你無睇錯呀! 個標題真係換左呀~
難得嚟到高加索，我點會咁乖剩係留係格魯吉亞呀~
正如資料集 (https://travelblog-fung-garcia.com/2018/08/blog-post.html)
所講要玩齊高加索3國，行走次序必先去阿塞拜疆Azerbaijan，而一般旅客去襯10個有9個都只會去首都巴庫Baku，但佢位於全國最東面既裏海，由第比利斯出發幾乎都要8－9個鐘，我今次旅程時間緊迫，唔想浪費呀！
揾下揾下，發現阿塞拜疆西北方有一個叫 “舍基Sheki” 既歷史古城，聽聞係個重點旅遊地方，距離第比利斯都係4-5小時車程，並且超級少資料關於呢個地方！就去睇下去乜料啦！
另外，係Sheki遇到既事全部都係同「人」有關奇遇，所以嚟緊呢幾篇，幾乎全部都係#過客列傳，遊記亦以此為重心!
係開始之前，新國家，講下基本資料先啦~
亞塞拜然共和國，又稱亞塞拜然，國名來自於古波斯語，意為「火的國家」。地處西亞外高加索東部，連接東歐和西亞的十字路口，石器時代晚期已有人居住，亦係世上第一個以穆斯林占絕大多數既國家。
- 時差 : UTC+4，即係慢香港4小時，格魯吉亞一樣
- 貨幣 : 口頭會叫「馬納特manat」，文書上就係 AZN ，大約1 AZN = $4.6蚊，大約係將銀碼x5減返d就等於港紙。去銀行可以用美金找換，或者係格魯吉亞唱定都得
- 語言 : 亞塞拜然語，聽聞如果你識土耳其語或波斯語都可以溝通到，無難度呀~ 英文? 唔好玩啦~ 溝通到既我就唔會寫到呢篇文啦~~
- 簽證 : click入去https://evisa.com.az/en，篤完幾日後就會囉到e-visa，好簡單~ 但要千其唔好多手click去過鈉卡ar!!!
好~基本資料到呢度，正文開始!
====================================
繼上回，一大清早離開山上既Hostel向Sheki出發啦!
根據第一晚住既Pushkin 10 hostel職員的資料，早上8點來到Metro “300 Aragveli”站坐巴士
點解資料唔係came from尋晚住ge Hostel Mountain 13講ge? 好明顯阿胡鬚仔除左溝女咩都唔識啦~
只不過估唔到既係連Pushkin 10既資料都有錯，去到minibus站，所有司機都唔知去邊境 ”拉戈代希Lagodekhi” 既車係邊度!
所有司機都係咁叫我「去前面睇下x無限」，而車站所有車寫既都係69式格魯吉亞文，咁我唔會搵得到ga wor!
係半個觀塘海濱公園咁大既車站攪左廿分鐘都係得個吉，唯有靠自己上網再搵啦
資料話係地鐵站Isani會有，望一望地圖，個站exactly係我前面15分鐘路程………阿司機們「去前面睇下」竟然係咁Q前…………….
行到Isani，我就知無咁好死，呢度既司機都係唔知有邊架車去Lagodekhi ga!!!!! 全部都只係話taxi taxi……….
望一望錶，差不多9半啦，一輪講數後話45gel= $150左右，都唔算貴，平時香港坐程uber有時都唔止啦，就用金錢買時間，輕輕鬆鬆又高速咁早衝去阿塞拜疆啦~
唔知係的士快定真係咁近，唔使兩個鐘已經到達邊境城市Lagodekhi
網上見Lagodekhi其實有個湖幾鬼靚，想叫司機車埋我去點知又試雞同鴨講，但叫佢直接車我去關口Matsimi又聽得明wor! 仲識得收多我5 gel，5分鐘路ja!
點都好啦，我終於來到格魯吉亞通往阿塞拜疆既邊境關卡啦!!!!!!
(Lagodekhi個湖，網上圖片，from http://georgiatosee.com/2016/11/lagodekhi-protected-areas/)
好多人都話入阿塞拜疆唔容易，我都except海關甚至有機會未見過香港特區護照而有所留難
誰不知又高速兼友善wor!
Check完visa禮貌問我兩句嚟做乜留幾耐有無去過阿美尼亞就放人了，3分鐘唔使!
反而過境條樓梯級行左我5分鐘仲耐!
(過境大橋，風景又ok wor衰鬼~)
終於踏上左阿塞拜疆呢片無咩香港人嚟既土地啦!!
眼前係———-一片荒涼呀!!!!!!!!!!!!!
做乜又好似 黑山首都 咁ga!!!????? 一出嚟又係果d西部沙漠”do do dooo~~~~~” 既感覺!
乜都無原本就唔係問題，問題只係我身上只得格魯吉亞幣GEL (口頭會讀”拉里lari”)，無找換店我唱唔到阿塞拜疆幣AZN (口頭會讀” 馬納特Manat”)
早知岩岩係格魯吉亞過關前既找換店攪掂先啦………… 太過托大了!
