問 : 究竟布魯日同比利時有咩關係呢?
答 : 布魯日係比利時西邊一個小城市，亦都係古時重要既對外商貿港口
問 : 咁布魯日同布魯塞爾有咩關係呢?
答 : 兩個都係比利時名城，前者靚到絕，後者人地話悶到嘔，所以我直接跳過
問 : 咁究竟布魯日、布魯塞爾同布魯圖又有咩關係呢?
答 : …………………………………………..
我地都係入正題啦!
行程終於來到比利時啦!!!!!!
去比利時，由荷蘭出發坐火車或巴士都非常容易，但一般都會先經過首都布魯塞爾Brussel，所以如果有興趣既可以在此停留再去其他城市玩~
而根據我係旅途上搜集返嚟既資料，旅客們都一致認為Brussel係嚴重名過於實既地方，最值得睇只係童話大道同小孩小便像
咁我對歐洲童話所知甚淺，睇小便我一日閒閒地都睇3、4次啦
所以就決定放棄，坐巴士Euroline直到布魯日Brugge啦!
又係另一個乜資料搜集都無就直衝過嚟既城市，又係另一個無期望無失望但靚到嚇死我既城市!
但我卻stay左係度3日，因為呢度實在太靚，好想花多少少時間係度好好enjoy休息一下
有幾靚???
儘管旅程至此已踏足超過70個城市，水道、古堡、森林、舊式建築真係睇都睇到悶，但估唔到呢個人稱「西歐威尼斯」既小古城仍然能夠咁震撼我!
寬闊的河道既貫穿全城，華貴建築和巨樹園林並列，氣勢磅礡同時卻帶一點點童話的佻皮浪漫味道，然晚上卻會隱隱傳出歌舞鬧酒之聲~
感覺就好似將所有歐洲城市既精彩要素共冶一爐，但卻井然有序融和得非常自然!
也許比利時本身就是一個多國文化交匯的地方吧
嚟到比利時，最重要既梗係食啦!!
除左有同德國一樣舉世聞名既啤酒外，當然係中外女士既最愛朱古力啦!
作為重點旅遊城市，布魯日大街上隨處可見各式各樣的朱古力店，就咁行過都會被櫥窗內古靈精怪既人偶朱古力、動物朱古力、向井朱古力同足球朱古力所吸引!
等等………..上面有一項好似唔係朱古力wor……….
唔係ga真係有好多胸部形狀既朱古力波ga!
Anyway呢d都係眼看手勿動，真係會放落口既當然都係多不勝數啦~
個人就非常鐘意Chocolate truffle啦!
片狀外層搖搖欲碎，張口微微一咬，滑進口腔轉瞬化掉，只餘一匹輕薄綢緞在撫弄齒頰，卻帶著濃濃的可可香…………
簡單嚟講就係好味到係香港頂級既質素!一粒幾廿幾三十蚊果d呢
呢度? 一包8粒有白、黑、牛奶3種味………廿零蚊港幣啦!
所以奉勸大家，千其唔好帶女朋友嚟!一係買到窮，一係食到大一個size!
另外就係青口!
我平時去親香港d比利時餐廳都一定會叫一兜邊食邊和好友把酒言歡，但有時都會覺太貴唔太捨得，二百幾蚊一兜wor!
點知嚟到呢度都係二百幾蚊一兜，但個兜內閒閒地都過百隻青口!
一邊食你會一邊諗…….wei又開殼又拆肉我食到好攰呀!但又好好味令你停唔到手wor!
其實係一開蓋果下已經會令你欲罷不能!香草洋蔥白酒與海鮮既香氣濃縮其中，一開煲蓋果下隨著原子彈咁既煙霧直湧進你味蕾!點忍!
青口肉比一般略細，但嫩滑無渣，鮮味無比!真係人間一絕!
聽聞仲有其他煮法如忌廉蒜頭等，可惜我未有時間同金錢再試啦!
配菜既薯條都係比利時國寶之一!
所謂French Fries其實同法國佬關係無乜，反而係Belgium 100%原創!(當地人咁講)等於揚州無抄飯麥樂雞無雞肉一樣~
而且正式既French Fries唔係素食，因為要用動物油炸兩次先會特別香口濃郁~
至於係咩動物油呢……..鵝油鴨油豬油牛油……應該無地溝油掛!
味道?又真係比我呢一世食過既薯條都好味!
出面一盒都要4-50蚊一盒ga，而家食青口可以一次過滿足哂兩個願望，仲有青口汁dim薯條tim~
我真係食到碗底朝天幾乎煲都咬埋!
藍天白雲既水道固然靚到絕，不過五光十色既夜景都同樣醉人!
於夏日10點幾先日落既歐洲，食飽飯再嚟個夜遊，perfect!
(呢個係布魯日既地標，謀殺左我唔少memory!)
其實成個Brugges比我既感覺真係好似波蘭既克拉科夫Krakow，一樣細細地兼比草木小徑包圍住，之不過華麗程度卻更甚!
如果鐘意塔林、克拉科夫、海德堡一類細小靚古城既，你都一定會鐘意呢度!
而呢度亦都被我定為最靚古城既top 5之一啦~(不過我自己都唔知其餘4個係乜~)
布魯日舊城區非常細小，快行既話其實一日行哂可以做day trip的~之不過我係度行左兩日都完全唔覺厭law~
等等，又話stay左係度3日ge??
其實………..我嚟到布魯日既1st day發生左件旅程中最痛苦又最傻仔既事…..
同埋比利時仲有一樣好重要既野我未講的，下一篇一次過講下乜料………..
=====================================
IG果邊間中會有d和Blog及fb page不一樣的相片和story，大家有興趣既去follow下支持下啦~
================================
我既Youtube Channel正式開通啦!!!!
新影片已upload，快d Click入 「鋒加西亞 / 旅人瘋語」Subscribe 睇片再禁個like啦!~
=================================
- Email : funggarcia@gmail.com
- www.facebook.com/Garcia.in.Germany
文章同時刊於以下平台，請各位多多支持呀!!!!!!!!!!!!!