like啦!~
=================================
- Email : funggarcia@gmail.com
- www.facebook.com/Garcia.in.Germany
文章同時刊於以下平台，請各位多多支持呀!!!!!!!!!!!!!