呢個時候，d的士司機又過嚟兜客了
本身唔想理佢地，但明明話長期係度等客ge minibus又係一架都無…… 都估到啦，呢個關口咁少人過，係度做生意慘過做乞衣呀，睇嚟我都係硬掘坐的士ga啦…….
80 AZN!???????? 3舊幾港紙你當我傻ga??????????
即刻劈佢7成25 AZN，佢又勁wor立刻半價40 AZN!
一輪刀光劍影你劈下我我劈下你，最終35 AZN = around $161成交，我知道去Sheki都係兩個鐘，車費同岩岩格魯吉亞果程差不多就算啦
不過更重要既問題似乎係我無AZN係身，仲要只得GEL既大紙……….
所以一早講定 : 「No Manat, Georgia Lari only, OK?」
「OK~ OK~」
我再囉埋一張拉里出嚟 : 「really OK? Georgia Lari?」
「OK~ OK~ No problem~」
好啦~ 信你，上車向Sheki進發lu~
(白色果架)
呢程車我少數地無乜點訓，唔係因為風景靚咁簡單，而係我總覺得個司機好似傻下傻下咁唔太放心
不過我身上有100 GEL一張，根據當時匯率，100 GEL大約 = 65 AZN，佢只需要找返30 AZN比我就岩岩好，最多都係匯率佢唔滿意咪加多少少比佢law，應該問題都唔大的~
另外，都唔知係話佢錫車定錫我，阿司機連路上一條坑仔一粒石仔都立刻由80減速都20，你地諗下唔係柏油路既路面會有幾凹凸ar啦!
係咁又快又慢又快又慢chok來chok去點訓ar……..
由於時間既關係，hur一聲就嚟到Sheki了~
「你住係邊間酒店?」佢用簡單英文單字令我get到係呢個意思
「Guest House Sah Ismayil」怕佢唔識再比埋地址地圖佢，研究一輪之後佢點頭話ok，但我就有d擔心啦…….
唔係因為佢唔太熟呢個大城市，而係因為佢每行一個路口就停一次車!
正常問路梗係問個地方點去，人地答前面轉左轉右掘地道ga啦，就算唔記得咪轉兩個路口再問人一兩次law，點會每去一個路口就問人一次左定右ga??????
我未見過有人去一個地方要問15次路呀!!!!!!!!
Sheki市中心大約係灣仔+銅鑼灣+天后咁大，即係圖書館問一次，CEO newway問一次、皇室堡問一次，百德新街問一次………..
佢究竟係提問技巧有問題定係有金魚般記憶既問題je!????
好不容易 —— 「Here is it!」
呀……..終於到啦!!!!! 「oh my god! Thank you!」我可以脫離停車地獄了!!!!
我一開門，對腳都未叉出去，望一望外邊 —— Sheki Palace? 全城最大最靚既酒店?
「Yes Sheki Palace，your hotel!」佢仲笑笑口同我講
我八格耶魯你個豬頭炳我幾時講過我要去Sheki Palace呀?????
我幾乎比哂成張booking confirmation佢睇，有民宿名有地址有地圖，而係連張地圖都無一忽出現過Sheki Palace呢個字! 佢仲要好狐疑咁望住我好似我整蠱緊佢咁! 乜料ar????
我死都唔落車呀! 快d車我去民宿呀死仔!!!!!!!
(Sheki Palace，等於香港既半島酒店，係當地既no.1)
停車地獄再度展開…….. 20分鐘後佢停左係一間外表好靚既酒店外繼續佢今日唔知係幾次既問路，但好明顯都係on居居一頭霧水，成大個問號鑿左係佢塊面度呀!
我頂唔順了，決定自己出手
開返download左既google map+ 指南針 —— 「阿司機大佬，間民宿咪向下3條街law……. 係啦係呢個方向…….咪嘈啦信我係呢個方向…..直行…..直行呀唔係轉右呀!!!!我隻手幾時指過右ar!!!????」
好不容易! 真係非常不容易!!!!!!
我終於嚟到間民宿——-附近啦!!!!!!!!!!!!!!
因為真係兜幾個圈都搵唔到民宿係邊，但我相信已經係方圓50米之內，根據經驗有d民宿個門口真係無門唔知係邊架，我自己落車搵下算了
(停左係呢間酒店外，都係市內頭幾名貴既酒店)
戲玉來了，要比錢啦
見識過呢位司機剛剛既聰明才智後，果然一如所料 —– 佢話唔收GEL要收AZN，即係話佢根本完全唔明白我上車前所講「no Manat Lari only」係咩意思
呢個我相信同唔識英文無關，因為我上車前已經做哂body language「Manat交叉」再囉埋張GEL比佢睇，根本係條友仔無心裝載，見我肯上車就乜都螺飯應!
如上文所講，我早有準備，同佢慢慢解釋我比100 Lari你比返30 manat我就岩數啦~ 另外附加手機匯率轉換器及計數機，baby step逐樣逐樣解釋佢聽
老老實實，曾經身為教師既我，對教吸收力慢既學生呢方面都幾有耐性，但我真係解說左超過10分鐘佢都係一頭霧水，仲要我唔係用英文wor! 而係對住個app手指指「Manat、this、Lari、this」咁超慢咁篤比佢睇，真係咁難明………?
唔緊要，文化差異je，到最後佢終於恍然大悟，然後搖搖磺nonono表示匯率唔岩
Ok唔緊要，呢個正常，咁你想收幾多gel?
佢立刻囉佢部Nokia 1100出嚟開個計數機篤篤篤，之後遞比我望望 ——–
6500 gel !!!!!!????????????????????
2萬蚊港紙!!!!!!!??????????
你條粉腸計d咩匯率可以計到咁呀!!!!??????
我除左wtf同cls外都講唔到d咩，亦唔打算思考佢係真係無知到咁定係想打死狗講價，總之我就no!
一個講阿塞拜疆話，一個講英文廣東話，講唔掂ga wor!
5分鐘過去，佢死都話要收我6500 gel，我就知道呢個牛皮燈籠係唔會講得明，但都當只係大家語言不通既誤會處理!
見前面有間酒店，就入去搵人做翻譯啦!
Sorry ar間小酒店得一個local大姐係度唔識英文……………
於是我地兩個都無哂符，又開始繼續拉据!
唉我唔係唔想比錢但真係無manat 呀嗎!!!!
咦等等先…………點解我一直諗唔到ge? 我已經係大城市啦仲咩唔去唱錢ar??
「大姐! Money exchange?」
阿大姐聽得明呢句呀!!!!! 仲手指前方答我「Bank!」呀!!!!
阿司機話唔可以放架車係度要車埋我去，我只好順從，但根本只係Sogo到灣仔消防局既距離(中途紅綠燈想轉右比我stop左)，阿塞拜疆d牛肉乾好大塊咩??
(只係呢個距離……..)
一上到銀行佢仲大大聲話「not here」，我一於少理 (同埋奇怪佢突然又識英文)，銀行門口雞乸咁大個匯率牌棟係度，我先唔信無得唱錢呀!
結果當然係有啦~ 仲估唔到Sheki呢間銀行個rate唔錯，不收手續費之餘職員又有禮貌，用美金唱錢非常輕鬆簡單!
我終於有阿塞拜疆幣AZN=Manat係手了!
立刻轉手隊左35 AZN比司機! 唉煩左我咁耐，終於可以解決呢件事了
而條友仲夠膽死話佢係市內車左我咁耐要收多3 AZN!
喂而家係你白痴唔識路關我叉事!!!?????
但我已經唔想比佢再煩了，fing多3 AZN = 14蚊比佢，快同我d走人呀!!!!!
囉起背囊，回到剛剛落車位置再定一定位，唔夠5分鐘就發現民宿原來位於大街一條私家車入唔到既小巷內
經過左成朝既司機大戰，下晝3點幾，我終於來到落腳點Guest House Sah Ismayil民宿了，好攰ar……….
但當時既我估唔到，係阿塞拜疆既奇人奇事，而家先係岩岩開始ja…….
下回繼續 Day6 !
======================
「旅途上總遇上很多過客，相聚也許只是一刻數秒，此生不復相見，卻在你的生命中留下永恆的印記」
#過客列傳 係小弟facebook page一個專寫旅途上一面之緣朋友小故事的系列，多數只係百零字講幾句，今次因為這些過客同行程經歷關係太大，所以再獨立成篇。
今次呢個故事由於太過長又同我個行程有太關係先放埋係度~
如有興趣，可以入下面呢條link睇下其他 #過客列傳 舊故事ga~
當然like埋我個page就最好啦!
======================
相關文章 :
《格魯吉亞背包行Day4 – 烏樹故里，那僻遠村落中的僻遠村落》
《格魯吉亞背包行Day5.1 – 係咁ee睇下Kutaisi》
《格魯吉亞背包行Day5.2 – 一支公hostel天台BBQ》
=================================
我既Youtube Channel正式開通啦!!!!
快d Click入 「鋒加西亞 / 旅人瘋語」Subscribe 睇片再禁個like啦!~
岩岩開始，完全未有人睇呀~
=================================
IG果邊間中會有d和Blog及fb page不一樣的相片和story，大家有興趣既去follow下支持下啦~
Instagram : https://www.instagram.com/fung_garcia_backpacker/
Email : funggarcia@gmail.com
My Facebook Page : www.facebook.com/Garcia.in.Germany
Medium : https://medium.com/@funggarcia
另外文章同時刊於UBlog、 DC Fever Travel、 Blogspot 、遊牧爆谷，請各位繼續多多支持呀!!!!!!!!!!!!!